اختبرت في اكتوبر ٢٠١٩ ( سنتين ونص بعد التخرج)
اعتمادي كان تماما مركز على
PPI FE Electrical and Computer Review Manual–By:Michael R. Lindeburg
PPI FE Electrical and Computer Practice Problems– By:Michael R. Lindeburg
السكشن اللي احس اني فاهمه احل اسئلته واشوف اذا انا مستواي جيد اخطره واذا ما كنت جيد اراجع الرفيو مانيول.
خذيت تقريباً شهر ونص مفرقه وكل يوم من ساعه الى ٣ ساعات
التجربة غريبة شوي ، الاختبار ما كان مثل الكتب ، من وجهة نظري كان اسهل في جوانب وجوانب ثانيه كان يحتاج فهم الاساسيات من خارج الكتاب.
كاتب الكتاب يقول اذا فهمت كتابي فعلاً وما اجتزت الاختبار رد الكتاب وخذ دراهمك، في اعتقادي انه صادق، الكتاب كان مبسط المفاهيم وشامل الى حدٍ ما واللي يفهمه يقدر يتجاوز درجة النجاح
التسجيل عن طريق NCEES بس ما تقدر تكمل لين تأكده من موقع الهيئه وتدفع الرسوم للهيئه وقبلها رسوم الاختبار عند NCEES. ( ما اذكر التفاصيل بالضبط لكن إبدأ التسجيل مع NCEES وهم يعلمونك وش تسوي).
نقطه تهم اللي متخرجين من خارج امريكا والسعوديه ، انا متخرج من كندا، منظمة NCEES اكتفت بأن الهيئة مُطّلعة على وثائقي، يعني ما احتجت اراسل الجامعة عشان ترسل اوراقي للNCEES.
بعد سنة ان شاء الله نشارككم تجربة الPE
فالكم التوفيق
ما أزيد كثير على اللي ذكره عبدالله في الموضوع ، لكن فيه نقاط ممكن تفيد المهندسين الكهربائيين.
طبعا تجربتي كانت غريبة ، مثل أي شيء في سنة ٢٠٢٠. حدولت اختباري في بداية أبريل ، وكنت استعد من فبراير. قبل الاختبار بفترة وصلتني رسالة بإعادة الجدولة بسبب اغلاق مقر الاختبار ، وأقرب موعد حصلته في بداية نوفمبر.
بالنسبة لي كان استعدادي عن طريق موقع Capstone Learning Associates. الموقع ممتاز في جوانب كثيرة ، ويعطي تصور شامل عن الاشياء اللي ممكن تواجهك في الاختبار ، فاللي تحتاجه تدريب جيد واستيعاب للشروحات والدروس الموجودة فيه. يعاب على الموقع -على الأقل في باكجات الهندسة الكهربائية- وجود عدد ملحوظ من الاخطاء في بعض الامثلة والتدريبات الموجودة فيه ، وأيضا شعرت أن أسلوب الشرح موجه لحديثي التخرج اللي المعلومات ما زالت طازجة في ذاكرتهم وما نسوا كثير منها. أحد اشكاليات الموقع مثل ما ذكر عبدالله أسعاره الغالية بعض الشيء.
نقطة مهمة جدا: الاختبار عبارة عن هندسة كهرباء وكمبيوتر ، وتقسيم الاختبار يذكر لك أن ٢٥-٣٠ سؤال راح تكون في مجال هندسة النظم الرقمية والحواسيب. لذلك ، اذا كان تخصصك هندسة كهرباء فأنصحك بالقراءة في مواضيع الكمبيوتر من مصادر خارجية ؛ لأن الموقع ضيّعني اشوي وما كنت فاهم بعض التفاصيل واحتجت استزيد. ما عندي مصدر محدد لهالشيء.
فترة المذاكرة اشوفها شهر ونص الى شهرين مناسبة ، تزيد وتنقص على حسب كمية المعلومات اللي في ذاكرتك.
تسجيل الاختبار عبارة عن وجع راس. تحتاج تسجل في موقع هيئة المهندسين وتدفع الرسوم لهم ، بعد ما يوافقون لك تسوي حسابك على My NCEES وتسجل من هناك وتدفع رسومهم ، وبعد كذا ترسل ايميل لهيئة المهندسين وتقول لهم ترى هذا أنا صاحب الـ ID على موقع NCEES ، وبعد ما يردون عليك ويوافقون ترجع لموقع NCEES وتسجل دخول وتقدر تشوف المواعيد المتاحة في مراكز الاختبارات. ترى مو قاعد امزح في اللي قلته ، الاجراءات كذا
ملاحظة: أتذكر وجود نقطة تأكيد البيانات (الوثيقة والسجل الاكاديمي …الخ) والمصادقة عليها على موقع NCEES ، عن طريق فورم المفروض يرسلونه للجامعة ويتأكدون منهم. هذه الخطوة ما مريت فيها ، ممكن سبب هالشيء هو وجود عضوية عند الهيئة وهي تقوم بهذه الخطوة من البداية.
هذا طبعا كل اللي عندي ، واذا فيه تفاصيل محددة تحتاج إجابة فأنا أسعد بهذا الشيء.
السلام عليكم,
الحمدلله اجتزت الاختبار FE Mechanical
الاستعداد تقريباً 4 أشهر وكانت كافية جداً. ( بعد ماشفت الاختبار اعتقد انها أكثر من اللازم, المفروض اول ماتفهم كتاب Lindeburg انت تقريباً جاهز للاختبار).
طريقة المذاكرة:
كتاب FE Mechanical Practice Problems| Michael R. Lindeburg لقيته في موقع ppi2pass ب89$ لمدة سنة.
مفيد جداً جداً جداً ويجهزك للاختبار ( الاسئلة اللي فيه اصعب من الاختبار لكن فيها شرح لطريقة الحل بطريقة ممتازة ).
موقع PrepFe استعملته قبل الاختبار بأسبوع. اشتراك لمدة شهر ب29.99$. مفيد إلى حد ما وحاول تتعود على سرعة الإجابة والاسئلة اللي فيه مباشرة ( نفس الاختبار أو أسهل).
*** ضروري تكون فاتح المانوال وانت تحل الاسئلة.
بخصوص الاختبار كان متوسط يميل للسهولة, اللهم الوقت طويل نوعاً ما.
من بعد ابريل 2021 ، تم اعتماد دعم شهادة FE من صندوق تنمية الموارد البشرية (هدف)
لو نجحت راح يدفعون لك 1600 ريال قيمة الاختبار كما هو موضح بموقعهم ، ما راح تكون مستحق للدعم الا لو اخذت الشهادة بعد تاريخ ادراجها في الدعم (يعني لو اختبرت واخذتها بعد ابريل 2021) وما مر على اصدارها اكثر من 6 شهور بالاضافة لشروط اخرى مذكورة بموقعهم (فواتير … الخ)
تخصصي هندسة ميكانيكية وفي بعض المواضيع مثل ماذكرت مامرت بشكل مفصل مثل ال Engineering Economics
لكن حاولت افهمه قبل الاختبار
و في القسم الاول من الاختبار في اشياء مامرت علي ابد
مثل اذكر سوال عن السلامة مامر علي من قبل لكن حصلته في الHandbook
اشكر ابو خلدون على طرح هذا الموضوع فادنا حتى بعد خمس سنين من طرحه ولا يهونون الشباب في التعليقات المفيده بيض الله وجيهكم جميع.
الحمدلله اجتزت الاختبار لقسم الميكانيكل , طبعا اختباري كان الاحد ونزلت لي الدرجة يوم الاربعاء الساعه 5 مساء.
بالنسبة للتجهيز اخذ مني حدود 4 شهور وبعد ما اختبرت شفتها فترة طويله وكان مداني اخلصها في فترة اقل لكن بعد المبلغ الكبير اللي دفعته بغيت اجتازة بأي وسيلة حتى لو طالت الفترة.
وعلى طاري المبلغ الي تدفعه بيكون عندك كالآتي:
500 ريال
فتح حساب عند هيئة المهندسين. - 250 ريال
عضوية سنة عند هيئة المهندسين. - 775 ريال (200 دولار)
تدفعها في موقع NCEES بعد ما تسوي لك حساب. - 1725 ريال
ترجع تدفعها لهيئة المهندسين.
الاجمالي شامل الضائب وشامل كل شي بيكون 3250 ريال.
الاختبار كان 6 ساعات, بدأت الساعة 8 ونص صباحا وخرجت قرابة 3 العصر ومع انه وقت طويل جدا لاختبار الا انه مشى بسرعة البرق ولا حسيت فيه.
بالنسبة لمصدر المذاكرة كنت تماما معتمد على كتابين Lindeburg حق ال Review وال Practice. الامثله اللي فيه الصعب من اللي في الاختبار فبتجهزك صح.
وعلى طاري الصعوبه الاختبار ماهو مره سهل ولاهو مرة صعب جاي في النص اقرب شي اقدر اقارنه فيه اللي هو كتاب ال Practice Test في موقعهم كان المستوى جدا مقارب للاختبار الفعلي ونصيحتي لك ما تدخل الاختبار الا وانت حال منه اقل شي 90 سؤال صح.
