السلام عليكم ورحمة الله وبركاته
يا شباب الموضوع هذا مهم جدا جدا جدا
واتمنى الكل يقراه ويشارك فيه بقدر استطاعته
الموضوع مشغلني انا وروميتي من الترم الي راح
ألا وهو :
اننا لما نطلب أكل أحيانا بل غالبا يتبقى شيء من الاكل
وهالسالفة تتكرر شبه يوميا من الترم الي راح
وبعد الاكل نفكر وين نحط الباقي؟؟؟؟؟؟؟؟؟
مشكلة وما لقينا لها حل
وللاسف ما فيه اماكن او صناديق مخصصة لهذا الشيء
اتمنى تاخذون الموضوع يا شباب على محمل الجد
لانو هذي نعمة وما ودنا نتلفها او نضيعها
انا ذكرت هالموضوع علشان ابغى منكم مشاركاتكم
وآراءكم واقتراحاتكم … وش تتوقعون الحل لهذي المشكلة
وش أقدر اسوي معاها؟؟
اتمنى من كل شخص يشارك او يبدي رأيه انه يحط في باله
انو قاعد يساهم في حفظ النعمة … ويحتسب الاجر عند الله
سبحانه وتعالى بمشاركته هذي
وتذكرو قول الرب جل وعلا: (( ولئن شكرتم لأزيدنكم ولئن كفرتم إن عذابي لشديد))
ودمتم بخير وصحة وعافية .
والله يا اخي الكريم اعتقد ان هذه الظاهره منتشره بكثره في العوائل اما الطالب فاعتقد انه يعرف يقدر كمية
الطعام اللي ممكن يتناولها وان حصل وزاد فالخطا بسبب انه طلب اكثر من حاجته اعتقد تقدير كمية الطعام تفيد قبل
الطلب في الاخير تظل وجهة نظر وليست بالضرورة صحيحة لانه يا اخي الكريم لا اعتقد انه ممكن احد ياكل الفائض من
الطعام والحمدلله على النعمة ارجو ان تتقبل وجهة نظري بصدر رحب
ما يسمحون لنا بالميكرويف ولا فيه ميكرويف مشترك على الاقل في العماره
لان الاكل اذا انحط في الثلاجه ما تستفيد منه لانه مايمديك تسخنه
هذي المشكله بالنسبه لي انا !
لو أنه يخصص في كل دور بوضع حاوية كبيرة لجمع بقايا الطعام أو للعمارة بكاملها فقط حاوية واحدة ومن ثم تخرج هذه الحاوية إلى بعض الاماكن المخصصة لهذه الأمور
طبعا بالأول والأخير الطالب يكون مسؤول عن نفسه بوضع بقايا الأكل في تلك الحاوية
عادي جدا حطه بكيس وكله وقت ثاني ماراح تتسمم ولا تموت
الله يعفوا عنّا يا رب …
والله ساعات واجد نطلب أكل ويبقى الكثير …
نقطة مهمة جداً بارك الله فيك …
ياليت لو تكون فيه جمعيه متعاقده معها الجامعه تستقبل الفائض من الطعام …
أو يكون الطالب عارف مقدار الطعام اللي ياكله بالضبط بدون زياده …
جزاك الله خير … تستاهل التقييم على التذكير 
يعطيكم العافية شباب على الردود
بالنسبة للي يقول اطلب على قد حاجتي
فالمشكلة هنا انو بعض المطاعم حاطين مينيمام للسعر
فتظطر انك تطلب شيء اكثر من حاجتك …
صحيح انو هذا خطا بس غصب عنا احيانا
وعجبتني فكرة الحاويات لكل دور او لكل عمارة
بس يا ليت يطبقونها عندنا هنا
اما المايكرويف فهذي حل ممتاز صراحة
لكنه من الممنوعات في السكن
عموما جزاكم الله الف خير
ونتمنى المزيد يا شباب
ياليت يطبقونها والله , 
وجزاك الله خير ع التذكير ,
الحاويات غير مفيدة…
سووها وافتكر الاكل فوق بعض ومدري ايش ووقتها من جد محد حياكل…
لكن في حركة انا اسويها… الزيادة المها بترتيب في كيس واحطها ع الشباك اللي في السيب او اي مكان بحيث تبين انه صالح للاكل…
وصراحة اليوم التاني ماالاقيه … 
الحاويآت كآنت موجودة بس مدري وش صآر عليها, مرة تجي ومرة تختفي
في بعض الأحيآن الحاويات تروح وتبقى حاوية بقايا الطعآم(الخضراء) ونضطر لاستخدامها للقمامــة_أكرمكم الله_
طبعآ أتكلم عن العماير القديمــة وخصوصآ عمارة 3
وشكرآ على الموضوع المهــم
ذكرتني بموضوع تدوير الأوراق…حاطين حاوية لكل عمارة بس بسبب إهمآل عمال سراكو … يوديها ولا يجيبها إلا بعد فترة أو يخليها لحالها لغرض القمائم الأخرى,
أدعو الله أن يرزقك على قد نيتك ويجزيك خير الجزآء
بالتوفيق
أولا : جزاك الله خير على حرصك …
ثانيا : اتوقع أن فكرة الحاويات غير مفيدة بقدر ما يكون الحرص من الطالب نفسه … لو كل واحد بعد ما يخلص من الأكل الزايد لمّه و ودّاه للمبرّة أو عطاه أحد عمال سراكو صرنا بألف خير
ثالثا : تستاهل التقييم و الشكر
بتتغـير أشيـاء عن قريب
اصــــبر بس !!
^^^
الله يسمع منك
جزااك الله ألف خير على التذكير و إثارة موضوع مهم زي كذا
تستااهل التقييم
جزآك الله ألف خير …
جزاك الله خير …
الرز أتوقع ممكن تستفيد منه البهائم أو الدجاج
واللحوم تعطى للحيوانات كالقطط
حتى لا ترمى نعمة بدون فائدة
في حل وانااخوك… اذا تبقى جزء من الطعام، رتّبه ونظفه واعطه لاحد عمّال سراكو…
اولا تكسب فيه اجر وتحافظ على النعمه 
بالضبط !
واذكر لما كنت ساكن بعماره 3 كانت الحاويات تختفي لـ أيام ونستخدم الخضراء
يا شباب انا ما ودي هذا الموضوع يوقف عند كذا بس
انو انا نزلت موضوع واعجبتكم الفكرة مثلا وكل شخص
رد عالموضوع بالي في باله و تقييم وخلاص انتهينا…
انا اشكر كل الاعضاء الي شاركو بارائهم صراحة
بس فعلا احنا ودنا بشيء يطبق في الخارج وشكرا لكم
الحل انك تطنش الامن وتسوي زيي وتشتري مايكرويف صغير ما يزيد سعره عن 200 ريال
اذا زاد الاكل حطه في الثلاجة وسخنه عشا