هل تنصحوني امشي على خطوات اخونا الغالي ؟
======================================
وراح أبدأ بنفسي :
1\ اتعلمت إنك لما تطيح مع مدرس بايخ حده ما يعرف يشرح ولا تدري ليش صاير مدرس , إنك في نهاية اليوم تروح تفتح اليوتيوب , وتكتب اسم الدرس وتتابع مقطع شرح للدرس عشان تفهمه , ما تنتظر لما قبل الميجر وتروح تبدأ من جديد وانت مسووف بسبب شرح الاستاذ الغبي.
2\ الكتب ! ثم الكتب ثم الكتب ! هذا موضوع مهم جداً, مو كل الكتب الي ندرسها بالجامعة كويسة وممتازة , على سبيل المثال : كتاب الماث 101-102-201 , كتاب غبي جداً وأحمق ما يعرف الكاتب حتى يشرح ! تحسه أنه قاعد يتكلم مع دكتور مو مع طالب مسكين معلق آماله في شرح الكتاب لأن مدرسه فاشل ما يعرف يشرح وما لقى المقاطع الكافية على اليوتيوب !!
من بداية السمسترم , شوف الكتاب واقرأه عدل , اذا ما ناسبك , لا يردك إلا مكتبة جرير او أمازون واشتر الكتاب من شركة ثانية .
يعني انا لما اطّلعت على كتاب الكلكولوس لشركة PEARSON انفتحت نفسي ! كاتبين الشرح بالتفصيل الممل لكل خطوة يسوونها , ومع نهاية المثال , يقولك بخط صغير "حل التمرين كذا وكذا وكذا " !
هذا غير ان فيه كتب أخرى تشرح الدروس بطريقة مفصلة جداً وفيه كتب أيضاً اسمها problem solver , هذي تحل مسائل ( على سبيل المثال التكامل ) بشكل مفصل جداً وأكثر من 1000 مسألة !! وفيه كتب للإحصاء وغيرها ( هي في الحقيقة سلسلة كتب ).
3\ فيه مواقع تعليم دروس فيديو بفلوس , مثل yourmathtutor , هذا الموقع اشتراك شهري بفلوس يشرحون فيه أغلب الموااد وعلى يد مدرسين كثيرين . مو لازم تدفع خمسين الف ريال عشان مدرس خصوصي نصاب , وفر 90% من فلوسك وروح اشترك في مثل هالمواقع اذا مافيه مصادر كافية على اليوتيوب تذاكر منها . ( بس لا تنسى , أول بأول )
4\ الهوموركات !! حرام تخسر درجات عشان هوموركات غبية , واذا انت من النوع الي ما يسلم الهوموركات , مالك إلا تسوي بعض الطرق الملتوية عشان تسلم هوموركاتك كاملة , إما عن طريق انك تاخذ الهوموركات من صديق قديم لك , او انك تعطيها لمدرس خصوصي يحلها لك كاملة في بداية الترم أو تشوف وضعك ! الجامعة ما تبغا واحد صادق , الجامعة تبغا واحد يتخرج بمعدل ! الإنسان الي جاي يتعلم هذا ما يمشي وضعه , الجامعة تبغا إنسان ملتزم جداً جداً جداً.
5\ حاول انك ما تتعرف على الدكتور “خصوصن اذا كان دكتور فاشل” , عشان ما يقعد كل شوي في الفصل يسألك وتكون انت الوحيد الي يجاوب عشان محد يعطيه وجه .
6/ اذا كان دكتورك فاشل وما لك خلق تسمع لترهاته في الفصل , فأحسن لك تجيب لك كتاب وتقعد تقرأه في الفصل تنمي مهاراتك الأخرى
7\ الأولد اكزامز اشترها من بداية الترم !! وكل مرة تحل فيها الهومورك او تذاكر لكويز , ذاكر من الاولد اكزام على نفس الشابتر .
8/ كوّن قرووب مع اصدقاء لك , تجتمعون اسبوعياً في الملتقى او في اي مكان , عشان تذاكرون المادة سوى وتحلون مسائل الكتاب وتناقشونها مع بعض .
وأنتم , إيش تعلمتم من هالترم ؟!
