احدى التجارب في البترول

السلام عليكم ورحمة الله وبركاته اخواني الطموحين
بما اني يوم اني كبركم :cowboy_hat_face: كنت احب اقرأ تجارب الطلاب في الجامعة وكذا لأني استانس اذا وجدت احد يشبهني ونفس تفكيري وكاتب تجربته احس اني باصير مثله- فالزبدة كنت دايم اشيك على هالقسم وكذا فحبيت اشارككم تجربتي في الطريق للجامعة.
طبعًا تجربتي هذي كاتبها انا قبل مدري يمكن ثلاث شهور اول ما انقبلت كنت كاتبها في احد الردود والحين نقلتها لموضوع جديد… قد لاتجد في موضوعي ما تتوقع لأني كتبته في وقت كنت فيه في خضم الاحداث وهو اشبه بالتفريغ والترويح عن ماكان في نفسي:
تفضلوا:

"السلام عليكم معشر البترول … اسمحوا لي ودي افضفض شوي :blush:
انا تقريبًا من زمان حاط البترول في بالي بس كنت احسبها ما يدخلونها الا الطلاب الدوافير ابو 99 وحولها وانا الحمدلله ما قد نزلت عن التسعينات لكن في نفس الوقت ما قد وصلت 98 لكن يوم دخلت ثاني ثانوي وعرفت ان النظام تراكمي وقدرات وتحصيلي حسيت فيه امل يعني ووما زاد الامل اني ثاني اختبار قدرات جبت 88 ومن حينها وانا خلاص حطيت البترول في بالي خلاص وزادت رغبتي في الدراسة فيها ويوم عن يوم يصير شيء ويزيد الرغبة فيها مثلًا ولد عمتي وأصدق اصدقائي (يكبرني بسنة) تخرج ودخل البترول وانا توني في ثالث، فكبرت شوي وحسيت بمضايقات في البيت او بالاصح مانيب مرتاح مع نظام العيش في بيتنا -مع اني احب اهلي واخواني كلهم- فصار هدفي البترول لسببين:
1- قوة الجامعة وشهادتها. 2- الرغبة في العزلة قليلًا عن الاهل.
وطبعًا كما هو معروف القبول في البترول ليس بالصعب مرة ولكنه يعتمد على التحصيلي بشكل كبير فيعني طول ما انا ادرس في ثالث وانا مانيب ضامن البترول وماراح اضمنها الا بعد ما اختبر تحصيلي وتطلع نتيجته، ولكن في الجانب الآخر الحمدلله مريّح في المدرسة لأن ما عليها الا 20% وسواء نسبتك 100 او 90 بيفرق معك درجتين بس فمهيب ساويه شدة الحيل وانا اصلًا ماحب الاحق المدرسين بالدرجات خلاص ما خذت هذي الدرجة الا بما كسبت يدي واحاول اعوض في الاختبار الجاي والحمدلله تيسرت الحال ومشيت في الثانوية وتخرجت ب95 وعاد جاء دور التحصيلي، طبعًا شريت كتاب البابطين من بداية الفص الثاني وكنت اطقطق عليه في الفصل كلما فضت حصة اليييييين جت الاختبارات وصرت اذاكر من الكتب وما اعتمد على الدفاتر بشكل كلي واي شيء محذوف احاول اقراه وافهمه كما قرأت من نصايح الاخوة عشان التحصيلي ومرت الايام وخلصت وتخرجت الحمدلله ولكن باقي التخرج الفعلي وهو احراز درجة القبول في التحصيلي وبديت اذاكر وحطيت اختباري الاربعاء اخر يوم عشان اخذ اكبر قدر ممكن من المذاكرة وشريت كتاب مفيييد جدًا جدًا للتحصيلي حق مؤلف اسمه “ناصر العبدالكريم” كانت ميزته ان كلللله اسئلة 1600 سؤال ورميت البابطين واعتمدت عليه في المذاكرة بعد الله عز وجل وشوي افتح كتب المدرسة وشوي من كتاب التحصيلي اليييين يوم الاربعاء وكان في راسي حصيلة معلومات كثيرة والله المهم ورحت اختبر الاربعاء في جامعة الملك سعود ومن قرادتي اني كنت مسجل متأخر فطلعلي انتظار ورحت هناك انتظر وقلبي يخفق يخوفي تمتلي المقاعد وما يدخلوني واكل تبن والحمدلله عدت الامور وقدرت ادخل لكن يوم دخل القاعة ولاهم بادين الاختبار واشوف الوقت ولاه 16 دقيقة يعني لهم 10 دقايق بادين وش الدبرة يلد ويله سريع سريع وافتح الاسئلة وكانت الصدمة اغلب الاشياء اللي ذاكرتها ما جتني من جد ساعاتها وانا في الاختبار حسيت حلم البترول يتلاشى من امامي وكل سؤال اصعب من اللي قبله وكل سؤال اقول من وين جاء ما قد قريته وشذا والمهم يالله خلصت الاختبار وانا مهموم ومصدوم في الحقيقة.واقول هذا اللي كان يدافع عن اختبارات القدرات والتحصيلي قدام الطلاب ويقول انها ما تحطم المستقبل وانها تقيس مستواك الفعلي والخ الخ هه هذا اللي طلعت به جاك اختبار ابن ستين كلب وطول الطريق وانا افكر ومنزل راسي
وصرت ادعي في صلاتي يارب اجيب بس 75 بس 75 مابي اكثر (اذا جبت 75 تصير مركبتي 83.5) وعاد انه طول الاسبوع وانا مهموم وضايق صدري كيف باصير ادرس في الرياض هذي اخرتها؟ لا بس ولو الملك سعود زينه ترا بس لأ تخيل باصير عايش في بيتنا والنظام المخيس لأ لأ مستحيييل مستحيييل واللي يزود الكيلة ان ابوي كل من سولف عليه يقول له والله الولد بيروح البترول … والله وعشان الولد بيروح هناك شريت له كذا … والله وعشان الولد بيدرس في الشرقية ابي له سيارة امريكية من ذا الثقيلات مابي الكوريات الخفيفة اخاف يجيه شيء مع السرعة في الخط …والله وعشان الولد بيدرس في الشرقية الخ…، وانا طول الوقت ماسك نفسي يابوي انت ما تدري وش الطبخة يابوي لا تزود همومي يابوي تراي جايب العيد في التحصيلي

الين يوم اعلان النتايج قبل امس الاربعاء وانا اللي افتح الموقع واناظر ولاها ال صدمة 84 واااو يييييس غير معقول 84 !!! الحمدلله الحمدلله مركبتي تصير الحين 88 يعني في السيف سايد الحمدلله، الحين يله يابوي رح قل للناس الولد بيدرس في الشرقية يله :d خلاص الطريق بينفتح قدامي واحقق حلمي الحمدلله…
ومما خلني اتفكر في الموضوع اكثر انه سبحان الله كانت خطبة الجمعة اليوم عن حسن الظن بالله وكيف ان الانسان ضعيف ويتغير بسرعة وانه يجب ان يتعلق بالله تعالى وسبحان الله كأن الخطيب يتكلم عني :d
ختامًا احسنوا الظن بالله وثقوا ان الله لا يضيع عمل عامل منكم مادامه فعل الاسباب وتوكل على الله فخلاص الله لن يضيعه وحتى لو ما صار اللي يبغاه مثلًا فربما الله اراد له الخير والخير انه ما يصير له هالشيء."

اخيرًا ها أنا احد اوريات الجامعة وقد مضت ثمان اسابيع على بدء الدراسة، اي احد عنده سؤال استفسار ان شاء الله اكون بالخدمة شكرًا لكل من قرأ حتى هذا السطر قراءتك اسعدتني بالتأكيد.

إستمتعت بالقراءة ،
ولمّا خلّصت إكتشفت أن هذي ثاني مرة أقرأ القصة …

مبروك لك القبول ، وفقك الله :rose:

وعليكم السلام ورحمة الله وبركاته

والله ياخوي أنا السبب اللي يخليني ابا ادخل البترول هو نفس سببك مع بعض الاضافات

المهم:
بالنسبة لنسبة الثانوية صحيح انها ما تفرق كثير في القبول في البترول لكن كل ما كانت النسبة أعلى كل ما زادت المنافسة بيني وبين أصحابي وهي منافسة من أيام المتوسطة…لدرجة ان الأوائل في الثانوية اللي كنت أدرس فيها كلهم من المتوسطة اللي كنت فيها ما عدا اثنين …

بالنسبة للتحصيلي :::
أنا ما شريت أي كتاب مساعد …
اللي عملته اني سجلت آخر يوم عشان يمديني أذاكر …
وآخر يوم في اختبارت الثانوية كان يوم تصفية للذهن وراحة …
من اليوم اللي بعده طلعت من الدرج 24 كتاب 6رياضيات 6كيمياء 6فيزياء 6أحياء
اللي هم الكتب العلمية للثانوية كلها كان عندي تقريبا 8 أيام…
خلال هذي الثمانية أيام
خلصت 6كتب رياضيات 6كتب كيميا … أما الفيزياء خلصتها على خفيف …
أما الأحياء ما كان في الوقت الكافي فذاكرتها يوم الاختبار قبل الفجر ب3 ساعات …طبعا ما يمداني أخلصها ومستحيل كمان فقلت ما بذاكر حق ثالث ثانوي وبدأت من كتاب أول ثانوي وقرات سريعا الى أن وصلت للفطريات ووقفت عشان الصلاة (وياليتني كملت صفحتين لأن في سؤال جاني عن الفطريات وما جاوبت عليه صح لأني ما قرأت الفطريات واللي بعدها ) في المسجد شفت واحد من اللي بروح معاهم وقعدنا نتكلم ومر الوقت سرعة وحان وقت الذهاب للإختبار
طبعا الأحياء ما ذاكرت إلا اقل من كتاب واحد فكنت معتمد على فهمي وحفظي السابق لها…
رحنا لموقع الاختبار وكان لسا فاضي مافيه الا ثلاث اشخاص فقعدنا أنا وأصحابي نتكلم الى أن فتحت قاعة الاختبار دخلنا وانتظرنا ووزعوا الأوراق وبدأت أشوف الناس تحل وبدأت أحل في القسم الأخير فوجئت بسؤال بسيط جدا (أوجد عدد المولات) في عينة تحتوي على **** من ذرات ال**** علما أن ثايت أفوجادرو يساوي
http://latex.codecogs.com/gif.latex?\dpi{120}%20\large%20{\color{Purple}%206.022\times%2016^{23}}
المفترض 10 وليس 16 كلمت المراقب قال لي “اسكت” المهم انا تجاوزته بس عارف ان في ناس ممكن مايتجاوزوه فلما خرجت كلمت واحد من المراقبين وقال راسلهم في الموقع…

المهم مر اسبوع وانا على أحر من الجمر ولما طلعت النتيجة استغربت مرررررة من كثر ما سمعت عن الاختبار وانه تعجيزي ما توقعت اني اجيبها طبعا على قول واحد صاحبي “الرزق بيد الله وعلى العبد اتخاذ الاسباب” وانا الوحيد من ربعي اللي ذاكرت فكانت الدرجةة 93 ولله الحمد
اللي منعني من دخول الجامعة اني ما اختبر قدرات بسبب ظروف مرت علي
وكمان انا طالب غير سعودي وسمعت ان غير السعوديين قبولهم من الترم الثاني يعني ممكن أوافيكم بالجامعة السنة الجاية الترم الثاني
:rose: :rose:

hAmMmOd

أرفع لك القبعة احتراماً وتقديراً

عزيمة واصرار … ودعاء بالليل والنهار …

أحييك وأتمنى لك التوفيق ~ :rose:

أشكر لكَ هذه القصة ,

التي تحاوزت بـ قلبي وبثت به رحيق من زهور الأمل ,

التي باتت يومًا بقلبك الزهري…

أتمنى لكَ مستقبلًا زاهر ,

وبإذن الله … أكون معكم السنة القادمة في الجامعة …

أحمد 152…

وآنذا أقرأ قصتك … بثثت الأمل بما يكفوا ويجود …

أتمنى لكَ الحياة العلمية المليئة بالتفوق …


أتمنى لي وللجميع التوفيق والنجاح …

في الحقيقة انا اللي استمتعت بانك استمتعت بقراءة قصتي

الله يبارك فيك ويارب تعدي سنة الأوريا على خير :thumbsup:

بالنسبة للثانوية انا عكسك كنت ارى بأن السكانرات هم اللي يجيبون 100 و 99 لان نظام الثانوي كان اغلبه يعتمد على الحفظ هذي طريقة ااغغغغغغلللب المدرسين الزبدة ما علينا :cowboy_hat_face: الحمدلله على التيسير وماشاء الله درجتك رهيبة والله أتمنى اشوفك تدرس عندنا في الجامعة صدقني بتحس انك قاعد تدرس فعلًا ومستواك بيتطور، لكن ما ادري احس موب معقول تقعد سنة وترم عاطل طويله ياخي!
تحياتي :rose:

بارك الله فيك وجزاك خيرًا، شعرت بصدق امنياتك :thumbsup:

حياك الله شد حيلك وتعال عندنا صدقني بتسمتع :thumbsup:

:rose:

بالتوفيق ان شاء الله إخواني الطلاب ، بانتظاركم في سوق العمل إن شاء الله :slight_smile:

قصة رائعة