سلام عليكم ، انا خريج دبلوم عالي تخصص هندسة ميكانيكية من كلية ينبع الصناعية …
ما الاقي نفسي صراحه ك فني و طموحي عالي باكمال دراستي للحصول على الهندسة …
دخلت قبل اسبوع جامعة الامير سلطان بن فهد في تبوك ، سنتين واتخرج منها مهندس ساينس ان شاء الله
اليوم جاتني وظيفة في شلمبرجير سبيشلست براتب ١١٥٠٠ ريال سعودي ، والشركه ذي تدربت فيها و هي حلم لكل فني صراحةً ومحتار اسيب الجامعه والهندسه واروح لها ، او اكمل دراستي وما انظر لأي مغريات ، علمًا ان الجامعه بفلوس يعني تشكل ضغط صراحةً علي + ما اعرف مستقبل الجامعه وقوتها كيف هل هي قويه وتستاهل اني اسيب فرصة مثل هذي؟
المعذره لو طولت عليكم لكن ماخاب من استشار الموضوع يهمني جدًا
اذا عمرك بين21 و 22 اقبل العرض و انت مغمض اشتغل 3 سنين بعدها اذا ودك تكمل عند الجبيل او ينبع شلمبر اكثر شركة تهتم للجامعة ف نصيحتي من واحد من نفس كليتك اقبل العرض و بعد 3 سنين انت قرر
شوف ياصاحبي انا كنت نفسك قبل 3 سنين بس كملت عشان معدلي طيب , لين اليوم اقول ياريت ف خذها من شخص كان معاك و اقبل و ابدع و بعدين بعد سنتين او 3 قرر اما الان نصيحتي العب على المضمون
الفلوس ما هي كل شي و الشهادة ما هي كل شي لكن التعليم الجامعي مهم. ما أتصور إنك راح تندم إنك دخلت جامعة. لكن اسئل نفسك هل راح تفيدك الشهادة بتحقيق أحلامك بعد التخرج؟ مثلا هل تقدر تفتح لك مكتب هندسي؟ أو تدخل التدرج الوظيفي بداية كمهندس؟
عصفور في اليد ولا عشرة على الشجرة، للاسف فيه مهندسين ما توصل رواتبهم 10 آلاف ما بالك براتبك! نصيحتي اقبل العرض لان ممكن ما تتوفر الوظيفة الا تطمح اليها بعد البكالوريوس، بالتوفيق
الكليات الصناعيه والكلية التقنية تخرجك مهندس تقني ، كثير شركات ماتعترف فيك ك مهندس و حتى الحكومي يوظفون بمرتبة اقل من مهندس الساينس وفرصة اقل وراتبك أقل …
كلامي طبعًا بشكل عام فيه نسبة وحالات يتوفقون بهذه الشهادة …
ممكن تعدد جزء من هذي الشركات الكثيرة اللي ماتعترف بهم؟ المعروف هو شركتين في السعودية هم شلمبرجير وارامكو, وهل هذا السبب يجعل مخرجات كليات الهيئة الملكية والمؤسسة العامة للتدريب التقني سيئة حسب كلامك؟…لعلمك حتى ارامكو طاح اللي براسها وصارت توظف خريجي كليات الهيئة الملكية والكليات تقنية SMP
كلهم يتوظفون على المرتبة السابعه حسب سلم رواتب الخدمة المدنية (سابقا) من وين لك ان المهندس التقني يتوظف بمرتبة اقل.
المهندس التقني يتوظف المرتبة السابعة الدرجة الاولى ، والعلمي ان توظف على السابعة تلقاه الدرجة الثالثه ، ناهيك عن ان مالهم بوزشن بالوظايف الحكوميه ك مهندسين بالرغم من المرسوم الملكي الي ينص على عدم التفرقة بين المهندس التقني والعلمي لكن للاسف ماتطبق للان ، كفاية مكابرة الموضوع واضح للجميع ياعزيزي ، عمومًا بحط لك رابط مقطع ٤٨ دقيقه يتكلم عن الموضوع من واحد يحضر دكتوراه ودارس بنفس الكلية التقنية ، انتهى كلامي بالنقطه ذي وان كان عندك مشاركة تفيدني لموضوعي تنورنا
