الأخوة الزملاء السلام عليكم
بالمصادفة سمعت عن هذا المنتدى وبحثت عنة واستطعت الوصول الية
اخوكم طالب قديم من الجامعه من دفعه 92:)
تخصصي هندسة نظم
اي تساول على التخصص انا جاهز.
وفي النهاية اهنئي الجامعه بالمدير الجديد الدكتور خالد واتمنى له التوفيق
والسلام عليكم ورحمة الله
حياك الله يخوي!!!
بصراحة أنا أهنيك أنك قدرت تعدي هاذي الجامعة (القلعة ) الصعبة…وعقبالنا انشالله يخوي …
في سؤال الله لا يهينك …ياليت لو تتكلم عن الوظائف المتاحة لهندسة النظم.
وتقارنلنا بينه وبين التخصصات الاخرى من نفس كلية الكمبيوتر مثل هندسة الحاسب وهندسة البرامج من ناحية الوظائف المتاحة …
طبعا حنا نسألك يخوي عشانك أكيد لك خبره بمجال الوظايف …
ويريت تقولنا بعد فين تشتغل …وهل أنت مرتاح بشغلك؟…ووش رايك بشركات العمل مثل أرامكوا وشلمبرجير…الله لا يهينك 
ومعليش اذا تعبناك…
اهلا اخي العزيز st92xxxx
ويسعدنا تواصل الخريجين امثالك
فأنتم اهل الخبرة والعطاء ومنكم نتعلم
حياك اخوي معانا ويا هلا فيك
اخوي ابا اسلألك كم سؤال لا هنت :
1- هندسه النظم ليش تحت كليه الحاسب الالي؟
2-كل الي اشتغلو بهذا المؤهل يقولو مجال عملهم مالو علافه بالسيستم.
3-ليش خريج او طالب هندسه النظم يسمونو سباك؟؟
الأخ fheed08
بالنسبة للوظايف فهذا يعتمد على المعدل!!!!
بالنسبة لهندسة النظم فالمستقبل جيد انا اشتغل في سابك و بعض الزملاء اشتغل في ارامكو والبعض في الاتصالات
اما بالنسبة للجامعة فهي الفرشمن فقط!! يعني اذا عديت الفرش بمعدل عالي فمعناة ان باقي السنوات بتصير عسل!! والعكس صحيح.
اما بالنسبة للوظيفة بعد التخرج فهذا يعتمد على تخطيطك, الوالد وعدني انه يتكفل بتكاليف الزواج اذا توظفت.
انا افضل سابك على ارامكو (مو لأني اشتغل فيها) لكن سابك فيها استقرار بعكس ارامكو والراتب الشهري متقارب 7500 (سابك) 8000 (ارامكو) بدل السكن في ارمكو راتب شهرين اما في سابك 3 رواتب سابك او منزل مع 50,000 بدل تأثيث 
الأخ طلو:
الله يحييك وانا جاهز للخدمة:)
الأخ 21xxxxx
هندسة النظم كانت تبع كلية العلوم الهندسية (التخصص قديم بعكس ما يعتقد البعض) ولكن عندما فتحت اقسام الحاسب الآلي اضافوا هندسة النظم لأنه كان من الصعب فتح كلية لتخصصين (تبي الصراحة استفدنا من المواقف المضللة قبل ما يلغون المواقف!)
بعدين الله يسامحك تشوف مهندس اد الدنيا وتقول عنه سباك!! على العموم انا اذكر كانوا يسمونا Egyptian Engineer لأن التخصص عاماما بالنسبة للتوظيف فهذا متوقع لأن التخصص عام. 
على فكرة علاقاتي بالجامعه لم تنتهي انا ازور الجامعه بعض الأحيان لأبكي على الأطلال!!!|5|
ارجوا اني اكون ما طولت عليكم والسلام:)
اخي الفاضل
كم هو المعدل العالي في نظرك يعني يبدا من كم ؟؟؟
مرحبا بك في المنتدى…ومبروك التخرج (بعد الزحمه)…انا طالب هندسه كمبيوتر وافكر اغير تخصصي الى هندسه نظم …وابي رايك في هذا التخصص من نظره موظف خريج من هذا التخصص…وبصراحه ومن غير تحيز…ومشكور
الأخ INTEGRATION
المعدل العالي هو فوق 3
لا تتحطم لكن اللي معدلة فوق 3 بيكون اسهل في التوظيف
الأخ ahmadsu2
بالنسبة للتخصص هذا يرجع الى رغبتك وميولك انا احب الرياضيات من صغري لذا كان هندسة النظم اختياري والتخصص ممتاز (حسب رأيي المتواضع) لأن الطالب يدرس العملية التصنيعية من البداية الى النهاية مرورا بخط الأنتاج الى التحكم بالجودة. التخصص يعتمد اساسا على الأحصاء وانا اعرف طلاب كثيرين يكرهون المادة ذي
لكن قبل ان تتخذ اي قرار عليك بالأستخارة واسلم لأخيك
نشكرك يا st92xxxx من اعماق القلوب لأنك باقي تذكر الجامعة وتتواصل مع الطلاب عبر هذا المنتدى.
اللي اعرفة ان اكثر الخرجين ينسى الجامعة ولايحب التواصل مع الطلاب ولامع المدرسين ويعتبر الفترة التى قضاها في الجامعة فترة كئيبة ويتمنى الاتعود هذه الايام.
الذى اتمناه من جميع طلاب جامعة الملك فهد وخاصة الخريجين والذين سوف يتخرجون فى المستقبل القريب ان شاء الله ان يتواصلوا مع هذه الجامعة مع الطلاب المستجدين مع الدكاترة مع القسم الذي تخرج منه.