والله وقلتها بلسانك ان الكلام كثر على مدير مركز التوجيه يعني مو على المركز وعلى عمله لكن على الأشخاص وهذي مش حلوة في حقك إنك تخليها مشاعر وأحاسيس
يعني يا أخي الله يهديك بس -قول آمين- ما يحتاج نخليها قضايا شخصية لأسباب حزبية مال أمها داعي والشباب هنا ما يحبوا يتكلموا في المواضيع اللي زي كده ولهم حق وأنا معاهم على الخط
بالله عليك فاتح موضوع جديد وجي تقول لنا دحين انه ما شاء الله عليك يعني لاحظت اشياء مرة مهمة لنا ونفسك تقول لنا عليها وكمان بأدلة وكثيرة كمان مع ان الكلام من شهر هو نفس كلامك ما تغير شي ولا شايف شي جديد
مش مشكلة خلينا نشوف ادلتك واحد واحد
*دليلك الأول الدامغ طلع “الأسبوع التعريفي”
لا وتقول (كان واضح) بس ممكن تقول واضح لمين؟؟؟؟؟
يعني مثلا قول انت من اي نادي عشان نحكم وهذي نقطة مهمة جدا في الحكم ان الواحد يعرف خصمه عادل ولا مش عادل
لأنه واضح انه الحملة قايم بها اللجان الثانية - غير الزيارات على قولتك- وهذا والله احس انه ما له داعي
والظاهر انك يا اخي ما قريت كلام الأستاذ السلطان بخصوص نفس الموضوع أو انك قريته وما عجبك
يعني يسوون لجنة ودكاترة وحركات يعني ايش عاد تبغى الناس يسوون لك اكثر من كده
والله الناس تعبوا وانتم مش عاجبكم
*الدليل الثاني
هذا والله ما ادري كيف خليته دليل على الإنحياز
ممكن يا أخي توضح اكثر وتقول كيف خليته دليل وتريحني من الصداع لأني حسيت انها معادلة من الدرجة العاشرة وتحتاج factor
يعني تبغى تفهمنا انها لو كانت غير الزامية معناه انه مدير المركز غير منحاز!!!!!!
تكفون يا شباب واحد يساعدنا بس الله يخليكم نبغى شي منطقي ما نبغى توقعات او ادعاء علم غيب او اتهام مقاصد زي ما واحد قال قبل كده ان مدير المركز منع الطلاب من الأكل في المطعم وطلعت للأسف خزعبلات
*الدليل الثالث
الأخ LOVER يقول هنا انه مدير المركز يحتاج يعرف اللي قدامه من أي نادي عشان يتعامل معاه بالطريقة المناسبة وإذا طلع من احد النوادي اللي ذكرها فوق لا تتوقع منه مساعدة
يعني يا أخوان مدير المركز ما يعرف أحبابه -على قولة الأخ العزيز لمبه-
بالله معقولة
يعني يساعد السنة التحضيرية -اللي ما لها وجود الا في عقول البعض- ويقدم لهم الخدمات والدعم اللوجستي -اتحداك تقول ايش معناها- ويتحيز لهم وهو أصلا ما يعرفهم ويحتاج يكتشفهم من خلال الكلام بالله هذا كلام تقوله
بس الأخ الله يخليه ما وضح ايش يقول الدكتور عشان يعرف انت في اي نادي
يعني يسألك بصراحة ولا يحلفك -زي ما الأخ لمبة حلفني- ولا ايش بالضبط يا ليت الأخ يوضح عشان الدليل حقه يكمل
وعندي لكم حل يعجبكم
حاول تقول اي شي قدامه ولف ودور في كلامك أو خذ معاك ورقة صغيرة واكتب فيها “أنا احب نادي السنه التحضيريه ( الاعضاء القدامى )” وخليها في يدك يوم تدخل عنده ووريه الورقة من غير ما يحس انك قاصد توريه وجرب يمكن تنفع -وقل الشباب على النتيجة لأن الاختبارت على الابواب زي ما انت عارف ولا انا فاضي اتابع آخر النتايج والتحاليل-
وأخيرا يقول “وغيرها كثير”
يعني مصدق انها ادلة ويا ليت تكملها بالله خلي الشباب يستمتعوا بالأدلة
انصحك تروح لموضوع طريق مبنى 24 او موضوع الأستاذ عبدالله السلطان عشان تجيب ادلة زيهم
طيب وبعد هذا الكلام الطويل ايش مطالبك ممكن توضحها ومن غير تورية -على قولة الأخ لمبة جعله الله ذخرا للإسلام والمسلمين- للأسف الموضوع كله ما في ولا شي ولا حتى طلب واحد مع احترامي لك
واللمحات هذي ممكن تلاقيها على اكثر من دكتور (إن شاء الله فاهمني) بس الواحد احيانا ما يبغى يدخل في كلام ما له داعي
انا اقترح عليك تطبع هذي الصفحة وتروح عند مدير المركز وتسلم عليه وتقعد تناقشه وتشوف ايش يرد عليك وتقول لنا هنا ايش صار -ممكن ولا لأ-
اخيراً انا اكتب هذا الكلام بعد ما جاب لي واحد من الشباب هذا الموضوع من فوق -لأنه يعرف إني ما احب الظلم- وحطه في جهازي وأنا اكتب هذا الكلام في الليل من غرفتي
يعني يمكن يجي واحد ويرد قبلي وأنا ما ادري وطلبت من الأخ انه يدخل بإسمي ويحطه ويطلع على طول -لأنه رفض يحطه بإسمه- وحبيت اقول وجهة نظري في كلام الأخ الفاضل والعزيز LOVER وأتمنى من كل قلبي إنه يراجع نفسه أو يتأكد من كلامه وما رديت بكلامي هذا إلا عشان الواحد يعرف إن فيه أكثر من وجهة نظر واللي يقرا يحكم بنفسه وبالمناسبة ترى كلامك يا اخ LOVER مرة راقي ومحترم ويا ليت الشباب يسوون زي كده بس المرة الجاية بدليل مو بتوقعات
همسة- امامي يا اخي كلام جميل أنقله من كتاب لحسن البنا يصف من اتبعه ويقول: هم “أوسع الناس صدرا مع مخالفيهم، ويرون أن مع كل قوم علما، وفي كل دعوة حقا وباطلا، فهم يتحرون الحق ويأخذون به، ويحاولون في هوادة ورفق إقناع المخالفين بوجهة نظرهم. فإن اقتنعوا فذاك، وإن لم يقتنعوا فإخوان في الدين، نسأل الله لنا ولهم الهداية”
