على مدى الأربعة أيام الماضية تحولت معامل الجامعة إلى أشبه ما يكون بسوق البورصة … حيث قام أكثر من خمسة آلاف طالب في الجامعة بمنافسة شديدة على عدد محدود جداً من أجهزة الحاسب و ذلك لإتمام عملية التسجيل المكبر للفصل الدراسي القادم .
و كان من أبرز التطورات في تسجيل هذا العام ما يلي :
1- تغيير وقت التسجيل ليبدأ الساعة الثامنة مساءاً بدلاً من الثامنة صباحاً.
2- إيقاف عملية التسجيل خلال الدوام الدراسي.
3- تخصيص كل مستوى جامعي بيوم واحد فقط.
و أبدى البعض ارتياحهم لسير التسجيل هذا العام و أبدى آخرون استيائهم ، و ربما يعود ذلك لاختلاف ما حصلوا عليه من المواد و الساعات.
و على الصعيد الشخصي فقد كنت متواجداً في معامل الجامعة على مدى ثلاثة أيام متتالية … الأحد و الأثنين و الثلاثاء.
يوم الأحد(Junior) حضرت إلى الجامعة الساعة 6:15 مساءاً تقريباً و فوجئت بأن جميع المعامل ممتلئة تقريباً و بعد بحث طويل و شاق و جدت جهازاً شاغراً الساعة السابعة تقريباً.
بدأ التسجيل الساعة الثامنة تماماً على الموعد و لاحظت تغيراً في سرعة النظام و الدخول إليه و لم يستغرق مني التسجيل سوى 5-7 دقائق، و هذا لم يكن لي وحدي بل كثير ممن كانوا في نفس المعمل، و حتى من لم يدخلوا في البداية و جدوا فرصتهم في وقت لاحق من ذلك اليوم.
يوم الأثنين(Sophomore) حجزت مقعداً في نفس المعمل الساعة الخامسة و النصف تقريباً، و كنت متفائلاً جداً نظراً لما حصل معي يوم الأثنين … كان النظام قبل الثامنة بشكل عام جيداً و السرعة أكثر من مقبولة، كانت المعامل تغص بالطلاب لدرجة أن الواقفين أكثر من الجالسين، و لدرجة أن قام أحد الطلاب بدفع باب معمل المبنى 14 حتى فتحه بالقوة ( و من المعلوم أن معمل مبنى 14 يفتح الساعة 9:30 مساءاً) و تدفق الطلاب إلى ذلك المعمل هرباً من الزحام.
في الساعة السابعة و خمسين دقيقة تعطل النظام بشكل غريب جداً، و تسبب وفي ضجة و بلبلة داخل المعمل و بعد ما يقارب العشرين دقيقة من المحاولات تمكن اثنان فقط ممن في المعمل حسب علمي من التسجيل، و ظل البقية يصارعون الشبكة فتصرعهم، و لكن الوضع هدأ كثيراً بعد ما يقارب الساعتين و استطاع الكثيرون و لله الحمد التسجيل.
يوم الثلاثاء(Freshmen) آثرت مع أحد الإخوة الإفطار بالقرب من المعمل … و كان الوضع مخيفاً بعض الشيء إثر أحداث اليوم الماضي، و كالمتوقع كانت الشبكة قبل بداية التسجيل بما يقارب الساعة بطيئة نسبياً، في الساعة الثامنة تماماً كان الوضع أشبه بالكارثة … و على مدى ساعة و نصف الساعة لم يستطع أحد الدخول حتى إلى القائمة الرئيسية. ثم بدأت الشبكة تعاود عملها بشكل ضعيف جداً حتى نجح عدد يسير جداً من الطلاب من التسجيل، و بعد مضي ثلاث ساعات كان عدد كبير ممن في المعمل قد رفعوا راياتهم البيضاء معلنين استسلامهم و عودتهم إلى غرفهم و منازلهم بخفي حنين.
في الساعة الحادية عشرة تقريباً كان كثير من الشعب الموجودة قد أغلقت خصوصاً مادتي math102 و phys102 .
في الساعة الثانية عشرة إلا ربعاً عاد النشاط إلى الشبكة بشكل غريب و متقطع و نجح أغلب من أعرفهم في التسجيل لكن ليس في الشعب التي كانوا يرغبون فيها.
و بعد هذا التقرير المختصر عن الأحداث التي حصلت في تسجيل 032 نجد أن العيوب كما يلي:
1- عدد الأجهزة غير كافي أبداً خصوصاً في اليوم الرابع Freshmen .
2- بطء في الدخول للشبكة في اليوم الثالث و الرابع.
3- الرسومات و الصور الموجودة في صفحة التسجيل تسبب تأخير كبير في فتح الصفحة.
4- معمل مبنى 14 يفتح في وقت متأخر جداً بالنسبة لوقت التسجيل و هو أكبر معمل في الجامعة.
انا اعتقد ان نص المشاكل المتعلقه بعدد الأجهزه وبطء الشبكه حلها بيدنا حنا الطلاب …
لو الفريشمان يلتزمون باليوم المخصص لهم ولا يجون للابات باقي الايام اللي لغيرهم كان لقينا كمبيوترات فاضيه بسهوله وصارت الشبكه أسرع…(ونفس الكلام للمستويات الثانيه)
ومن ناحية تطور التسجيل … انا اشهد اخذت مني 10 دقايق من إلى ولأول مره
وهذا مايمنع انه فيه شباب مقرودين وحظهم طايح تلقاه له ساعه يحاول واللي بجمبه توه جاي وسجل وانتهى وهو مسيكين باقي في المين بيج واخرتها تقفل الشعب الزينه … (الله يعين اللي حظهم دايم شين)
الاخ Final Warning حقيقه تغطيتك اكثر من رائعه واتمنى من الجميع انهم يحاولون يكتبون مثل كتابتك اللي اللي تمتاز بدقة الوصف وجمال الاسلوب
والسبب ان الباند ودث حقت الشبكة لا تتسع لاكثر من 200 مستخدم
فما بالكم وقت ما يخش اكثر من 1000 طالب سوفومور او فرشمان في وقت واحد
اكيد راح تكون الشبكة بطيئة و ما راح احد يقدر يخش الا اللي من اول فاتح الصفحة ووصل لحد ( add\drop courses ) وجلس ينتظر لحد ما تدق الساعه 8:30 المساء عشان يخش على الصفحة ويحط الارقام ويسوي سبميت
اما اللي ينتظر لحد الساعه 8:30 ويبدا يخش على السيسويب هذا مافي امل انه يخش ( الا ما شاء الله ) الا بعد اكثر من ساعة
فالحل يا شباب هو في ان الجامعة تزيد البندويدث حقت الموقع عشان يتسع لعدد المستخدمين اللي يخشون في وقت واحد
انا كنت قاعد على النت من الساعة 7 انتظر الساعة 8 وقبل الساعة 8 بخمس دقايق كان الموقع شغال زي الحلاوة ولما وصلت 8 الا دقيقتين تغير الوضع 180 درجة وحاولت التسجيل الى الساعة 12 ولكن دون فايدة وعند الساعة 1.30 ولما كنت ناوي ارفع الاعلام البيضاء معلنا الاستسلام وفي اخر محاولاتي اليائسة قدرت اني اخش على السيس ويب للمرة الاولى منذد اكثر من 4 ساعات متواصلة من الانتظار ولكن يافرحة ماتمت
(( كل السكاشن الزينة اقفلت ابوابها بالشمع الاحمر ))
وغير هذا
(( حتى السكاشن الثانية اللي كنت مو ناوي اسجل فيها نهائيا قفلت ))
طبعا وفي مثل هذه اللحظات المحرجة والحزينة اضطررت ان اسجل في السكاشن على حسب الوقت لاغيييييييييييير
(((((( تصدقون في اللحظة اللي خشيت فيها على السيس ويب وشفت كل السكاشن مقفلة تمنيت اني ارجع اوريا ))))))))))) معذووووووووووور
صراحة عشان مانهضم حق الأخوان في الITC أنا طالب سينير وصراحة من يوم ماعرفت التسجيل المبكر ماشفته بالكفاءة اللي هوة عليها السيمستر دا.عملت كل اللي كنت أبغاه وسجلت موادي وكمان مواد روميتي وماصادفتني مشاكل.يمكن عشان قلة عدد الديناصورات اللي زينا:p في الجامعة فمشي حالنا بس أتمنى يحلو مشكلة الضغط اللي يصير للشبكة في أيام الفريشمان والسفمور لأنهم الغالبية في الجامعة.
انا الصراحة عن نفسي رحت مع الشباب للمعامل في 22 من الساعة 4 العصر وكنا ننتظر احدى اللابات يطلعوا لانه كان في كلاس ولما طلع منهم 3 هجمنا على اللاب وكل واحد استلم له كمبيوتر وحتى المدرس كان لسه موجود المهم خلص اوراقه وطلع …
والفطور اشتريناه من مشوار وضربنا عليه في المعمل وخلصنا ونظفنا المكان وانتظرنا الساعة8
وكنت احاول واجرب السيستم قبل لايشتغل وكان ماشي زي الفراري بس…
لما دقت الساعة 8 تعطلت جميع الاتصالات بيننا وظهرت لنا الصفحة الموقرة server can’t be find((هذا اليوم المخصص للسفمور))
وجلسنا نحاول ونشاقح انا وخوياني ومافي امل لكن…
في واحد جالس في الكمبيوتر اللي جنبي واشوفه يدخل ارقام ويضحك وهو مبسوط وسجل جدوله ومو بس كذا الا دخل مرة ثانية على السيستم وسجل لخويانه بعد, واحنا قاعدين نطالع…والله قهر
المشكلة مو في ذا لانه كان موجود في اللاب قبلنا يعني عادي جلس في اللاب وقت طويل بس المشكلة انه في واحد وصل متاخر ومالقى له كمبيوتر وجلس يسولف معانا شو ي وراح بعدها ب10 دقايق رجع وقال : ها ماخلصتوا انا خلصت وسجلت اللي ابغاه , واحنا بعدنا مادخلنا السيستم خير شر …(( اعطيني حظ وارميني بحر…))
المهم بعد معاناة ولما وصلت الساعة تقريبا 9وربع انا وصلت للارقام وسجلت بس للاسف ناقص سكشن المهم وقمت وسجلت بعد لواحد من الجماعة وزبط …
يعني كان السيستم ماشي حاله احسن من السمسترات اللي راحت مع وجود بعض الاخطاء والبطء واللي نتمنى مانلاقيها السمستر الجاي…
الحمد لله التسجيل هذا السمستر افضل من اللي قبله، انا سجلت في يوم السفمور من البيت وجلست حوالي الساعة حتى قدرت اسجل ولكن مع الاسف سجلت 8 ساعات بس، لكن اليوم بعد الاجازة بثلاثة ايام قدرت اكمل التسجيل لأن بعض السكاشن صار فيها مجال لكرسي أو كرسيين وسجلت في كل السكاشن اللي كان ودي اسجل فيها.
انا سجلت يوم الجونيور الحقيقه السستم قفل الساعه 8:20 تقريباً … و كان عندي ميجر … و رحت ذاكرت لي كلمتين و الساعه 1 الليل … سجلت اللي ابغاه اللهم ماده وحده ما قدرت اسجلها لأنها كونفليكت مع مادتين … يعني الله يعني على تضبيط الثلاث مواد مع بعضها و كلها مواد تخصص …
أرجو رجاء حار ممن يتوفر فيه كلامي أن يبادر بالاسراع لحل هذه المشكلة
شباب اللي عنده حل لهذا الموضوع يحاول انه يروح حق المسجل في ايام ساعات المكتب اللي له ويعرضه عليه عشان يمكن يتفهم الوضع وينقذنا من محنتنا اللي احنا فيها
