وين تروح فلوسنا !!!!

النقاشات العامة
1

اعذروني ياشباب على الكلام اللي بأقوله

انا بأتهور وبقول للطلاب اللي يبون انترنت ومظلات ومدري ايش ويقولون نعطي الجامعه عشره وخمسه ومدري ايش!!!!

وشفيكم؟؟؟؟؟؟؟؟؟؟؟؟؟

كل كلمه والثانيه نعطيهم ولا يخصمون…

كم شفطت هالجامعه منا!!!!!!!!!

عندهم فلوس ولو يبون يسون كان سوو وانتهى الموضوع

مادري لهادرجه الفلوس اللي تلهفها منا الجامعه مستصغرينها

وشرايكم بمحاضره في الرياضيات:

1200 سكن(الترم الاول)+
1200سكن(الترم الثاني) +
1000*12(المكافأه المقطوعه مضروبه في سنه كامله)+
500(مخالفات) +
500(دورات المفروض ببلاش) +
500(اغراض يصادرها الامن)+
500 (غلاء الاسعار داخل الجامعه ومنهم اللموزين)

عني انا ياشباب قاعد ادفع للجامعه الموقره حوالي 16400ريال سعودي سنويا

-------------------------------------------------------------------------
على فكره هذا المبلغ اللي للجامعه بس لاتنسون مصروفي وملابسي وغسيلي واكلي وشربي ومواصلاتي ودراستي وحلاقتي وسفري لأهلي وبروجكتاتي و طلبات دكاترتي الخ الخ الخ الخ الخ…
-------------------------------------------------------------------------
16400 ريال تاخذها مني الجامعه ومثلها لمصروفي وحاجاتي
تدرون شكلي باقعد في بيتنا واشتغل بها بالاسهم اصرف لي

انا بس واحد من مدري كم الف طالب في هالجامعه
وانتم احسبوها…

2

أنت لحقت على بوابة الجامعة لما كانوا يجددونها ؟؟ كان العمل فيها مثل السلحفاة ، وفجأة لما سمعوا عن زيارة الأمير عبدالله ، صار العمل فيها 24 ساعة … يالطيف !

الفلوس تنصرف على مظاهر وبهرجة أما مستوى الجامعة الأكاديمي فسلم لي عليه ، ياليتهم يصرفونها على البحث العلمي…

3

يومها كنت مدسمس وفلوس مكافأتي سوو بها البوابه

4

اخوي عبدالله الجماز - بالنقاط طبعاً :slight_smile: -
أرى بوادر أعراض مرض (( وين تروح فلوسنا )) تظهر عليك …
أتمنى منك سرعة معالجة هذه المرض فوراً قبل أن يستفحل ويفضل أن تبادر الآن قبل التخرج حتى تتقبل كل شيء حينها بصدر رحب ولا تعاود إطلاق مثل هذه الأسئلة …
أسأل الله لك الشفاء

مع السلامة

5

علشان اكون حقاني…

بالنسبة للمكافآت المقطوعة فهي تصرف من ميزانية الجامعة وتحول الى (صندوق الجامعات السعودية) وهو صندوق مشترك بين الجامعات السعودية وشبيه جداً بالصندوق (الأسود)…

اما (تفريغ الجيوب) الذي تقوم به الجامعة فهو يحول الى صندوق الطلاب (الصندوق الأسود) الذي (تخاف) الجامعة ان تعلن قوائمه المالية لما فيها من المخالفات والتجاوزت الي ممكن تودي الجامعة بستين داهية…

وللمعلومية قامت لجنة وزارية بتفقد صندوق طلاب جامعة الامام وضبطت تجاوزات شبيه بما يحدث في صندوق جامعتنا مثل: التعاقدات وزيادة بعض البنود والمخصصات المالية… وقد تم تشكيل لجنة للتحقيق في الموضوع… وقد نشر هذا الخبر في جريدة الاقتصادية قبل شهر تقريباً…

وهذه رسالة اوجهها الى المسؤولين في (الصندوق الأسود) ان اللجنة الوزارية قد تأتي لكم في يوم من الأيام… انتبهوا لاعماركم…

انا لا اشكك في نزاهة احد لأن التجاوزات التي اقصدها ليس لها علاقة بالاختلاس الذي لا استطيع ان اتهم به اي مسؤول (مسلم) الا بدليل…

وانا انصحك اخوي (عبدالله الجماز) ان تدرس في احد الجامعات الاوروبية المرموقة (اوفر لك) !!!

6

إحقاق الحق أخي السامي

أخي عبدالله
أولا ، أنا مك فيما يدخل للجامعه أو لصندوق الطلاب من أموال هي من حقك ، و لكن أود أن أسأل عدة أسئلة وهي موجهة لكل الطلاب
1-هل من حقك أن تأخذ من الدولة مبلغ 1000 ريال شهريا؟
2-هل من حقك أن تتذمر لأن الدولة أخذت 10 ريال من الـ 1000 ريال اللي أعطتك هي؟

فاذا كنت ترى أنه من حقك الـ1000 ريال لأن الدولة نصت هذا النظام اذا فمن حقك أن تلتزم الصمت في الـ 10 ريال لأن الدولة نصت نظاما أخر ، و نفس الموال يتكرر مع نظام المعدلات و المخالفات و غيره فهناك أنظمة فبإمكانك أن ترفع معدلك عن 2 من 4 و تحرم الدولة من 12000 ريال سنويا (حسب مايعتقد في الحرمان) ، وبامكانك عدم مخالفة النظام لتتمكن من المحافظة على 500 ريال هي من حقك ، و بامكانك وووووووو
و أنا حاليا بالجامعه في السنة الرابعه يعني جونير ولا قد نقص الشيك عن 990 ريال الا في الاوريا ، لأن معدلي نزل و لا زعلت لأني أنا السبب في هذا الحرمان

و انظر الى قيمة السكن الجديد
82,000,000 ريال وكلها من حساب صندوق الطلاب و الجامعه لا دخل لها في ذلك المبلغ وهذا الأمر أخ1ته من مصادر مطلعة و أكيده

تحياتي

7

أخي السامي
أرجو زيارة موضوع
السامي و صندوق الطلاب
في ساحة الحوار العامه وهذا الرابط

====
تحياتي

8

اخوي غزل القصيد

انت ترد علي وترد على السامي بنفس الوقت!

اولا:
انا ماتكلمت على العشره انا تكلمت على المكافأه بكبرها

ثانيا:
أرفع معدلي؟؟؟؟
تصدق قبل شوي قلت بارفع معدلي ودخلت بعدها بدقايق للترانزسكربت حقي ولقيت معدلي 4 من 4

ثالثا:
تقول عدم مخالفه النظام!!!
اي نظام؟؟؟؟؟
كل دقيقه الامن عندهم نظام شكل
مره المواقف الفلانيه مسموحه ومره لأ

مهما كان المسلم يحب للمسلم الخير

وسبق واحد من الشباب قالي نفس الكلام وقلت له

لاتخليني ادعي عليك ربي يبلاك بمثل ماصابني عشان تعرف بعدها تعدل معدلك وترفعه

واذا كانو اهلك معاك غيرك مايصرفون عليه ريال واحد

اتمنى تحط الشي هذا براسك ولاتحكم على كيفك وانت ماجربت الوضع وعشت فيه

ولا تقولي جربته ترم

انا اقولك انا جربته3 سنوات

ولا تنسى اللي يده بالنار مو مثل اللي يده بالمويه

ونسيت اقولك تعليقا على
1-هل من حقك أن تأخذ من الدولة مبلغ 1000 ريال شهريا؟

اقولك ايه من حقي
مادام خادم الحرمين الشريفين الله يحفظه ويطول بعمره
اعطاها لنا
اجل هي حق لنا

9

أخي الجماز حياك الله في نقاش أرجو من الله العلي القدير أن نخرج بأكبر فائده منه

وسوف أبدأ معك من أخر جملة كتبتها و سوف أصعد صعودا

ونسيت اقولك تعليقا على
1-هل من حقك أن تأخذ من الدولة مبلغ 1000 ريال شهريا؟

اقولك ايه من حقي
مادام خادم الحرمين الشريفين الله يحفظه ويطول بعمره
اعطاها لنا
اجل هي حق لنا

مادام أنك اعترفت أنها من حقك و أسببت ذلك لأن خادم الحرمين الشريفين حفظه الله أقررها لك ، إذا فمن حق فخامته أن يحرمها منك ، ألا توافني الرأي ؟؟؟
فالحاصل أن الملك فهد برأسته لمجلس الوزراء قد أقرّ المكافأه لمساعدة الطلاب و في نفس الموقف و بنفس المنصب في مجلس الوزراء قد أقرّ الأنظمة الأخرى من حرمان الطلاب من المكافأه في حال أنهم لم يتجاوزوا الحد المسموح به لعدم الحرمان ، ونستطيع القول أن صاحب المال أقرّ المبلغ بشروط وهذا من أبسط الحقوق
أرجو أن أكون واضحا في التوضيح!!!!!!!

واذا كانو اهلك معاك غيرك مايصرفون عليه ريال واحد
اتمنى تحط الشي هذا براسك ولاتحكم على كيفك وانت ماجربت الوضع وعشت فيه

أولا ، أهلي لا يصرفون علي حتى التذاكر أو … الخ وهذا للمعلومية فقط
و أنا الحمدلله قد مررت بالتجربة الحرمان لمدة فصل واحد و عرفت أني يجب أن أرفع معدلي و فعلت و الحمد لله ، الباقي عليك أنت و لمدة 3 سنين لم تستطع أن ترفع معدلك ألا تعتقد أن هناك مشكلة معك

ثالثا:
تقول عدم مخالفه النظام!!!
اي نظام؟؟؟؟؟
كل دقيقه الامن عندهم نظام شكل
مره المواقف الفلانيه مسموحه ومره لأ

أرجو أخوي أن تنتبه أن هناك نظام نقر من قبل مجلس الجامعه وهناك نظام أقرره فرد في مجموعه لا يلت بصلة للنظام وهذا أساسا مخالف للنظام و إن أنت سكت عن هذا فتعتبر أنك قبلت الوضع وهذا خطأ عليك فلا يجب عليك السكوت في مثل هذه المواقف.
المواقف كلها مسموح للطلاب الوقوف بها من بعد الساعه 5 عصرا الا بعض منها مثل 5 و 21. ونحن هنا كعقلاء لا نعتبر اقفال المواقف ليوم واحد أو منعها ليوم أن هذا ينطبق على كل الايام أو أنه نظام فمن المحتمل أن يكون هناك أمر طارئ قد حتم عليهم إقفالها فمثلا عند زيارة صاحب السمو الملكي الأمير عبد الله لا يسمح بالوقوف في مواقف 11 أو 19 و هذا لا نعتبره نظاما الا أن الحاله الطارئة و الحالة الأمنية تحتم عليهم ذلك, و لا أتوقع أننا نترك كل شيء و نستقعد للأمن فأحيانا الأمن يكون محكوم ليس من قبل الدكتور ناصر أو إدارة الجامعه بل من سلطات عليا خارج الجامعه ، و مثال هذا أن يمنع الوقوف بعد الدوام في مواقف الاستيديوم ، فيجب علينا أن نتأكد من الأنظمة قبل أن نفتري على أي شخص

حديثي عن المكافأه هو أن من منحها فمن حقه أن يحرمها

تحياتي

10

Re: إحقاق الحق أخي السامي

كاتب الرسالة الأصلية غزل القصيد
أخي عبدالله

و أنا حاليا بالجامعه في السنة الرابعه يعني جونير ولا قد نقص الشيك عن 990 ريال الا في الاوريا ، لأن معدلي نزل و لا زعلت لأني أنا السبب في هذا الحرمان

ههههههه تقولي ولامرة نقص عن 990 اجل انت اكيد ساكن بالجامعة والمحاضرات تقوم لها قبل مايبدأ الكلاس بعشر دقايق…

لكن الي ساكن برا الجامعة هو الي من حقه يشكي من عذاب المخالفات وزي مايقولون الي يده في الموية مو مثل الي يده بالنار…

11

اخوي غزل القصيد

اللي يده بالمويه مو مثل اللي بالنار

اتمنى اشوفك ترفع معدلك وانت مامعك حق الاكل اللي تاكله

اتمنى اشوفك ترفع معدلك وانت تدور شغل او اي شي يضفك

اتمنى اشوفك ترفع معدلك وانت ميت جوع ومامعك حق اقلام

معدلي الحين فوق والحمدلله ورفعته

بس ايش الفايده كملت خمس سنوات وبينقطع

ممكن تلاقي لي حل ياطويل العمر الحين بعد ماخلصت المده الافتراضيه لي بالجامعه

بتقولي ارفع المعدل ولا ايش

اما بالنسبه للمكافأه مين جاب سيره ليه يقطعونها

انا مدري من وين تجيب الكلام انت؟؟؟؟
قلبت المواجع وبس

انا قايل وووووووووووين راحت فلوسنا

ماقلت للللللللللللليه راحت فلوسنا

انا قلت الجامعه خذت المكافأت وووووووووووووين راحت

وووووووووووووين المشاريع

انت فتحت موضوع المكافأت وانا اصلا ماجبت له طاري

انا اللي قلت لك اننا نستحق المكافأت لانها هبه من الدوله

يرحم والديك خلك معي بالموضوع ولا تفتح موضوع ثاني

وبالنسبه للمواقف 5 ترى الخليفي نزل فيها قرار انها مسموح بالوقوف فيها بعد 5 بالفتره الفلانيه وحتى اشعار اخر

واذا منت مصدقني روح للامن ودور في قراراتهم

وتكفى خلك معي بالموضوع وخل عنك الكلام الفاضي

وعلى فكره ارجع واقرا موضوعي زين بتلاقي غرضي من الموضوع اصلا اني اقول للشباب اللي يقولون خل نعطي الجامعه عشره وعشرين عشان يسوون مظلات ومدري ايش

ياشباب ترانا نعطيهم كفايه

واذا كانك بتتفلسف علي واعذرني على لهجتي لانك قهرتني
بكلامك الفاضي اللي كله بالهوا

ولاتزعجنا بسالفه الاوريا حقتك انت عارف ان المعدل بالاوريا حطه بالزباله وماراح يسوي شي وانا الفرشمان هو البدايه

12

وممكن لو سمحت تقولي انا ايش استفدت من صندوق الطلاب اللي يلهفون من 10 ريال كل شهر عشانه؟؟

انا ايش استفدت

13

^
^
هي 10 بس ؟؟!!!

شكلك نسيت تحط كم صفر !!

14

1-هل من حقك أن تأخذ من الدولة مبلغ 1000 ريال شهريا؟

لا مو من حقك

بل من ابسط حقوقك

لانه زي ما ذبحتونا بالخارج

الخارج سلمكم الله جامعاتهم تطلب منك مبلغ لكن يكون راتب ابوك هناك 200 الف وراتب امك 80 الف

لكن هنا راتب ابوك 4 الاف وامك ربة منزل

يعني بديهي تاخذ هالمبلغ بدون منّ ولا أذى

15

أخي عصام
أريد منك اثبات على ما تقول في الخارج، أو في البلدان العربية، وما نسبة هؤلاء الناس ان وجدوا ؟ أرجو التحصل على احصائية ، فعملنا دائما بالارقام و ليس بالحروف…
و لزيادة معلوماتك … فلو أقرّ مجلس الوزراء منع المكافأت على الطلاب ، قابلني كيف بتصير من أبسط حقوقك.
لا نرفس النعمة بأرجلنا و نتكبر ، ولنكن عبادا شاكرين

تحياتي

16

أخي عبد الله الجماز …
بالنسبة للسؤال الأساسي
وين ترووووح فلوسنا ؟
المبالغ التي تدخل لصندوق الطلاب تصرف فيما يلي على سبيل المثال لا الحصر:
1- السلف
2- الاعانات
3- الانشطة الطلابية (مبلغ كبير)
4- المشروعات (كالسكن)
5- الاستثمارات و تشغيلها (مثل الجمعية التعاونية)
6- الرحلات العلمية (للمتفوقين و المتميزين)
7- مشاريع تطوير السكن الحالي و صيانته
8- … الخ

هذه اجابة مختصرة لسؤالك

تحياتي

17

ارجع اقولك اخوي غزل القصيد

انا ايش استفيد؟؟؟؟

1- السلف

عمري ماتسلفت ولا ابي اتسلف

2- الاعانات

مدري وش هالاعانات بس ماعمري شفتها

3- الانشطة الطلابية (مبلغ كبير)

ماعمري شاركت بنشاط طلابي واذا كان قصدك نشاط طلابي مثل الجواله وغيرهم
ليش ياخذون منا 10 ريال حقت تذاكر مايكفيهم الفلوس اللي تجيهم؟؟

4- المشروعات (كالسكن)

وش دخلني انا بأسكان وانا بأمشي من الجامعه ولاراح استفيد منه بشي
وبعدين مو فلوس الاسكان هي اللي يبنون بها السكن؟؟؟

5- الاستثمارات و تشغيلها (مثل الجمعية التعاونية)

هلا والله!!!
يعني الحين الجمعيه يشغلونها بفلوسنا وينهبونا باسعارها والخدمه **؟؟؟

6- الرحلات العلمية (للمتفوقين و المتميزين)

ماني متفوق وايش دخلني فيهم وبعدين ليه يصرفون عليهم من مكافأتي؟؟
الاشياء هذي تنحط لها ميزانيات وانا مالي لها دخل وارجع اقول عمري ماستفدت منها

7- مشاريع تطوير السكن الحالي و صيانته

لاتضحكني بهذي(لاتزعل مني)
هذالي خمس سنوات في السكن ولا شفت اي تطوير او صيانه
وبعدين اتذكر انهم قالو ال1200 حقت السكن راح تحسن الصيانه والسكن مو العشره ريال

8- … الخ
الخ هذا ماعرفه بس صدقني حتى الخ ماستفدت منه اي شي

يعني بالعربي العشره هذي تؤخذ ولا اشوفها ولا استفيد منها

18

انا اعتقد انه من المفروض توضيح جميع القوانين المتعلقه بالمكافاه و صندوق الطلاب من قبل المسؤولين عن هذا المجال بالجامعه بكل شفافيه و وضوح, و لا ارى شيء في هذا الموضوع, احسن ما يتخرج الواحد و هو يتهم الجامعه بانها تسرق من الطلاب 4.8 مليون ربال على مدى خمس سنوات اذا اخذ بالحسبان عدد طلاب 8000 طالب

اذا الخلل و الحل كله عند المسؤولين, لكنني ارى النقاش هنا عديم الفائده, و الحلول قادمه ان شاء الله عندما تصير كلمه الطالب مسموعه في هذه الجامعه كونه “”“طالب”“”

19

السلام عليكم

غزل القصيد ودي ارد على اخر مشاركه لك اذا بتسمح وبدون زعل

1- السلف

السلف سلمك الله ماهي هبه للطالب … بل هي تخصم من المكافئه او مكافئه العمل الجزئي… واذا لم يكن فيه مكافأت انتظروه لين ما يتخرج او يخلي طرفه عشان يسددها

2- الاعانات

والله الي اعرفه ان صندوق الجامعه مش جمعيه خيريه… ولو فرضنا ان الاعانات موجوده قلي كيف راح يعرفون مستحقيها في الجامعه

3- الانشطة الطلابية (مبلغ كبير)

ماني متأكد اذا كانت ميزانيات النوادي تاخذ من صندوق الطلاب ام لا.

4- المشروعات (كالسكن)

صندوق الطلاب غير مسؤول عن السكن هذا قسم وذاك قسم اخر
5- الاستثمارات و تشغيلها (مثل الجمعية التعاونية)

بالله عليك. هل تعرف اسعار الجمعية ؟؟؟؟؟؟

وهل تعلم ان الجمعيه تدر ارباح طائله من جيوب الطلاب…

كل شيء في الجمعيه سعره زايد 15هلله كحد ادنى

15+15+15+15+15+15+15+15+15+15+15+15+15= ∞

فمن برأيك ياخذ من الاخر

الجمعيه من صندوق الطلاب او
صندوق الطلاب من الجمعيه

6- الرحلات العلمية (للمتفوقين و المتميزين)

هل تعلم شيء عن الرحلات العلميه ؟؟؟؟
هل تعلم اين تكون الرحلات العلميه؟؟؟؟
هل تعلم من يذهب للرحلات العلميه؟؟؟

رجاءً اذا كنت لا تعرف عنها شيئا فلا تقل مالا تعلم
“اذا كان الكلام من فضه فالسكوت من ذهب” خاصة في هذا الموضوع

7- مشاريع تطوير السكن الحالي و صيانته

هذا غير صحيح لان الصيانه تكون مقاوله " مثل شركه اليمامه" والجامعه تدفع للمقاول من حسابها الخاص وليس من صندوق الطلاب

8- … الخ

هذا هو سبيلنا للهروب من الواقع “كلمة الخ”

:grinning:D للمعلوميه ترى صندوق الطلاب مسؤول عن تسديد فواتير الكهرباء والتلفون :grinning:D

20

بصراحه احيي فيك جراتك اخوي عبدالله

واحيي الاخوان على ابداء ارائهم بكل صراحه

وهذا شيء مهم جدااا ان نكون واضحين

اتوقع المنتدى هنا متنفس للطلاب ومنتدى مناقش جيد

الموهم

ليتها على العشرة اريل

تصدق لي خمس سنين بالجامعه ولا استلمت الا ترمين واحد بالجبل وواحد بالاوريا

>>> من كثر الحذف والله خخخخخخخخخ

الله يستر ويعين

المشكله انها مسجله انها نزلت لك
يعني اول ما طلعت الجبل طبعا قبل فتره من الزمن
لاني غبرت باالاوريا يطلع لك المبلغ المصروف لك
حاسبين ان كل الشيكات نزلت ؟؟؟

وللمعلوميه على الاقل 1000 طالب هذا اذا ما نظرنا الى الافرج
مايستلمون مكافئه

1000*1000 = مليون شهريا دخل للجامعه من قطع المكافئه
هذا وان قلت بس الف طالب مع انه عدد قليل مقارنتا بطلاب الجامعه

واللي باط كبدي ان الدوله ما قصرت
لو اطلبوا ملايين لمشاريعهم مراح تقصر

لكن يقولون قطع الاعناق ولا قطع الارزاق

بعض الناس يحشر عمره لو بجحارت الضبان بس علشان ما تاخذ شيء خخخخخخخخ ناس الله مشقيها (( طبعا من ابتكروا فكره قطع المكافئه ))

الموهم انا لي رجعه لان هناك بعض الردود ودي اعلق عليها

باحترام

عزيز