الله يعطيكم العافية على النصايح الهامة
والله يوفقنا ويوفقكم
راد راد الله لا يعوق بشر 
و الله يحبيبي القدرات لااااازم تركز عليها و لكن من الي شفته من اغلب الطلاب انهم قطعوا انفسهم بالياله رقوا درجة او درجتين
يعني ذاكرها ولاكن لا تبالغ و تخليها تأثر على تحصيلك العلمي
اما التحصيلي هو الي يمديك ترتفع فيه و عليه النسبة الكبرى
و التحصيلي ما يمشي فيه الا الي يذاكر اول بأول و يفهم الدروس من جميع الجوانب اما شغل الملخصات و المذاكرة ليلة الاختبار عز الله منت شايف خير
انا الحمد لله اني ماصرت ضحية مدرستي ولا خشيت البترول بسبب هل مدرسة
لأن اول اختبار قدرات اختبرته جبت فيه 87 و ادفر ادفر واحد قدرات بمدرستي جايب 75
حسبت اني انا الوحيد الي بالسعودية جايب هل درجات نفخت ريشي على الاخر وصرت ما اطالع المدرسين هههههه و صرت اروح لباقي الاختبارات بدون ما افتح و لا اراجع شي و هذي غلطة
لأني ما كنت ادري ان فيه ناس تجيب في التسعينات
نرجع للمدرسة تدريس فاشل و ملخصات
وصلنا لأخر شهرين في ثالث ثانوي جيت اراجع تحصيلي اكتشفت ان تحصيلي من ثاني ثانوي 0%
هنا طال عمرك جتني الصدمة التحصيلي عليه 50% يعني درجتي بالقدرات مارح تنفعني بشي
وش الحل وش الحل دخلت دورة رائز الي مانفعتني كثير
و استلمت ام الكتب شوفوها للحين و الله بالمجلس اهلي يقولون بنشيلها و انا اقول لا خلوني ابرد حرتي كل ماشفتها يمكن اصورها لكم مع علب البيرة ههههههه<<احب اذاكر مع البيرة
و سويت حركة مجنونه غبت اخر شهر ونص عن المدرسة و خليته تحصيييييييييييلي
قبل هل شهر و نص كان مقاس بناطيلي 36 الحين 32 وسيعة علي ههههههههه ولا بدي ماستر يسويها لي بشهر و نص
هم ما بعدة هم و السبب التدرس الفاشل
العيب مو مني و الله من المدرسة طلاب مايخلونك تفهم شي من المدرس ولا يعطون المدرس فرصة يشرح و مدرس مايهمه الا انك تجيبة البيت و يشرح الجانب الي رح يجي بالاختبار و يحفظك حفظ مايخليك تفهم
المهم بعد كلللل هل تعذيب بالتحصيلي باليااااااااله جبت 80 و بصراحة الدرجة ما ريحتني بس الحمد لله على كل حال
يعني هذا و انا مقطع نفسي اخر شهرين لو ماسويت شي كم كان جبت 
بأختصار راجع قدرات بس لاتسرف فيها
و اهتم من دروس الثانوي ولا تخلي معلومة تفر منك الا و انت فاهمها
اهتم من مراجعة التحصيلي و كل واحد عارف وش الي ناقصة و كم وقت يكفيه عشان يستوعب المنهج
ياخي اذا انت ماشاء الله عليك اينشتاين
غيرك ماعنده الي عندك من معلومات وبعدين ولا مبالغه ولا شي
اذا ماتتعب على نفسك محد بيرحمك وبيقول انت درجاتك عاليه بالمدرسه لازم نعطيك درجه عاليه بالقد ولا التحصـ >>>>>>>>احلى يابو الاختصارات
المهم الا احسن نصحيه ومشكور اخوي عبدالله
ولازم الواحد اللي يبي يحصل نتيجه يتعب على نفسه انا صحيح اني انقبلت بالبترول لكن كنت اتمنى لو هالفكره مرت علي وانا بالثانوي
انا ماكنت اذاكر للقد… وجبت ولله الحمد 82
__________________
مدري اذا انت قريت كلامي زين ولا جاي تتفلسف وبس !!
انا قلت ذاكر واهتم وكل شي بس 10 شهور ساعة كل يوم مبالغه مرة !
يعني 300 ساعة عشان تذاكر قدرات ;s تراه مو اختبار زمالة للطب عشان كل هالوقت !!
300 ساعة يعني كأنك تذاكر 12 يوم متواصلة بدون نوم بدون ولا شي
مخيل ان قدرات تدرس كل هالوقت !
اسمحلي مبالغة مررررةة
وانا ماقلت احد يرحمني انا قلت لو اسست نفسي زين بالمدرسة وركزت على المواد واهتميت بالفيزياء والرياضيات والاحياء والكيميا راح امشي بالجامعة واكون تأسست زين
بس لو ضيعت وقتي على القدرات راح ادخل البترول صح بس ولا شي من معلومات القدرات بتسفيد منه بالجامعة يعني ضيعت المهم واهتميت بالاشياء الثانوية !!
الزبدة الي اقصده لا يطغى شي على شي الثانوي حتى لو نسبته اقل شي هو الي نركز عليه اكثر !
وش الاحسن انك تذاكر زي ما قال اخوي عبدالله ولا لاجا اخر اسبوعين او اخر اسبوع
الا انت قد انك مختبص
حسبه حلوة ولكن كل واحد يعرف قدراته الذهنيه والعقليه
النصايح هذي للي يبي يرفع درجته بالتحصيلي او القدرات
وبعدين دراستك كلها ذي مالها اي معنى يعني ندرس 12 سنه واخر شي 20 %
ترا يعني في مسخره شوي بهالنظام
وبالاخير تركب بالحض مع ناس كثير
انا على شبيل المثال يوم اني ماكنت اذاكر بالقدرات اول اختيار جبت 82
ويوم سويت فيها دافور جبت العيد مرتين كلهم78>>>>>>>>>>>ياخسارة ال200 ريال
والتحصيلي خبصت بالانجليزي ام الدعوه لان الترقيم كان مقلوب ومع هذا جبت 86
شكراً لمداخلتك العنفوانية ، لكن تذكَّر أن هذا الموضوع موجَّه لبعض الفئة من الطلاَّب
وليس لي أو لك . 
وبعدين دراستك كلها ذي مالها اي معنى يعني ندرس 12 سنه واخر شي 20 %
أنا لو إني وزير تعليم كان ما حطيت 20% أصلاً كان خليتها 50% قدرات و 50% تحصيلي <<<< الله على الظالم 
والله منجد!! تخيل يحطونلك على المدرسة 40 ولا 50% , وبعدين طلاب المدارس الخاصة هم إلي داخلين الجامعات
ليش؟ والله على شان أنا ما معي فلوس , ولا حتى بالمدرسة نفسها هذول مدرس محجرلهم وهذول بس قاعد يزود بهالدرجات!
إذا بغيتو إن يكون على المدرسة أكثر من 20% , لازم تكون الإختبارات من الوزارة بثاني وثالث ثانوي كاملين!
وبهالحالة أنا موافق تصير المدرسة 50% بعد!
غير كذا ياخي التحصيلي هو أصلاً نفسه نفس المدرسة بالضبط! هو ماهو إختبار ساعتين وبس!
يعني إنت لما تحتبر رياضيات نهائي ماهو نفس الكلام اختبار ساعتين على تعب فصل كامل!
إلي شادد حيله أيام الثانوية بيحصل , وترا التحصيلي له طريقة بالحساب
والله العظيم يوم طلعت من الإختبار كنت متحططططم ولو قالولي إنك جبت 70 والله ما أستغرب
ولا تجي الرسالة وفوق 90 والحمدلله! يعني منت مطالب إنك تتذكر كلشي بالثانوية! بس الإختبار يقيس إلي كان شادد حيله و إلي مقضيها على الملخص يوم الإمتحان
صحيح وبالنسبة للقدرات , في ناس تقول أنا إيش ذنبي إذا الله خلقني قدراتي ضعيفة!!
أكيد ماهو ذنبك , بس المجتمع راح يستفيد من واحد قدراته أحسن منك لأن المقاعد محدودة
طيب تقولي وهذا المسكين وين يروووح؟؟
هنا المشكلة ماهي من الجامعة ولا من قياس ولا من الوزارة والله!
المشكلة من المجتمع العربي المتخلف!! , إلي ما عندهم إحترام غير للدكتور والمهندس!
ياخي شوف الناس برة إذا كان واحد حرفي ولا حتى مخلص ثانوي وبس ولقيته مجتهد والله الناس تحترمه وله وظائف وراح يلاقي فلوس والله لو إنه يوصل بيتزا!!
لكن عندنا , أنتم تعرفون ما يحتاج أقلكم!
إذا الواحد راح يخطب, الشهادة والراتب!! , يعني الجامعة تقلك التحصيلي والقدرات وهذول الشهادة والراتب وكلهم متعلقين ببعض, يعني في مجتمعاتنا إلي قدراته ضعيفة , أو ما أحد وجهه أيام الثانوية و أيام الزحف! خلاااص؟ انتهى كل شي ؟؟ وين عاييشين حنا يا ناااس؟؟
وكل الوظايف تعتمد على الشهااااادة وليس على الكفاءة! , بينما برة مايكروسوفت ممكن إنها توظف واحد ما دخل المدرسة بس إنه مخخخخخ في الكمبيوتر , عندنا والله لو توريه إنك مبرمج لعبة كاملة لوحدك ومافي شهادة راح يشوتك!
بشكل عام طبعاً وفي حالات خاصة
الله يعين بس
ياخي مشكلتك ترجع تلف وتدور !!
ارجع واقول القدرات شي مكتسب من كل حياتك مفردات لغوية تعلمتها من خلال حياتك مهارات رياضيه اغلبها من المتوسط ! اشياء تتعامل معاها كثير
مايحتاج تذاكرها بس محتاج تراجعها !!
ومن ناحية الدراسة مالها معني ليش مالها معنى خلاص انا يمكن اكون حافظ قران وكل مفردات القدرات من القرآن فاضمن اللفظي والكمي نوعا ما متشابه كثير فادرسه واحفظ وادرس 10 شهور زي ماتقولون
والتحصيلي الكتب الي بالمكتبات انسخها بعقلي نسخ واجلس عليها 24 ساعه واجيب درجة حلوة
والثانوي مو لازم ادرسه زين اهم شي انجح ملخصات وغيره
تتوقع ابمشي بالجامعة طبعا لا انا صح دخلت بس مااقدر امشي لان ماعندي معلومات
فارجع اقول القدرات والتحصيلي بتوقف معاك عند قبولك بالجامعة بعدين احرقها ماتحتاجها بس الثانوي هي الي بنت اول لبنه من المعلومات بالجامعة تطورها !
الحمد لله انا واحد داخل على الحفه هع
بس والله كثيره ساعه كل يوم على ايش
انا ماذاكرت غير كتاب قبول2 للتحصيلي
اشتريته قبل الاختبارات بشهر
واقرا فيه على خفيف واحيانا اسحب عليه اسبوع
جبت بالاختبار 82 الحمد لله نعمه
اما القدرات من وجهة نظري ما اظن يحتاج له مذاكره
يعطيك العافيه اخوي على الموضوع
والله الحمدلله درجاتي بالقدرات والتحصيلي
والثانوي كلها كانت فوق 96 …
القدرات هذا على اسمه يقيس القدرات
والتحصيلي يبين الطلاب اللي كان على مذاكرة
واللي كان على الملخصات واللي كان طوال السنة
يذاكر وفيه ناس اصلا تحديد بالكتاب و يكفي
والمعلمين اصلا طاقة نفوسهم من النظام
والمناهج اللي ما لها فايدة من الأساس
في النهاية تعليمنا يخرج مثقفين فقط وبثقافة ضحلة
ونادرا يخرج مبدعين وموهوبين
و المرء على حسب قدراته
فمثلا ناس يجيبوا بالقدرات 90 بالراحة
وفيه ناس يجيبوا 85 لكن ما يقدروا يوصلوا 90
لذلك ما ادري اصف هذا النظام بالعدل ولا بالظلم
لأن له محاسنه وله سيئاته ويفترض بالشخص
ما دام انا في نظام تعليمي يجبرنا على تعلم اشياء
لا تمت بصلة لرغباتنا اننا نسعى لتطوير
مالدينا من المهارات بالتحصيلي والقدرات
و اسأل الله التوفيق للجميع
يعطيكم العافيه شباب والمووضوع فالصميم …وماقصرت عبدالله <<<سؤال أنت فالبترول ؟ محيرني^_^
البدايه أحب أشكرك على الطرح والشي الثاني …الشباب بالردود فروو مخوخنا (لخبطونا) يعني كان مشيتم بسياق واحد واختلفتم بنقطه وحده ,لا انتم العكس واحد ماشاء الله عليه فاهم الرياضيات وتمام وضعه جا عفس ام الكلام اللي قاله عبدالله يقول حرررااام كل الوقت هذا مايحتاج …طيب دام كل هالوقت مايحتاج ليش كتب <<واقع تجربه …صحيح انه عليه 30% بس الحين انا يوم اختبر بها الكم الحلو من المعلومات من المعقول اني اضمن درجه حلوه بالفتره الاولى للسنه الاخيره وانتم عارفين الهم الكبير والضغوطات <<<انا رايح لثالث وعارف الوضع^_^… يعني عادي نقول كلامه صحيح بالاضافه انكم المفترض انكم تقولون بالاضافه الى كلام عبدالله لاتنسون التحصيلي وانتبهوا له مو واحد يجي يطب عليك يخلي القدرات كأنه اختبار تفسير …كل شي وله مقدار
والقدرات له حساب…يعني مو تهمشه …بعض الكلام اللي قالوه الشباب عن القدرات ينطبق على المجتهدين بشكل كبير ويجيب 95% ماشاء الله بس في ناس يقدر يمشي بالبترول بس من رهبة القدرات والتحصيلي يجيب درجات تحت ومع ذلك يبغاله مذاكره اثنينهم واعيد واكرر لازم يكون توازن بالكلام …
<<<<احس كل من قرأ الموضوع بيجي ويكتب رد يسكتني فيه هههههههه
ترى هذا ردة فعل شباب ولا احد يزعل بس انا اقولكم وش اللي نشوفه حنا اللي متورط بدرجه او درجتين يدور مثل الكلام اللي يساعده انه يتطور …وأسأل الله التوفيق يارب لنا ولكم
واللي فيه خير الله يكتبه لنا ويجعله من نصيبنا …
بقلم …مقرن , طالب اخر سنه وفي صراع مع المستقبل :k
اشوفكم مع الردود
انا اقول ذاكر اول باول … ( بالنسبة للتحصيلي )
على شان اول ماتجي لوقت مذاكرته تكون المعلومات بمخك … بس يحتاج ان تتصفحها
وشكرا
وآآو…الموضوع من عام 2010 والحلو اللي فوقي رافعه…!