لقيت قليل ناس تقيم الفنار ودائما عليها كلام وانها شركه مناسبه لسعوديين الموضوع هذا يعكس تجربه عشتها تقريبا 3 سنوات بالشركة وراح احط الايجابيات والسلبيات بالشركه و وضعك كسعودي فيها
الجامعة:KFUPM
التخصص: مهندس صناعي
المعدل: 2.9
مدينة التوظيف: الرياض
الراتب: 10500 لحديث التخرج (8000 راتب اساسي 2000 بدل سكن 500 بدل مواصلات 666 بدل اضافي لسكن غير ملزمه الشركه فيه وفيه بدل مركبه وفي اخر سنه معهم شالوه بدون سبب مقنع)
ميزات وظيفيه : عندك التامين الطبي يعتبر متوسط تدفع فيه مبلغ كل فحص بحد اقصلا 250 ريال و عندك بعض العروض تكون لموظفين الشركه
سنوات العمل: سنتين و خمس شهور
خبرة سابقة: حديث تخرج
طبيعة العمل:
1- الخبره: تعد الفنار من اكثر الشركات الي ممكن تحصل فيها خبره لانهم يكرفونك نهار ليل عشان تنجز مشاريعك او شغلك الي يفترض انه يكون شغل اكثر من موظف عشان تتقيم كويس اخر السنه وكل شيء تتعلمه يكون بجهدك الخاص لانعدام الدورات و ادوات التعليم ولا يكون عندهم غير الادوات التقليديه من المهارات الناعمه وغيرها ولكن تضل الخبره المكتسبه قويه وقد تكون شامله بسبب وجود اكثر من مصنع في المدينه الصناعيه والي يسمح لك انك تتشرب الخبرات من اشخاص كثير متعاونه بالاضافه انه راح يعطيك قسمك اصعب المشاكل الي ما قدروا هم يخطونها بنفسهم.
2-بيئة العمل: تعد الفنار من اسوء الاماكن الي ممكن تشتغل فيها ورغم انه فيه ناس جميله وتعاملهم جميل وراقي لكن الشركه تقوم على اساس اللوبيات فعندك اللوبيه السوريه والهنديه منتشره بشكل قوي وانت كطرف سعودي تكون شيء مؤقت فكل قسم يبغى يسحبك عنده عشان تكون كبش الفداء وقت لما يسير فيه ضغط على القسم الي عليه مشكله او من اول المشوار يعطونك كل المشاكل الي بالقسم تحلها وانت توك حديث تخرج عشان تكون المشاكل بسبب انك عديم الخبره مو بسبب اخطائهم
3- المستقبل الوظيفي: لسعودي المهندسين تاريخ صلاحيتك هي 3 سنوات بسبب انه نوع العقد راح يتغير وبعدها الشركه تحاول تطفشك او انهم ينهون عقدك والشركة للاسف عندها علاقات كبيره جدا عشان تطلع من كل العقوبات الي ممكن مكتب العمل يصلحها غير انه عمليه توظيف السعوديين تتنشط كل سنتين لانهم راح يطردون الدفعه الي متوظفه قبل( في وضعي انا الحمد لله حصلت فرصه وظيفيه ممتازه وخرجت قبل ادخل ذي الدوامه ولكن تقريبا كل الي دخلوا في دفعتي انهت الشركه عقودهم ودفعت لهم راتب الشهور المتبقيه رغم انهم كانوا جدا جدا ممتازين) الشركه تترك كم سعودي عشان تخرج من دوامه الفصل الجماعي.
4- ميزات اضافيه:الشركه تعطي بونص بعد سنتين لحديث التخرج ولكن للاسف ممكن يجيك او لا بسبب انك ممكن ما تكمل السنه الثالثه قبل ينهونك ومثل وضعي الشركه ما صرفت لي اخر بونص كنت مستحق له وقت ما استقلت ولكن الشركه تصرف للاجانب حتى لو خرج من الشركه.