التحضير : يحضر بدون ورقه يحضر بمخه ماشاء الله ويحفظ اسمك من اول كلاسين وطبعا يدخل قبل الكلاس بخمس دقائق ويقفل الباب مع بدايه الكلاس
طريقة الشرح : شرح اسطوري ممتاز لابعد درجه
الكويزات : ثلاثه كلاس تست واحد صعبه قبل الفاينل وواحد قبل كل ميجر
المياجر: كومن
الفاينلات :كومن
القريد النهائي:A++++
الصوت: الصوت عالي
إضافات : الدكتور مزوح وطقطوقي وعلى الاقل بتجيك نتفه فالترم ف خلك وسيع صدر
181- math 101
الصوت: واضح جدا
النوتة: غير كافية تحتاج مصادرة خارجية مثل الكتاب
الشرح: A+++
الأخلاق: الدكتور خلوق وطيب جدا لكنه يحب المزح والضحك مع الطلاب طبعا اذا مسك عليك شي اهنا راح تتعب اشوي معاه. مثال : في طالب من الطلاب كان منزل ماث 101 صيفي لكنه سو له دروب في الصيف ونزل عند الدكتور منذر في الترم واهنا مسك عليه هل الشي وكل مايغلط في حل السؤال هذا الطالب الدكتور يقول له زين انك حذفت الماث في الصيفي وجيت عندي.
التحضير: بدون ورقة يحفظ اسمك ووجهك من ثاني كلاس ماشاء الله عليه.
الكويزات: ما عنده كويزات…لكن عنده 3 كلاس تست (أصعب من الميجر)
القريد النهائي: A+
ملاحظات : في شي واحد الطلاب يكرهونه فيه هو ان لايسمح بالتأخير ثانية واحدة : كلاسك ساعة 10 مثلا وجيت دخلت الكلاس ساعة 10 ضبط راح يطردك من الكلاس.
الدكتور جدا طيب ومتساعد انصح انك تنزل عند لكن لازم تذاكر اول بأول!!
1 Like
181 math 101
التحضير : يحضر اول السمستر ثم يعرف الاسماء وما يحضر ، لو تتأخر ١٠ ثواني يطردك
طريقة الشرح : سلايدات يشرحها ثم بعد ما يخلص يحل مسائل
الكويزات : ٣ كلاس تيست بالسمستر تقريبا كل واحد اصعب من الثاني ، لكن شخصيا ما اشوفه فرق بنهاية الترم كان مجموعي ٦ من ٤٠ بالكلاسوورك الملا الى ٣١ من ٤٠ وكان افرجي بالمياجر ٧٧.٥ بالمية ، طبعا رفعني ٢٥ نقطة لان الافرج حق الكلاستيست نازل
القريد النهائي : A
الصوت : واضح الى مرتفع
اضافات : الدكتور راعي طقطة قوية لكن بدون حقد ، فيه بعض الناس يتضايقون منها لكن اشوفه عادي .
بنود التقييم :
منقول عبر واتساب
اسم المدرس : منذر الفريدان
المادة : Math 101
الترم: 183
التحضير : شديد (ما يعترف بالليت عنده يا حاضر او غايب)
طريقة الشرح : اسطورية، اطلع ما احتاج اذاكر كثير
الكويزات : نااار
المياجر: كومن
الفاينلات : كومن
القريد النهائي: A
الصوت: واضح جداً
إضافات : الدكتور يحب ينكت كثير لكن مزاجي بقوة، لكن نهاية السمستر ما قصر ولله 
TERM183 - MATH101
التحضير : شديد جدا وماعنده تأخير، وطريقة التحضير انك تدخل كود يتكون من 4 أرقام تكتبه في الـ Attendance (بلاكبورد وهي طريقة جديدة) لمدة دقيقة واذا ما لحقت تصير غائب D:
طريقة الشرح : بواسطة نوتاته ولكن مشكلتها مافيها حل، يعني ياتكتب معاه او تصور بجوالك
الكويزات : مايعترف فيها 
المياجر: كومن
الفاينلات : كومن
القريد النهائي: A
الصوت: واضح بشكل يطير النوم ويشغل العقل
إضافات : الدكتور مزوحي جدا جدا وممكن يتجاوز حدوده باحترام، ما انصح تخليه خيارك الاول اذا المادة تعتمد على تصحيح الدكتور، لان الكلاس تستس الي اخذناها كانت حريقة الافرج كان (class test1 3/13 ) (class test2 1/12) وتاخذ درجة السؤال كاملة او تاخذ 0 مافي وسط وطبعا تحتاج تتعود على الـ0 D:
TERM183-Math101
التحضير:شديد جدا لازم تحضر قبل وقت كلاسك بدقيقة على الأقل
طريقة الشرح:عن طريق نوتاته لكن عيبها أنها غير محلولة
الكويزات:لا يوجد فقط 3 كلاس تستس قبل الميجرين والفاينل
المياجر:كومن
الفاينل:كومون
الصوت:واضح جدا
القريد النهائي:ِA
الدكتور يحب المزح والطقطقة وأخلاقه جدا عالية وشرحه ممتاز جدا ولو ما فهمت تروح للأوفيس أور وما تطلع إلا وأنت فاهم ولو راسلته بالإيميل يرد عليك بسرعة لكن فيه سلبية وإيجابية بنفس الوقت الي هي ان كلاس تستس حقته صعبة جدا ,بإختصار الدكتور هو خيارك الأول إذا كنت تبي تفهم .
1 Like
ولكن كن متأكدا أنه من أفضل 3 دكاترة اذا ما كان أفضلهم .
TERM191-Math201
التحضير : يحفظ اسامي الطلاب وانتبه تتاخر, لو كلاسك الساعه 9 ودخلت 9:01 راح يطردك
طريقة الشرح : الشرح مقبول ويستخدم نوتاته ولكن مافيها حلول، يعني لازم تصور بجوالك خصوصا ان الدكتور مايرضى احد يكتب وهو يشرح
الكويزات : يعطي 2 او 3 كلاس تست صعب جدا
المياجر: كومن
الفاينلات : كومن
القريد النهائي: C
الصوت: عالي
إضافات : الدكتور شرحه معقول لكنه مايحب احد يسأل في الكلاس والدكتور مزاجي يوم يكون عصبي ويوم يطقطق وما انصح به الا للطلاب الي يتقبلون المزح ايضا الدكتور بنهايه الترم يجبر كل الطلاب يروحون للاوفس عشان يعطيهم الكلاس وورك وهنا انت لازم تجي قبل الموعد الي حدده الدكتور بساعه على الاقل لان الطلاب راح يسجلون اساميهم في ورقة والدكتور يجلس مع كل طالب اكثر من 10 دقايق والدكتورغالبا عنده فوق ال 80 طالب
Math102 - Term 192
بسم الله الرحمن الرحيم نبدأ على بركة الله بتقييم الدكتور الاسطورة ابو راشد حبيب الشعب.
التحضير : هذي النقطة يمكن اغلب الشباب يتضايقون منها من الدكتور وهي سالفة التحضير فقط
الدكتور جدا جدا شديد بالتحضير خذ حسابك ان اذا كان كلاسك 10:00 يبدأ معناها 10:00 بيتقفل الباب ولابتدخل بعدها لأي سبب كان
الدكتور ماعنده تأخير ياغياب او حاضر , طبعا انا كنت اوصل في آخر الثواني للكلاس لكن الحمد لله اقدر الحق
طبعا الدكتور يسويها بسبب مايبغى يشتت الطلاب خلال الشرح والخ…
طريقة الشرح : يشرح بطريقة اسطورية ورهيبة جدا تندمج معه خلال الشرح بطريقة رهيبة بسبب نبرة صوته اللي مستحيل تخليك تنام او تنعس
وكلاسه جدا جدا مرح والله وسعادة وماعمري طلعت من كلاسه الا انا فاهم , يستخدم سلايداته خاصة فيه وجميلة كانت بالنسبة ل 102 ومغطيه المنهج كاملا
الكويزات : نار نار نار ! حريييييقة انتبه , ترا الافرج غالبا يكون دمار مثلا 5 من 64 او شيء زي كذا
طبعا الدكتور بيضبطكم بالنهاية بسبب الافرج ولازم يرفع الجميع , لكن ثق ثقة كاملة لو ذاكرت كويس وفاهم مستحيل تنزل عن 40-50 بالدرجة وبتدخل الميجر وانت تضحك !
المياجر: كومن
الفاينلات : كومن
القريد النهائي: A+ مع مرتبة الشرف الاولى
الصوت : صوت مستحيل تنام منه , من يوم ماتسمعه يجيك شعور بالذنب بسبب عدم المذاكرة ! صوت اسطوري ويشرح عربي وانجليزي مكس
إضافات : الدكتور مره يرحب بالطالب بالاوفيس ومتعاون معه جدا , الكلاس حقنا كان MW لمدة ساعة وربع , كان يمر كأنه 10 دقايق بسبب الوناسة والفله والضحك
كل هذا الكلام والمصيبة اننا نطلع من الكلاس ونقدر نحل أي سؤال مدري كيف ههههههههههههههههههههههههههه
هذي هي ميزة طلاب الفريدان
بس نصيحة عابرة للي بيسجل عنده : لو قدرت تسجل عنده حاول يكون قبل الكلاس بريك او المبنى جدا جدا قريب مثلا من 4 الى 63 او 7 الى 6 وهكذا بسبب لو أخرك الدكتور اللي قبل ماتتورط
Math315-192
التحضير : اول كلاس يتعرف ع الطلاب والدكتور ماشاءالله خلال أول كلاسين او ثلاثه يحفظهم كلهم ويحضر بالنظر او احيانًا بالكشف , إذا بدأ الكلاس بالضبط يقفل الباب وإذا قفله م راح تدخل بعده إلا إذا انت كنت موجود من اول وسمح لك تطلع , لذلك التأخير ممنوع عنده
طريقة الشرح : يشرح من سلايدات مأخوذه من كتابه , اللي هو مرجع المادة والكتاب من تأليف الدكتور يتكلم عن مقتطفات من تاريخ العرب والمسلمين في الرياضيات , الشرح جميل ويحاول يبسط المعلومة قدر الإمكان
الكويزات : لا يوجد كويزات بالمادة
المياجر: كان في ميدتيرم , وبسبب جائحة كورونا كان أونلاين باستخدام WebAssign , مستواه من متوسط لصعب
الفاينلات : كذلك كان باستخدام WebAssign وأيضًا كان متوسط لصعب
القريد النهائي: A++++
الصوت: واضح جدًا
إضافات : طبعًا الدكتور هو الوحيد اللي يدرس هالمادة ومتمكن فيها ماشاءالله وتقريبًا تنزل ترم كل سنتين , المادة فيها بروجكت وكان تقييمه للبروجكت ممتاز إلى حد ما , الدكتور حبيب وأخلاقه حلوة ويحب يمزح دايم فلا تشيل بخاطرك عليه لو قرر يمزح معك , او عليك , في هذا الترم 192 تم ترقيته إلى رتبة أستاذ ( professor ) ونسأل الله له التوفيق , الدكتور حريص ع الفائدة واستضاف دكتور هولندي مع طلابه متخصصين في التاريخ الاسلامي وكان مرن في الدروس لانه اخر السمستر ضاق الوقت وقال القرار بيديكم اختاروا الدروس اللي حابين ناخذها وعرض علينا عدة خيارات , كلاسه ممتع وما كان متعب ابدًا خارج الكلاس
Math102 - Term (202 -online)
التحضير : الدكتور شديد بالتحضير جدا ، ياخذ التحضير عن طريق البلاك بورد أي احد يدخل بعد دقيقة من بداية الكلاس ليت واذا اكثر يلقم غياب
طريقة الشرح : يشرح عن طريق سلايداته وفيها اسئلة حلوة ويحل عليها في الون نوت وتقدر ترجع لا متى ماتبي وقبل الميد والفاينل يسوي رفيو يحل اسئلة اولد اقزامز
الكلاس تيست : اختبرنا 4 كلاس تيست وطبعا زي ماهو معروف عنها وصعوبتها وضيق الوقت فيها ففي الغالب الافرج يكون دمار فيرفعنا بالدرجات وصراحة فكرتها حلوة لأن ماراح يجي الميد او الفاينل الا وانت مخلص المتيريال من قبل وجاهز
الميد: كومن
الفاينل : كومن
القريد النهائي: A
الصوت : نبرة مميزة جداً وصراحة تخليك تركز معاه طوال وقت الكلاس
إضافات : من الايجابيات انه دائما متواجد في اوقات الاوفيس اور ومستعد يجاوبك ويشرح لك الي تبي سواء كونسبت أو يحل لك سؤال اولد اقزام او حتى تكلمه بموضوع يخصك اشوفه جدا متفهم ويساعدك باللي يقدر عليه وايضا فكرة الرفيو الي قبل الميد والفاينل جدا جميلة بحيث تكون مستعد وفاهم وتجي تحل معاه بالرفيو وراح تطلع بالشيء الي يرضيك من الميد والفاينل وايضا اسلوب شرحه مميز لدرجة بعض الاشياء ماتحتاج تراجعها من بعده لأن خلاص تكون فهمتها منه بالكلاس وراكزة بدماغك
من السلبيات في بعض الافكار عجزت افهمها من الدكتور يمكن بسبب الاونلاين ما أعرف وايضا ضيق وقت الكلاس تيست وفي بعض الاخطاء بالنوتات
ملاحظات : في الكلاس تيست الدكتور بس يرجع للفاينل انسر اذا اجابتك صح يناظر حلك اذا لا خلاص راحت عليك درجة السؤال ، طبعا الدكتور يحب المزح فيعني اذا ماتتقبل المزح لاتنزل عنده ، وبرضو اذا كان طموحك تنجح بالباس بس مايناسبك الدكتور للأمانة
ونسيت اضيف انه على الرغم انه مدة الكلاس ساعة وربع الا انك ماراح تحس بالملل