السلام عليكم ورحمة الله وبركاته
كل عام وأنتم بخير ( شهر 10 كله قضيناه تباريك ) . .
اليوم بعلمكم وش صار معي في موضوع الشركة الوطنية للأنظمة الميكانيكية ( NCMS )
كنت سبق وان سجلت بموقعهم بنهاية 2015 اعتقد . . والى يوم هذا الأربعاء ماجاني شيء !
بعدين قالي صاحبي كلمهم . . وكلمتهم وقالوا بنتصل عليك وبنشوف وش وضعك !
المهم ماهي الا دقائق الا وكلمني شخص : ( قال بكره موعد مقابلتك !!! ) - أنواع الخرشة - قلت يارجل خلها الاحد . . قال مافيه
قلت طيب طيب . . قال بنرسلك ( ايميل - ترسل فيه بعض المتطلبات - وتعبئ فورم صغير يحتوي على اسمك وعمرك وعنوانك و التحصيلي و القياس . . الخ ) - قلت هذا هو الفورم الغريب اللي الكل يسبه ههه - بس طلع فورم غير ! وارسلته لهم
المهم سجلت بمنتداكم ولو اني مو من اهل البترول . . بس علشان فيه كم شخص سوا مقابله وطرحها هنا . . وعطانا وش صار بالمقابله . .
ف ( كل شخص ساهم بمعلومه هنا - الله يجزاه كل خير ) . .
نرجع لموضوع المقابله . . المهم صرت اقرا عن أي شيء يخص الشركة . . وصحيت اليوم الثاني وقرات . . ورحت للشركة
الشركة - هي خلف نادي الشباب . . تماماً . .
اول مادخلت لقيت ترحيب مميز . . كانك داخل فندق ( خمس نجوم )
المهم كان موعدي 10 ونص - وماجات الا 10 ونص تقريبا الا ونادوني . .
رحت لهم لقيت ولد شاب . . محترم جداً . .
دخلني هو ثم دخل بعدها مهندس مصري . .
وصارت الاسئله كلها من المصري . . انا بالبدايه كنت متوتر لاني اعرف نطام الأجانب أنواع التحجير بس طلع اسئلتهم ودييييييه لاحد يقلق ابداً ابداً ابداً . .
الأسئلة - اسمك متى تخرجت وش تخصصك - وش سويت اول ماتخرجت - ثم قالي ليش حاب تدخل بشركتنا وتترك شركتك - ثم قال كيف الإنجليزي
قلت متوسط - قال وش تسوي بالعمل بالانجليزي ( طبعا تحدثت معه كنقاط بسيطة ) ثم قالي كيفك مع الاوتو كاد - قلت ماشئ معه . .
قالي ماعندك مشكله تشتغل بالخرج ( قلت قدام )
قالي تبي تشتغل في الصيانه او الإنتاج ( قلت الاثنين ماشئ فيها ولا فيه أي مشكله ) - نظام اللي بتاع كولوه ( وهذا هو سر قبول معظم الناس - مسئلة انك تقول لا وتعتع و تفكر مايبون هذا الشئ يبون اللي يوافق ويقول أي اوك قدام )
الأصعب سوال واللي حجرني عليه اللي هو ليش تبي تجي عندنا وتترك شركتك هنا حسيت انا طولنا فيها وانا ماحطيته بالحسبان طبعا الجواب لازم يكون دبلوماسي !!!
جلست تقريباً ( 15 د ) تزيد او تنقص بشئ بسيط - وين الناس اللي تقول 45 د و 1س وربع !!!!! علما ان العدد اللي كانوا معي بسييطين !
طلعت وقالوا الرد على الايميل ( من 3 أسابيع الى شهر ) - ثم قالي انتظر برا بعطيك نموذج تبعئه ( وأخيرا لقيت النموذج الخفي طلع على الدنيا ) !
طلعت الا ويجيني وعطاني النموذج و قلم - سئلته قلت له ترا كثيره هالمده . . قال هي كذا تأخذ اجرائات الخ
المهم ( النموذج نفس الفورم الأول تقريباً بس فيه ( الاسم الرباعي لامك وابوك و جنسياتهم ) وابوك - رقم الأحوال و مصدرها و تاريخ انتهائها
لذالك الكل يجيب بطاقة العائله وبطاقة أحوال الاب اخر تحديث !
عبيتها وأول م عطيت الرجال . . قلت له ليش انتم ماكلمتوني - لازم اكلمكم علشان تقولوا تعالوا
قالوا حن نقبل من 4 وفوق . . وناخذ الأعلى بالمعدلات !!!
علشان كذا ماخذناك . . ف الان وصل الى 3 و 75
المهم طلعت منهم و كعادة أصحاب الشركات و الموسسات . . يبتسمون بوجهك وماتدري ايش ردهم . .
وانا طلعت و كعادتي متفائل . . الرد بعد شهر باذن الله - مادري قبلوني او بيفرضون . . وخيره بكل الأمور . .
هذا كل اللي عندي - اللي حاب يكلم القبول هذا رقمهم ( 011 / 4891482 )
وهذا رقم الاستفسارات حقهم ( 011 / 4875362 )
أتمنى ماحد يكلمهم بقصد الازعاج و الاستهبال - هذا فقط للي عنده أي سوال واستسفار . .
ملخص السوالف الي فوق ( المقابله سهله جداً وتعاملهم جداً راقي - توقع أي سوال خاصا اللي بالسيفي ! - جب بطاقة العائله وابوك - تعال قبل الموعد - رسم والبس زين و حلق حلق حلق حلق حلق حلق حلق كانك رايح لزواجك - بالمقابله كل شيء موافق واعرف اسوي واعرف اضبط كل شيء خلك بتاع كولوه - حضر نفسك للاسئلة اقرا عن الشركة - واولاً التوفيق بيد الله وكل شيء من عند الله خير وبركه )
و سلامتكم ,
تكفون - ابي منكم الدعاء لاني كتبت لكم هالموضوع الرايق المزبرك تكفووون
* سبحانك اللهم وبحمدك اشهد ان لا اله الا انت استغفرك واتوب اليك *