صراحة كنت اتابع المنتدى من زمان سجلت علشان موضوعك وابي الفايده قبل لا اجري المقابلة ولكن ماجاني التفعيل الا بعد ما انتهيت من المقابلة ,بما اني اجريتها راح اذكر تجربتي وعندي كم سؤال
انا خريج دبلوم ميكانيكا وقدمت على الشركة بداية السنة تقريبًا في 19/1/2016
جاني اتصال منهم قبل اسبوع قالوا مقابلتك بعد يومين واذا انت من خارج الرياض احجز تذكرة طيران وبنعوضك بقيمتها
بالفعل بحكم اني من الظهران حجزت ورحت اجريت المقابلة بالبداية عند الامن اسمي موجود اخذت بطاقة زائر وقالي روح الدور السادس
رحت لقيت 2 قدامي ينتظرون دورهم وجلست معهم طلع من المكتب نفس الشخص اللي كلمني وسألني عن اسمي وموعد المقابلة ودخل
خلصوا اللي قدامي وجاء دوري قالي تفضل دخلت المكتب وجلست وكان اللي يجري المقابلة نفسه الشخص اللي كلمني وشخص اخر صراحة ما قالوا لي عن منصبهم او مسمياتهم ولا سألت
اجريت المقابلة كانت نص الأسئلة معبيها بالفورم لكن سئلوني عنها وجاوبت طبعاً معلومات شخصية :
إسمك ؟
كم عمرك؟
أبوك وين يشتغل؟
كم عدد اخوانك وترتيبك بينهم؟
نتيجتك بالقياس والتحصيلي؟
تخصصك؟ وين كنت تدرس؟
ثم أسئلة عامة :
ليش اخترت التخصص؟
كيفك بالانجليزي؟ والحاسب؟
وين كنت تشتغل قبل وكم خبرتك وليه تركت العمل؟
نقاط قوتك؟
نقاط ضعفك؟
وش هواياتك؟
هل سبق واخذت دورات؟
لو خيرت تشتغل بالوسطى او الغربية وين تختار؟
تقريباً هذا كل شيء استغرقت ربع ساعة المقابلة
وقالي هذي هي المقابلة الشخصية اذا اجتزتها راح نبلغك عن طريق الايميل علشان تجري المقابلة الثانية اللي هي في التخصص.
وسألتهم عن الموعد قال يطول قلت كم يعني شهر؟ قال تقريباً
سؤالي بما انه قدامي شهر ابي اجهز نفسي للمقابلة الجايه ومتفائل اني بعدي المقابلة المبدئية لاني اديت بشكل جيد
وش تنصح بحكم خبرتك يعني اذاكر من مناهج اللي درستها او ادرس الميكانيكا بشكل عام والقوانين وما الى ذلك , بحكم اني تخصصي كان اغلبه عملي؟
أبداً ما سألوني عن الشركة وإيش تعرف عنها , وانا صراحة كنت متخوف من السؤال هذا لاني ما اعرف عنها شيء اذا فيه معلومات يحتاج اعرفها ياليت تخبرني يمكن يسألوني في المقابلة الثانية؟
وهل تتوقع راح يكون فيه قبول فنيين بشكل كبير يعني مدري سمعت انه عندهم مشاريع ومحتاجين موظفين؟
نصائح أخرى تحب تقولها لي؟
سلام عليكم كيف حالك وكيف امورك انشالله بخير حبيت اعرف عن الاسالة التكنيكال الي جتك الله يعافيك لان عندي مقابلة يوم الاثنين واحس نفسي شوي ضايع يعطيك العافية
