السلام عليكم ورحمة الله وبركاته
جاني اتصال من الشركة السعودية للانظمة الميكانيكية تقريباً على بداية السنة . ثم بحثت عنهم بجوجل وطلع لي موضوع يتكلم عن الشركة في منتداكم وفادني ببعض النقاط ومع اني خريج جامعة ثانية ولكن كرد للجميل لازم اذكر تجربتي معهم
بالبداية انا فريش وماعندي خبرة وزي ماذكرت جاني اتصال لتحديد موعد مقابلة في المركز الرئيسي للشركة . استقبلوني قسم الـHR بكل احترافية ومما عطاني راحة .
ثم دخلت المقابلة وكانت الحقيقة اصعب من ماتخيلتها . طبعاً دخلت مقابلة مع شركات ثانية اجنبية وكانت اصعب بكثير من هذي الشركة ولكن فقط ماتوقعتها منهم .
كان بالمقابلة وقتها 4 مدراء اقسام وكان هذا الشي مايصير بالغالب زي ماعرفت من الشباب اللي اشتغلت معهم فلذلك ممكن كان هذا حظي .
الحمدلله كنت واثق من نفسي ومهاراتي وكثرة المقابلات الشخصية علمتني كيف ما افقد نفسي وتركيزي .
كانت الصعوبة فقط بجلوس مدراء الاقسام المحترمين قدامي بس ناقص الCEO ههههه . (وهذا الشي ما يصير عندهم كثير زي ماسمعت من زملاء العمل)
الاسئلة كانت زي اكثر الشركات بالبداية عرف عن نفسك وخلوني اخذ راحتي واجد لدرجة باخرها حسيت ان ماعندي شي ثاني اقوله وهم ينتظرون اكثر فهذا الشي سبب لي قلق بوقتها .
ثم بداً الاسئلة المعروفة مثل وش تعرف عننا وهل عندك تصور عن الشركة مسبقاً وهل تتوقع انك قد توقعاتنا . وبعدها وشي هوايتك المفضلة وهذا السؤال اللي مالقيت له جواب الحقيقة لانه ببساطة غير متوقع .
ثم بدأ التدقيق على السجل الاكاديمي وش هذي المادة وش تتكلم عنه وكيف تستفيد منها في الحياة العملية برأيك . اخذوا 3 مواد فقط
ثم سألوني عن الجامعة ككل وكيف كان تصورك عنها .(اول شركة اقابلها بحياتي دققت بالترانسكريبت)
ثم بدأت الاسئلة التقنية والحقيقة ماكانت اسئلة صعبة ولا سهلة ولكن من حسن حظي اني كنت على اطلاع عنها . وهذا الشي غير نبرة صوتهم وتفاعلهم وخلاهم يتحمسون وحمسني هذا اكثر وعطاني ثقة . ثم اعطاني مدير اخر كذا سؤال . وبعدها سألني الـHR عن اكثر من نقطة قلتها بخصوص كيف كنت اكره نظام التعليم في جامعتنا (نقطة زليت فيها ولكن رقعتها) وقال وش كان دورك في تغيير هالشي . والحمدلله كانت ثقتي في نفسي وشهادتي ودرجاتي كفيل انها تعدي هذا السؤال بكل سهولة .
ثم انتهت المقابلة اللي استغرقت حدود 35 دقيقة وقالوا بنرد عليك خلال 3 اسابيع . وبالفعل 3 اسابيع ارسلوا لي العرض الوظيفي بالايميل ولا ادري هل بالامكان اذكره او لا لاني ما اتذكر هل انا موقع على عدم ذكر الراتب بالعقد او لا ولكن كان الاساسي بحدود 9500-11500 ريال ( ممكن الحد الاعلى او الادني او بينها) بدون البدالات واللي وهي 30% مجموعها . والحمدلله وكان الراتب اعلى من اللي جاني من الالكترونيات المتقدمة والعلاوة السنوية 4-8% ويعتبر مع نفس الخط اللي ماشية عليه نخبة الشركات مثل سابك و غيرها والحمدلله .
طبعاً وفقت على العرض وبدون مفاوضة . وقالوا لي تنتهي الprocess الخاصة فينا بحدود ال4-6 شهور وبعدها بنتصل عليك اذا كنت موضف تستقيل او اذا كنت فريش تستعد . وانا كنت فريش .
المهم مر 6 شهور وشوي وجاني اتصال منهم ان قدم استقالتك لو كنت موضف ولكن كنت فريش فقالوا تعال الاسبوع الجاي . جيت وعطوني ورقة للفحص الطبي وكان فحص سكر و hiv و التهاب الكبد الفيروسي واعتقد فحص مخدرات ومعها xray للصدر . وورقة ثانية ما ابي اذكرها طلبوا مني اخلصها خلال الاسبوع. ثم اتصلوا علي بعد اسبوع وقالوا تعال وقع العقد والعمل بيكون بنفس يوم توقيع العقد .
وقعت العقد ولله الحمد وباشرت عملي بالمنشأة من ذلك اليوم . ومر على توظفي فترة معتبرة .
أتمنى ان اكون وفقت بذكر كامل التفاصيل اللي تهم اي شخص عنده مقابلة مع الشركة .
واللي عنده استفسار ياليت يكتبه هنا او على الخاص اذا يسر الله ودخلت المنتدى برد عليه
والسلام عليكم ورحمة الله وبركاته