السلام عليكم ورحمة الله وبركاته،
وصلتني رسالة عن طريق LinkedIn من مدير التوظيف في شركات نسما، وقالي اذا انت مهتم ارسل السي في حقك. عموما ارسلت له السيفي وبعدها اتصل علي وشرحلي البوزيشين الموجود عندهم و كيف طبيعة العمل.
طبعا البوزيشين هو MWD Engineer.
measurement while drilling engineer
وطبعا وظيفة هذا المهندس هو توجيه الحفارين تقنيا، ما عندي معلومات كافية ولكن اللي فهمته ان الحفر يكون على اتجاه مائل و انت بهالوظيفة راح توجه الحفار كيف يحفر الى المكان المطلوب. طبعا هالطريقة على كلامهم ترفع كفاءة الانتاج وتزيد الربح.
عموما العمل راح يكون ٦ اسابيع دوام في رق لمدة ١٢ ساعه و ترجع ٣ اسابيع وتكون on call. او شهر تداوم ١٢ ساعه و ترجع اسبوعين. عموما انا وافقت على مقابلتهم الاولى وبعدها سويت مقابله ثانيه يوم الاربعاء ٢٥ اوقست.
المقابله كانت حبية جدا جدا جدا
سألوني عن:
هواياتي
هل انا مهتم وليش؟ بال oil and gas industry
سألوني عن البوزيشين هل اعرف عنه شي
سألوني عن الشركة نفسها
سألوني عن نقاط القوة ونقاط الضعف و مشروع التخرج والتدريب.
ما سألو اي سؤال تيكنيكال.
مع العلم ان صاحبي ميكانيكال و سألوه عن قانون اوم و واليونيت حق الكرنت و الريسيستانس.
الوظيفة على كلامهم بتكون متعبة وللحين ما جاني رد منهم ولكن حبيت اطرح تجربتي بالمنتدى للفائدة.
طبعا انا سألوني ٣ مرات عن الراتب المتوقع و ممكن كنت طماع شوي ولكن قارنتها في ارامكو و شلمبرجير و قلتلهم هالبوزيشين فل بكج المفروض يكون بين ١٦ الف الى ٢٠ الف.
صاحبي وهو طالع قالوله لو نعطيك ٩ الاف توافق؟ ما ادري صراحة ايش وضعهم لان اول مره يسوون مقابلات لحاملين باكالريوس، عادةً يسوون حق الدبلوم على كلامهم فقط.
شكرا لكم، واذا عندكم اي اسأله انا حاضر.