اخواني انا حبيت استشيركم لاني محتار واحتاج احد يساعدني
انا متخرج في مايو ٢٠١٧ هندسه كهربائية من امريكا… وحضرت تقريبا مقابلتين ولكن ما جاني منهم رد… ارسلت ايميل لشركة بارسون قبل اسبوعين وقالو ان المقابلات حتكون خلال هاذي الاسبوعين امس جاني ايميل منهم. لتحديد مواعيد المقابلات ولكن انا محتار احضر او لا… وكاتبلي في الايميل انه العرض ٧٣٠٠ بيسك و٢٥٠٠ بدل سكن (مشروع جازان)… وحسيت انهم ماهم بروفيشنال وانه الشغله سعوده… وانا مابغى سعوده ابغى خبره…وبرضو ماعندي فكرة عن طبيعة عمل المهندس الكهربائي في هادي الشركة ممكن تفيدوني بطبيعة العمل في بارسون… ايش مميزات الشركة وايش عيوبها …مع العلم انه انا حاب انه اشتغل في مصنع وابغى ابدأ خبرتي في مصنع … بكرا عندي اختبار الخطوط السعوديه لوظيفة مضيف جوي فمحتار ايش اختار…
وعليكم السلام , احضر المقابلة وحاول تستعد لها صح . ما اعتقد انها سعودة لأن الراتب الي عارضينه نوعا ما جيد تقريبا 9500 , لو سعودة كان عرضوا عليك 5000 - 4000 وفي شركات كثيرة تسوي هالشي . , الشي الثاني فترة التجربة على ما اعتقد مدتها 3 اشهر فيعني لو ماعجبك الوضع تقدر تطلع منها .
وبخصوص وظيفة مضيف جوي , صحيح الوظائف قليلة هالفترة لكن حرام تظلم نفسك بوظيفة برا تخصصك زيادة على هالشي راتبها ضعيف مقارنة براتب Parsons .
لو انا منك , اروح اختبار بكرة واستعد له لكن في المستقبل لو جاني عرض من بارسونز و الخطوط , اختار بارسونز حتى لو ماكنت مقتنع حيل بالراتب , ممكن يكون مسؤول التوظيف الي بيتواصل معاك متعاون وتقدر تتفاوض على الراتب .
الله يوفقك ولاتشيل هم , اهم شي استعد لإختبار بكرة و لا تتوتر , وبعدها استعد لمقابلة بارسونز .
مب شرط ان المقابلة مش بروفشنل ان الموضوع سعودة لكن ممكن المشروع بيبدأ قريب ويحتاجون عدد كبير(مترو الرياض اول ما بدأ التوظيف فوري عبر الايميل من دون حتى مكالمة تليفون). عموما بارسونز شركة كبيرة وهي استشاري الهيئة الملكية بينبع(مثل بكتل بالجبيل) وحتى لو كانت الوظيفة سعودة فيمديك تستفيد اذا بادرت وأفضل من العطالة. أنت الان اقبل دام الراتب جيد واذا حصلت فرصة اخرى استقيل. عصفور باليد ولا عشرة عالشجرة.
الراتب في الظروف الحالية يعتبر ممتاز جدا… مثلا شركات مثل SEL رواتب اقل من بارسونز وواضح انها تبغاك سعودة لكن حسب ماسمعت انهم يكرفوك واحيان تكون في الموقع لحالك حتى لو انك فريش… لكن تستغرب من طريقة التوظيف عندهم … مقابلة تلفونية + اختبار + مقابلة فيس-تو-فيس تكنكال و HR …!!
امس اتصل علي واحد من لارسن اند تبرو من بدري حددلي الراتب من 5 الى 7 الاف وقالي اخلي المنجريسوي معك مقابلة بسيطة بالتلفون وبعدها نرسلك عرض بالايميل مايحتاج تجي ؟؟!! هذا واضح انه سعودة بس ماتدري هل بتستفيد او لا …
المقصد انه حتى لو سعودة افضل من الجلسة بدون عمل وممكن بالراتب البسيط هذا اللي تاخذه تحاول تاخذ دورات وتطور نفسك بعيدا عن العمل أفضل من الجلسة بلا عمل …