ME427-222
التحضير : ما يحضر ولكن اذا شاف العدد قليل بالكلاس ( اقل من ١٨ من ٢٥ ) يعطي بوب كويز وبعضها تكون فل مارك مجرد انك حضرت. يكره كثرة الغيابات وعدم التفاعل والمشاركة بالكلاس. احيانا قليلة يوزع ورقة تكتبون اساميكم والايديات فيها. يكره التأخير والعادة اي طالب يجي بعد عشرة دقايق او اقل ( خمس دقايق) يمنعه من دخول الكلاس ولكن مشى كثيرين ببداية الترم وقريب الميد صار صارم بذا النقطة .
طريقة الشرح : شرح مرتب وممتاز جدا ينقل نوتاته على السبورة ويبغاك تتابع معاه وتكتب معاه وتسجل النقاط المهمة. يوجه اسئلة بعض الطلاب والكلاس بعض الاحيان عشان ينعش الكلاس وبعض الاحيان للفائدة ويزعل لما يشوف ان ما فيه تفاعل.
الكويزات : عادته يعطي كويزين او ثلاثة بالترم والباقي بوب كويزز. احرص تفللها سهلة و عليها 15% ويجيب افكار مشابهة للواجب و النوتة. البوب كويزز سياسته فيها تتغير حسب موقفه من دفعتكم. الدفعة اللي سبقتنا قال لهم انها بونص. حنا كان زعلان من سوء الحضور والتفاعل فخلاها تحسب بثلث درجة الكويزات.
المياجر: ميد و كان صعب على عكس الاترام السابقة مليان اسئلة نظرية و رسم و مسائل مسألتين منهم تأخذ وقت طويل بالحل. ما فيه فورملاشيت بالاختبارات فتحتاج تحفظ القوانين وهذي الصعوبة الكبرى. يدف بالتصحيح وكريم جدا جدا بأنه يتغاضى اخطاءك. ممكن يكون عندك بالسؤال ٣-٥ اخطاء متنوعة ( حسابية، كونسبت…) ويخصم عليك بس 0.5
الفاينلات : جاب فاينل تقريبا نسخ لصق حق 202 وما نعرف درجاتنا بحكم انه نزل القريدات بدون يحط الدرجات.
القريد النهائي: A++++++++++
الصوت: واضح
إضافات : الدكتور كان معانا قاسي شوية بالميدتيرم و القريدات مقارنه بالاترام السابقة بسبب كثرة الغياب والمواقف اللي صارت من الطلاب معاه ولا يلام على ذا الشيء لانه كان واضح معانا من بداية الترم بأيش يتوقع مننا وايش يمنع بكلاسه. ومع ذلك حاول ينشط الطلاب ببونص 2% للطلاب اللي يسوون برزنتيشن عن سؤال نظري جانا بواجب سبق و حليناه! هذا كان بعد الميد ولما شاف طلاب كثر يبغون يعوضون وبالنهاية ٩ طلاب من ٥٠ ( سكشنين) سووا البرزنتيشن.
الدكتور عنده قائمة ممنوعات منها الشورت ورجل على رجل والتأخير و تسليم الواجب بعد الكلاس و الجوال و حتى الايبادات.
الدكتور زي ما ذكرت يكره التأخير و يمنع الطلاب من الدخول وهو يوضح ذا الشيء من اول مره ولكن للاسف الطلاب ما تفهموا عليه وصارت تحصل مواقف انهم يحاولوا يدخلوا بعد ربع ساعه ويزعلوا الدكتور.
تسليم الواجبات عند الدكتور بالكلاس اول ما يدخل راح يقولكم سلموا الان واللي ما يسلم خلاص راحت عليه. للاسف ان بعض الشباب كان يدخل الكلاس وهو لسى جالس يحل بالواجب ومع ذلك الدكتور مشاها مره ولكن للاسف الحركة تكررت من نفس الطالب وغيره وذا الشيء خلى الدكتور ينتقد اللامبالاة بدفعتنا.
الواجبات يصححها قريدر( طالب دكتوراه او ماستر) واذا لقيتها برا مكتب الدكتور فاعرف انه يمديك تاخذها وتشوف درجتك واذا حاب تحتفظ بها. الدكتور ما ينزل الدرجات بالبلاكبورد. الشيء الوحيد اللي بتشوفه بالبلاكبورد قريدك يمكن (سواها مع الدفعه اللي قبلنا) حنا نزل لنا القريد على طول في الترانسكربت.
بالنسبة للايبادات كان الدكتور سامح بها ولكن انا غبت عن محاضرة وبعدها لما حضرت طلبنا نشيلها وكان يقول “انتوا خنتوا الامانة” مدري اذا كان صاد احد غاش ببوب كويز او انه يقصد ان فيه طلاب سجلوا الكلاس لانه جاء بعدها بفترة وقال انه ممنوع تسجلون صوت.
الدكتور يبغاك ويحاول يحفزك تجيب ورقة وقلم وتتابع معاه ويمكن يعلق عليك لو جيت بدونها.
بروجكت المادة كان ثقيل ولكن مفيد وممتع بصراحة. و لكن الدكتور بداه متأخر مع دفعتنا وذا الشيء اثر سلبا على البروجكت. ولكن انا متأكد انه كان كريم بدرجاته لان قريدي كان عالي رغم ان شغل مجموعتنا سيء. الشغل مقسم كل جزء على طالب والدكتور طريقته رهيبه بالبروجكت يشيك معاكم كل كلاس او كم كلاس على البروقرس حقكم واذا ارقامكم ونتايجكم منطقية. ويشرح زيادة فيه و يحاول يوصلكم للفكرة والطريقة الصحيحة. الى الان من افضل المشاريع اللي مرت علي من ناحية طريقة التنفيذ و المتابعة. ولكن زي ما وضحت ضيق الوقت اثر.
القريدات عند الدكتور ستاندرد
90 A+
A 85
وهكذا ( خمس درجات بين كل قريد والثاني)
بروفسور عمرو القطب بصراحة افضل دكتور مر علي من ناحية شرح وحتى مفاهيم كورسات ثانية مثل المشين ديزاين يشرحها بامتياز. لو فيه كورس ثاني اقدر اسجله عنده لسجلته.
الله يطول بعمره ويجزاه خير
