السلام عليكم و رحمة الله و بركاته … 
أولاً أهنيكم بقرب الإجازة 
يا عسى أيامها فرح و سعادة للجميع
ما يخفى عليكم ان الطالب من بداية السمستر ممكن تطوف عليه دروس ما هو فاهمها أو ما هو مستوعبها صح. و ما يخفى عليكم ان البعض منّا عنده كوزات أو هومووركات أو حتى اختبارات بعد الإجازة <<< مثلي 
فالإجازة هذي تعتبر أفضل فرصة لتسنيع العمر 
لكن المشكلة هي ان الواحد تنسدّ نفسه عن المذاكرة في بيته و مع اهله. و هذي المشكلة كنت أواجهها شخصياً. حتى أغلب اللي أعرفهم قالوا لي نفس الشي.
كنت أحرص أجيب كتبي كلها للبيت <<< طبعاً مع السيلابوس 
و اول ما ابدأ بالمذاكرة أحس بكسل و بطفش, و في النهاية اسحب عليها
. . . . . . . . . . . . . . . . . . . . . . .
فهذي بعض الخطوات اللي بإذن الله بتساعدك في حلّ هالمشكلة. و الحمد لله نجحت معي نجاح باهر
1**) التهيئة النفسية: -**
و هذي قبل بداية الإجازة. يعني تحط في بالك انك راح تذاكر في الاجازة. طبعاً يحق لك تريح يومين أو ثلاثة في بداية الاجازة (اذا ما كان يأثر عليك من ناحية ضيق الوقت).
و كحافز لك تخيل الفرق اللي بيصير بعد إنجازك للي عليك, و بنفس الوقت فكّر بالعواقب اللي ممكن تصير لو انتهت الاجازة و انت ما سوّيت شي.
2) تضبيط الجدول:-
ضبط جدول للمذاكرة ( على ورقة) و رتّبه بحسب الأولويات. مثلاً المادة اللي إختبارها بعد الاجازة لها الأولوية أكيد. ثم ابدأ بالتدرج بالأولويات حسب ما تشوفه بنفسك.
3) لا تذاكر في غرفة نومك:-
حاول تذاكر في غرفة ثانية هادية ( مجلس الرجال مثلاً) و لا تدخل فيها أي وسيلة من وسائل الترفيه.
4) إذا ملّيت من مذاكرة مادة:-
إذا ملّيت من مادة حوّل على مادة غيرها.
أو اطمر التشابتر اللي تذاكره و روح للي بعده (اذا ما كان مبنيّ على التشابتر اللي قبله) و هذي الطريقتين حلوتين و تنفع حتى في أيام الدراسة بالجامعة.
5) لا تنسى نفسك :-
ما أقول لازم يكون يومك كله مذاكرة. لا تنسى انها إجازة و لك حق فيها. فخصص وقت لأهلك و لاخوياك و لنفسك حتّى. بس لازم تكون حازم مع نفسك يعني لا تخلي الفلّة تاخذ حقها و حق المذاكرة معها. و خصص بين كل ساعة و ساعة بريك ما يتعدّى ال 10 دقايق.
. . . . . . . . . . . . . . . . . . . . . . . . . .
*) المذاكرة في الصباح الباكر اعتبرها أفضل وقت للمذاكرة فحاول انك تستغل هالفترة. و كإقتراح يُفضّل انك تنظّم يومك كالآتي:-
بعد صلاة الفجر افطر, ثم إبدأ بالمذاكرة إلى الظهر (طبعاً مو متواصلة البريكات لا بد منها). بعد الظهر تتغدّى ثم تقيّل. بعد صلاة العصر جلّس مع اهلّك شوي ثم كمل المذاكرة,بعد المغرب حاول تخلّص اللي عليك. بعد صلاة العشاء, الوقت كلّه لك كافئ نفسك به 
إلا اذا انت متأخر في المذاكرة فخلّص اللي باقي عليك ثم فلّ والديها
و حاول انك ما تسهر كثير لأن السهر بيخرّب عليك جدولك.
. . . . . . . . . . . . . . . . . . . . . . . . . .
هذا ما لديّ
و اللي عنده إضافة رجاء لا يبخل علينا بها 
وفق الله الجميع
لكن … تتسهل ان شاء الله في وقتها …
