السلام عليكم
شباب عندي مقابلة مع شركة سكيكو - القطاع الشرقي
مع قسم أتوقع اسمه هندسة تكاليف النقل
ياليت إلي عنده معلومات عن القسم يزودنا بها و كذلك ما هي الأسئلة المتوقعة لي ؟
شكراً لكم
السؤال هذا صعب احد يجاوب عليه
لانه يعتمد على الشخص نفسه
واللي يسوي المقابلة كل فترة يتغير
انا تو مسوي مقابلة مع مدير قسم النقل
كانت الأسئلة بسيطة و أغلبها سوالف و شرح عن الشركة و طبيعة العمل
مثل ما قال مبدع
يعتمد على الشخص اللي بيقابلك
والصراحة القسم ما عندي معلومات عنها
بالنسبة لي سويت المقابلة مرتين مع قسمين مختلفين بالرياض
الاول مهندس كهرباء قابلني وهو كبير وشكله متخرج من جامعة الملك سعود
قام يسألني أسئلة دقيقة بمادة ليفل 4 اخذتها قبل سنة ويقولي ارسم الشي الفلاني وكم الفولت باعمدة الكهرب بالطرق وكم اعلى فولت سويتوه عندكم باللاب!
ما عرفت اسئلته من صعوبتها او مالها علاقة بفهم التخصص وقلت له ارسم اللي تقوله واشرح لك وش فايدتها لاني اذا شفت الرسمة بتنتعش ذاكرتي وبذكر هالشي الفلاني
قالي لا ما يصير تسمي نفسك مهندس !
حطمني كلامه وأشر براسه فهمت ان قصده منب راضي عنك وما راح اقبلك !
وتعقدت من بعدها وقمت اراجع المعلومات بالنت وبالكتب
بس فكرت فيها وقلت هو قاعد يسألني أسئلة هو عارفها ويقارن نفسه ابو خبرة فوق 20 سنة بواحد توه متخرج ومو متعاون معاي بالاسئلة !
المقابلة الثانية سويتها بقسم ثاني مع مهندس كهرباء بعد
فتح الكروكليوم حقي ودقق فيها وقرا وطلع لي فيها ملاحظات وبعدها سألته وقلت انت متخرج من جامعة البترول ؟
قالي ايه
وقام يسألني أسئلة كثيرة عن التخصص ويمشي على حبة حبة ومتعاون جدا معاي
سألني عن الكونترول بالبداية ثم مشى على الالكترونيات وبعدها البور واخيرا البروتكشن ويرسم لي على ورقة ويكتب لي حتى اللي ما اعرفها يشرحها لي ويكتبها لي بورقة اللي عطانياها بالاخير
اللي جذب انتباهه بالكروكليوم حقي مادة SE 307 Engineering Economic Analysis
وسألني عنها كثيرة وقالي ممتاز انك اخذتها وانا درستها بالماستر تذكر القانون حقها ؟ الحمدلله كنت أذكره
وقالي كلام مهم يثبت خطأ المهندس الاول اللي قابلني
يقول انا كنت مثلك ما اعرف كثير عن التخصص وسوق العمل
وطالب البترول اول ما يتخرج ما يعرف يربط بين التخصص وسوق العمل حتى تخصصه يكون مو فاهمه كويس
لكن يعرف كيف يسوي حسابات وكيف يبحث عن المعلومة ويتعلم بسرعة ويربط المعلومة بسوق العمل عكس طلاب جامعة الملك سعود وعبدالعزيز مع احترامي لهم "كلمة مع احترامي هو قايلها موب انا 
"
أتمنى انك عرفت شي من قصتي مع الشركة وباختصار انا ملاحظ انهم بكل المقابلتين يدققون على البروتكشن والبور راجع معلوماتك عنها واعرف كيف تنتج الطاقة من المحطة الى البيوت
بالتوفيق 
النقل يسئلوك في الترانزمشن والباور ستيشن والبروتكشن والمحولات والماشين
طبعا سيركت 1 & 2 لازم يسئلوك فيها
طبعا توقع كل الأسئلة الي لها علاقة بالنقل زي مثلا يقلك ليش تسمع صوت وانت قاعد تحت الاوفر هيد لاين , مثل هذي الاسئلة
قلي تفاصيل منهو شفت واي قسم وانا ابحث لك عن مستقبله وكل شي لاني ماكل تبن وياهم وبقدم استقاله بعد شهر
اذا تبي شي قبل مامشي ابشر
موفقيين
أشكركم كثيراً أخواني على المعلومات المفيدة
والله يوفقكم جميعاً ،وبإذن الله سأكتب عن ما سيحدث في المقابلة
أخي Web Developer
راجع الخاص من فضلك