أبحكيلكم الوضع بالضبط من البداية الييين ما توني طلعت من الدفاع المدني…
أولاً: أنا محمد الخميسي 26 تخصصي ماركتنق و ساكن فـ 18
و كانت الالنترا أول سيارة أملكها و لا أمداها ( الحمدلله على كل حال) تكمل سنتها الأولى معي.
حالة السيارة الميكانيكية: توها جديده أقل من سبعه أشهر و ماشية أربعين ألف و توي قبل يومين يوم السبت الي فات بالتحديد مسوي لها صيانة كاملة و مغير لها البواجي و و فلاتر و الزيت و كلش في السليم بعدين غسلتها بستم يوم السبت نفس اليوم و طلعتها مزه و أنتيكه و في السليم.
الزبدة:
كنت برا و رجعت للجامعة أنا و خويي و وقفت في مواقف الأدوار الدور الثالث و نزلنا من السيارة أنا و اياه و السيارة ما فيها أبداً أي أصوات أو ريحة أو أي شي غريب فيها أبدا أو ممكن يكون سبب محتمل لأي عطل…
المهم…
دخلت الغرفة و جلست فيها حوالي النص ساعه الا و الأمن يطق الباب بقوة رهيبة خرشتني قمت و فتحت الا و هو يقولي: أنت محمد الخميّس؟
قلت: أنا محمد الخميسي سم!
قالي: ممكن تتفضل معي
قلت: عسى ما شر و شسالفة ؟!!
قالي: انت راعي الانترا أبيض واقف في مواقف المظلله؟
قلت: ايه
قالي: (سيارتك احترقـــت)!!!!!!!!! كذا بكل طحن و بدون أي مقدمات
قلت: ايش من حرق المواقف فين السيارة اش الي صاير يبوي و انصدمت صدمة فظيعه
قمت أجري رايح للمواقف و هو يلحقني و أنا أقول ف نفسي يا ربي يكون الموضوع حلم أو شي بالغلط أو أي شي
الا قربت من المواقف و ألاقي سيارات الأمن و شاحنة المطافي و زحمة سيارات و أمة برا المواقف
و أرقى الدرج و أقرب من السيارة آآآآآآآآآآآه الا والله ريحة الحريق و البنزين معبية المكان و عج و دخان و بودرة طفايات و مويات بكل مكان و سيارتي اللي تركتها قبل شوي وجهها متفحم و الكبوت منفجر و الموية بكل مكان و قلت لاااا إله الا الله انا لله و انا اليه راجعون الحمدلله على كل حال يارب و أنا حاط ايدي على راسي
الزبدة من هول الموقف ما شالتني رجولي قعدت عالرصيف قدام السيارة لسا مو مستوعب و اش اللي حاصل
الا و الرائد حق الدفاع المدني أسمعه يناديني ويقولي انت صاحب السيارة و أنا أسمعه زي الصدى في الحلم
و الموجودين هم:
مدير الأمن و السلامة المغامس و دوريات و رجال الأمن و عسكر الدفاع المدني و الرائد اللي بالموقع …
سألوني و اش اللي حصل و اش تتوقع السبب
قلت أكيد موب جناية
قالي السيارة فيها اي شي قبل
قلت: توي مطلعها من الصيانه
_________________________________________
المهم اللي صار كما اكتملت لي القصة من رجال الأمن و الدفاع المدني و شهود العيان كالتالي:
فيه واحد شاف السيارة يطلع منها نار تقريبا حول الساعه اثنين الليل و بلغ الأمن
و حاول الله يجزاه خير هو و من معه يطفون السياره بطفايات الحريق بعدها جو الأمن في الوقت اللي ممكن كان فيه تدارك جزء من السياره لمنعها من التلف كلياً و لمنع تضرر السيارة الفورد المجاورة…
لكن…
يوم قاموا يبون يطفون السيارة بالهوز حق الموية من صندوق الحريق اللي قريب من المصعد و اسحبوا الهوز ( ما لقوا فيه موية تصب) !!!!!!!!!!
قاموا يحاولون يستخدمون صندوق الحريق الثاني اللي بالأسفل و نفس الحكاية ما فيه موية…
قاموا يبون يطفون الحريق بالطفايات اللي عالجدران موجوده و يوم استخدموها لقها ( بودرة) ما تنفع!!!
قاموا الله يوفقهم و يجزاهم كل خير بجهودهم الشخصية هم و اللي معهم من الشباب يجيبون طفايات حريق ماء من العماير المجاورة و تداركوا الوضع على بال ما استطاع الدفاع المدني يشقحون الوايت حق الموية من ورا مبنى المواقف و رموا اللي من فوق السور و طفوا الحريق اللي بسيارتي و السيارة المجاورة الفورد
___________________________________________
سبب الحريق:
جاري التحقيق في ذلك و يعتقد بأنه ماس كهربائي أو أي سبب آخر محتمل
و استبعاد أي تسرب أو ليك من السيارة أو من زيوتها أو من وقودها
و في احدى الصور واضح سيل سايل يجري تحت السيارة هذا من موية الطفايات و ليس من السيارة
_____________________________________________
الأضرار:
سيارتي الالنترا تدمرت و تلفت مكينتها و مقدمتها كلياً
الفورد المجاور تضرر الجنب الايمن منه الباب احترقت بويته و المرايه و القزاز و مقبض الباب الداخلي و الخارجي و الزيق الزينه الأسفل.
سيارتي غير قابلة للتحرك لأن المكينة طايحة و مايعة قطعها عالارض بوسط المقدمة = صعب جداً جداً على الونش او السطحة نقلها مع العلم بأن تانكي البنزين لسا فل و ريحة البنزين موجوده و سبب محتمل للمشاكل أثناء محاولة النقل.
_________________________________________
اش اللي سويته أنا الى الحين:
رحت للدفاع المدني الصباح أنا و عبدالرحمن الهويدي 26 كيميكال انجنيرنق ( راعي الفورد)
و أعطونا خطابات للمرور بشأن إسقاط مركبتي لتلفها و بيعها ع التشليح و ورقة إصلاح للهويدي
الهويدي الله يجزاه خير عني تنازل بكل نبل عن حقه تجاهي بالسيارة
رجعت للجامعه لأني كنت أبي أقابل مدير الجامعه شخصيا و أحكيله اللي صار و أقوله:
انا اللي انحرقت سيارتي و أطلب العوض من الله سبحانه و يجيرني في مصيبتي خير لكن أوضاعي المادية كطالب ما تسمحلي و لا تغطي لي حتى حق سيارة المسكين اللي تضرر من الحريق جمب سيارتي,
و أنا أعتبر جامعة الملك فهد للبترول و االمعادن كبيتي الثاني و جامعتي اللي اعتز فيها و افتخر فيها و والله ما يرضيني ان هذا يصير باي احد من الطلاب كلهم
ولكن هذا اللي صار و كان من الممكن تفادي قدر كبير من الاضرار لو ان ااجهزة السلامة بالمبنى شغالة و فعالة و يتم صيانتها بشكل دوري
و أنا ما أرضى على بيتي الثاني و منهل العلم الي نعتز فيه انه أحد يشتكيه بالخارج او بالاعلام و يتم تشويه الصورة الجميله للجامعه و يصطاد من يريد في الماء العكر
لذلك اذا تم من سعادتكم تعويضي انا و المتضرر الآخر ماديا سيعكس ذلك صورة رائعه للجامعه تجاه حرصها و اهتمامها بسلامة و صحة طلاب الجامعة
_____________________________________
رحت لمبنى 21 في الظهر و حاولت اقابله شخصيا لكن كان في اجتماع خارج الجامعه حسب كلام السكرتير و شرحت للسكرتير من انا و اش وضعي و قالي تعال في يوم السبت الظهر بعد الصلاة , هذا الموضوع مهم جدا و سوف يقابلك المدير بإذن الله
_____________________________________
في النهاية :
صراحة و ربي انكم أثلجتوا صدري و هونتوا مصابي بتفاعلكم الغير مستغرب عليكم يا طلاب البترول فديتكم
أشكركم كلكم واحد واحد و اللي بلغ بالخصوص و اللي شاركوا في الاطفاء من الطلاب الشجعان و الامن و الشباب اللي هنا اللي افتحوا الموضوع و شاركوا فيه و أذكر منهم :
الأماسي على سبقه في الموضوع و تفاعله الأخوي جزاه الله خير
و الأخ شموخ جبال على طرح موضوع التعاون هذا العشم منك يا شموخ بيض الله وجهك
صراحةً اني و بصدق و من جد و من كل قلبي فرحت في أخوتكم الحقيقيه الي شفتها منكم كلكم
و في النهاية أسأل الله لكم ان يحميكم من كل مكروه و يقيكم شر كل باس آمين
___________________________
محمد الخميسي
m\-khamisi@hotmail.com
facebook: Mohammad Al-Khamisi
