ياشباب أنا مهندس كهربائي في الشركة السعودية للكهرباء لي سنتين ونص وقبل فترة أختبرت وسويت مقابلة بالهيئة الملكية والآن أنتظر العرض الوظيفي وقالوا لي إن الوظيفة راح تكون في إدارة الانشاءات أو إدارة المشاريع
وانا ودي أعرف طبيعة عمل هذه الادارتين بالهيئة وايهما افضل من ناحية التطوير والخبرة وكم تتوقعون العرض حقهم وايضا بالنسبة للسكن وش وضعه بالنسبة لموظفي الهيئة
صرآحة محتار … ياليت اللي عنده اي معلومة عن الهيئة الملكية لا يبخل علينا فيها لأني صراحة ما أعرف عن الهيئة أي شي
إدارة الانشاءات هيا المسؤولة عن أي عقد تمت ترسيته على المقاول … يعني من الزيرو الى القبول المبدئي (Initial Acceptance) وتكون شغال غالبا على الـ RFI ولازم يكون عندك تكنكال باك قراوند
ادارة المشاريع هيا المسؤولة عن أي عقد قبل الترسية واثناء التنفيذ … منها يطلع الـ scope of work وتتابع مع الادارة الهندسية السبيسفكيشن ،، وكمان مسؤولة عن السكدولنق والكونترولينق للعقد ومنها يتقفل العقد.
يعني في ادارة الانشاءات حتكون Inspection Engineer وفي ادارة المشاريع حتكون Project Engineer
ومن ناحية التطوير
بالنسبة لي اعتبره صفر ع الشمال … وغالبا تتعلم بنفسك self learning
ومن ناحية العرض
الفرش قرادويت يتوظف على المرتبة 8 الدرجة 5 ويكون البيسك 9840 ريال … وانت خبره يعني البيسك حيكون حدود 11 الف
وبالنسبة للسكن الاجارات لموظفي الهيئة جدا رخيص … كنت ماخذ فيلا غرفتين نوم ب 320 ريال شهريا وبرنامج التمليك عندهم افضل برنامج والتخفيضات عليه توصل 70% واربع سنوات بالكثير وانت مستلم فيلا تمليك
يعطيك العافية اخوي القرني
ممكن اسباب خروجك من الهيئة ؟
ومهندسين المشاريع والانشاءات ما ياخذون دورات بالهيئة ؟
وكم سنة خبرة يحتاج الواحد عشان يعطونه بيسك اعلى من بيسك الخريج الجديد ؟
وايش البدلات بالهيئة ؟
و بما إنه عندك سنتين و نص خبرة … راح يحسبونها لك سنتين … فراح تكون على المرتبة 8 الدرجة 7 براتب 11080 تقريبا + 700 ريال كبدل للمواصلات = 11780 ريال و بعد خصم التأمينات راح يكون صافي الراتب 10782 (تقريبا) … بدل سكن ما فيه لأنه بمجرد قبولك كموظف في الهيئة راح يتم تسجيل اسم في إدارة الأملاك و خلال 5 سنوات بالكثير راح تستلم الوحدة السكنية الخاصة بك .
و الأغلبية ستخدمون الهيئة كجسر للوصول إلى فرص وظيفية أفضل … يعني استلم البيت و بعدين ---->
كل كلامك واضح بس بالنسبة للسكن… اللي فهمته أن اسمك يمسك سرى الين يجي دورك … خلال المدة هذي مايعوضوني ببيت اجار الى مايجي دوري … يعني ألزامي يوفر لي سكن ولا على حسب
والشي الثاني … وش رايك ايهم افضل المشاريع ولا الانشاءات
كان حاطين في الموقع عدة وظائف ومن ضمنها مهندس كهربائي ( فقط ) يعني بدون ما يحددون في اي ادارة وقدمت عليهم بعد فترة يمكن حوالي شهر دقو علي وحددو موعد للاختبار والمقابلة… رحت ع الموعد وحصلت اللي معاي كلهم مهندسين بإختلاف التخصصات ( الكتريك… ميكانيكا… سسيفل … اندستريال… كيميائي ) عددنا حول ال 25 واحد تقريبا… المهم اول ماتجي يعطونك ابليكيشن توظيف تعبيه ( شهادتك ودراتك وخبراتك وارقام التواصل معك )…
الإختبار:
بعدها ودونا قاعه عشان الاختبار … طبعا كل تخصص له نموذج وعطوني نموذج حق الالكتريك … النوذج يمكن 40 سؤال … ( طبعا الاسئلة عن الاساسيات بالهندسة الكهربائية وكان وواضح جدا … بس الصراحة فادتني شركة الكهرباء بالاختبار كل الاسئلة جاوبتها بثقة… المهم خلصنا الاختبار وقالو بعد ساعه تبدأ المقابلات
المقابلة
طبعا اللجنة مكونة من خمس أشخاص ثلاثة ثابتين وأثنين يتغيرون على حسب التخصص… طبعا هم بدو بالكيمكال … وبعدين بدو فينا احنا يالالكتريكال… وانا كنت اول واحد… اول مادخلت وسلمت عليهم وما امداني اجلس الا ويقول (انترديوس يور سيلف ان انقلش بليز ) وبعدها سألنا واحد عن مششروع التخرج وبعدها يستلموني مهندسين الكهرباء ماخلو شي ما سألوني عنه الين وقفهم مدير الموارد البشرية وقال خلاص اسئلة كافي وبعدهم سألوني بشكل عام وش تعرف عن الهيئة وليش تبي ترك الشركة ومن هالكلام وبس طال عمرك
وفي نفس اليوم دقو علي وقالو تراك مقبول وانتظر العرض الوظيفي وانا سالته في اي ادارة … قال لي … أدارة المشاريع يبونك وادارة الانشاءات يبونك … وعادي مدري من اللي اختارني
الراتب لا يشكل أولوية لدي … أنا عارف أنو الشركة ماديا أفضل ولكن عندي نظرة عن الهيئة كويسة ولدي اهداف اسعى لتحقيقها … وانا الان لسى موظف بالشركة واحتمالية استقالتي منها 50 % واحتمالية قبولي لعرض الهيئة 50% … الامور الى الان ماخذه مجراها الصحيح والى ان تبين الصورة بشكل كامل وواضح أستطيع أن أتخذ القرار
