شوف ياغالي, هي خطوتين متداخلتين, الاولى انك تعرف كم هي مدة النوتس اللي فارضتها عليك الشركة اللي انت شغال فيها حاليا, الاغلب يطلب شهر, بمعنى لما تقدم استقالة وتقبل بعدها انت ملزم لهم بشهر عمل, بعض الشركات من تاريخ تقديم الاستقاله وماهوب من تاريخ قبولها.
بعض الشركات تطلب شهرين وبعضها ثلاثة, وهذه مره قليله وماتحصل الا بالمناصب القيادية العلية.
اذا عرفت مدة النوتس المطلوبه منك فانت خلال المقابلات لما يسألونك متى تقدر تداوم تقول بعد توقيع “العقد” بمدة كذا, اللي هي مدة النوتس تبعك بالشركة الحالية.
مسألة تقديم الاستقالة, اللي هي سؤالك, تكون بعد توقيع العقد الرسمي, واللي فيه تذكر متى راح تداوم, لو سحبو عليك الشركة بعد العقد لك الحق انك تقاضيهم, الحق ماراح يضيع بس الله يعينك على طول الانتظار لان البت في القضايا العمالية ياخذ وقت طويل وتبداء عادة بشكوى في مكتب العمل.
افضل جواب تاخذه من شؤون الموظفين عندكم عن مدة النوتس المطالب بها, وفي احيان يسامحون الشركة ويخلونك تمشي قبل الوقت بس يخصمون من الراتب, لانك مستحق لراتب شهر النوتس فبعضهم يقول لك تقدر تمشي قبل الوقت المحدد بس يخصمون قيمة المده من الراتب المستحق للمدة نفسها.
حقوقك هي راتب اخر شهر اللي اشتغلته, وحقوق نهاية الخدمة واللي تختلف من مكان لمكان بس بشكل عام نصف الراتب عن كل سنة لأول خمس سنوات وراتب كامل عن كل سنة بعد الخمس سنوات, بعض الشركات تحسب راتب كامل عن كل سنة بعد مضي 10 سنوات وبعضهم لا. وهذه بعد تاخذ العلم الاكيد من شؤون الموظفين لانها تختلف من مكان لمكان
