اخوكم طالب من جامعة الملك سعود في حيرة ..

Career
1

السلام عليكم

كل عام وانتم بألف خير وصحة وسلامة يارب
والله يعيده عليكم وعلينا يارب …

اخواني انا طالب من جامعة الملك سعود

خلصت السنة التحضيرية
و سنة الاعداد العام والان متوجه الى اول فصل في التخصص المستوى الخامس ]

حبيت استشيركم بحكم انكم مريتوا بالتجربة قبلي

انا محتار بين تخصصين وابغى شوركم لي لمستقبلهم ودراستهم

بذكر السلبيات والايجابيات اللي خلتني احتار بينهم

التخصص الاول الهندسة الميكانيكية

كانت رغبتي له من بداية دخولي الهندسة وارتحت له حتى قسم مادة الفيزياء اللي ندرسها بالاعداد
العام المتلعقة بالميكانيكا احس اني فاهمها الحمدلله و مرتاح لدراستها ، غير كذا احس انه بالنسبه لجامعتنا اسهل من القسم الثاني اللي الحين بذكرة يعني يمديني اتخرج فيه بالمدة النظامية واحاول
اثبت معدلي مع العلم ان معدلي فوق 4 من 5 ,

سلبياته : الطلاب يقولون ان دكاترة القسم عندنا رديئين + احس فرصة الوظيفية قليلة ورواتبه اقل من القسم الثاني + طلاب دفعتنا اللي يبونه قليليين فتوقعت ان الطلاب مايبونه عشان مستقبله ضعيف .

التخصص الثاني الهندسة الكهربائية

بصراحة ماكانت رغبتي الرئيسية له بس اغلب طلاب الدفعة يبون كهربائية غير كذا لما اخذيت فرة بمنتداكم اشوف اغلبكم مهندسين كهربائيين الخرييجين اللي توظفوا برواتب 11 وفوق بارامكو و سابك ] والشركات الكبيرة
فأنا يهمني بشكل كبير الراتب بعدين ، كل مره اقول ببالي لا بدخل فيه وبشد حيلي و ان شاءالله بحافظ ع المعدل
وبتعدى المواد الصعبة اللي خوفونا منها لو بقريد ضعيف اهم شيء اعديها وبعدين بلقى وظيفه كويسه
ومن الايجابيات اني لما استخرت الله وقت ماكنت محتار بالرغبتين ارتحت للكهرباء ووضعتها الرغبة الاولى بس الحين رجعت الحيرة

السلبيات : انه ماهو برغبتي الرئيسية وان مادة الفيز المتعلقة بالكهرب ماتوفقت فيها بالاعداد العام فزادت الضغط علي مع انها اسهل من الفيز الثانية + اغلب طلاب الهندسة يبون كهرباء فقسمنا بالجامعة يحط اسئلة صعبة على مواد بايخة عشان يصفي الطلاب لانهم واجد …

السؤال الختامي / هل اتوجه للجامعة واغير الرغبة الاولى من كهربائية الى ميكانيكية ؟ ام اخليها !!
مع العلم موعد ترتيب الرغبات الالكتروني خلص من زمان والرغبات بتطلع نهاية العطلة بس بحاول
اكلمهم يعدلونها لي قبل تبدا اجازتهم ، ام ابقى بالتخصص الاصعب لكن المستقبل اضمن

مع العلم اني ماعندي مشكلة اضغط على نفسي وادرس بالاصعب اذا كان مستقبله افضل ]

بعد ما قريتوا معاناتي هذي ، اتمنى تشورون علي وتوجهوني للطريق الصحيح
وكيف وضع الوظايف وصعوبة الدراسة بين التخصصين اتمنى اتمنى اللي بيرد يترك المثالية
ويتكلم بكل اريحية ارجوكم ودعواتي لكم بهالساعة الفضيلة بالتوفيق بالدنيا والاخرة

تقبلوا فضفضتي ’ وانتظركم :heart:

2

من واقع خبرتي أنصحك انحش عن الهمك والكهر :cowboy_hat_face: :laughing:

وأنصحك تخصص في الهندسة المدنية (همد):slight_smile: أو الصناعية (صنع) :cowboy_hat_face:

3

اخوي اتمنى لك التوفيق

- من واقع تجربتي انصحك انك تدرس القسم اللي انت ترتاح له وتحبه وتحب مواده وتحس انك راح تبدع فيه بغض النظر عن انو التخصص صعب سهل لان اذا حبيته راح يكون سهل عندك واذا ماتحبه بيكون صعب عليك .

- كثير من الشباب راحوا اقسام عشان بس انو الوظايف فيها كثيرة ومطلوبه ونسوا رغباتهم اللي يبونها بالنهايه بعضهم مشى عدل والاخر ماقدر يكمل لانه بالنص تلخبطت عليه اللدنيا وحس بالندم لانه راح تخصص ماهو برغبته عشان بس الوظايف .

- اجلس مع نفسك وشوف نفسك بعد 6 او 7 سنوات وش راح تكون واجلس مع شباب يدرسون التخصصين واسال كل واحد فيهم شنو تدرسون وكيف الدراسة وانت قارن بينك وبين نفسك شنو بالضبط تميل له وتحس انك راح تبدع فيه

وبالتوفيق لك

4

اولا ياخوي رواتب المهندسين بالذات الكهرب والميكانيك وحده اصلا عادي تخرج انت ميكانيك وخويك كهرب ويقبلونكم بنفس القسم وبنفس الراتب بعد

المهم المعدل حاول يكون مرتفع بس وتصير متمكن من تخصصك

يعني الكهرب مب اعلى راتب الا عند سكيكو اعتقد ( شركة الكهرب ) اما ارامكو وسابك زي بعض

5

نصيحة لك ياخوي لا تخلي المزايا والراتب والدرجات الوظيفية هي معيار اختيارك للتخصص

هل التخصص يناسبك ولا لا ، بتكمل فيه ولا لا

وتقبل فائق التحية

6

حياك الله ياطالب سعود, قل أمين جعل السعود ماتفارقك.

اولا شي, الرزق بيد رب العالمين, مقدر ومكتوب,وماهوب شرط تخصص معين يجيب لك راتب مضمون بقدر كذا, شف طلاب الطب, يعني مافي طلاب طب رواتبهم هزيله او حتى ماهوب متوظفين؟؟ الارزاق بيد الواحد الديان, وقديم قالو لو تجري جري الوحوش, غير رزقك ماتحوش. هذه نخليها على الله وتقديره, اللي عليك انت السعي وهذه اللي نقدر نتكلم فيها.
السعي وانا اخوك محدد بهندسه ياميكانيكية او كهربائيه, ونصيحتي لك, شوف وش اللي انت ترغب فيه منهم, مافي شك ان كلا التخصصين مطلوبين دام فيه حضاره, والتفرعات والتخصصات الدقيقة اللي تتفرع من التخصصين اللي ممكن تاخذها بالمستقبل كثيره, المهم الرغبة الشخصية اللي هي مفتاح الابداع.

انت اذا كنت راغب شخصيا بتخصص معين, الاكيد انك بتقبل عليه بشراهة اكبر من تخصص انت متغصبن عليه, والانسان بطبعه يبذل اكثر في سبيل الشي اللي يحبه.

ماعليك من باقي الطلاب, او من كلام الناس, دام رغبتك في مجال معين, امش مع رغبتك, ورزقك اللي الله كاتبه لك بيجيك لو انك معتكف بمغاره.
ماننكر انه بعض التخصصات لها صيت وسمعة في الوظايف لكن هذا مايعني انه اللي ماعنده التخصص هذا يبي يموت ناقص رزق

سؤالك انت اللي تقدر تجاوب عليه, ايش التخصص اللي ارغب لنفسك, هو التخصص اللي مفروض تدرسه, وركز على المعدل والفهم, بالتوفيق ومبارك عليك الشهر

7

استخر ربك الكهربائية والميكانيكية كلها ممتازة بس انا من طلاب الجامعة الميكانيكية قسم الدكاترة المعقدين والظالمين والكهربائية ممتازة بس يبيله جهد ومثابرة

8

3 قواعد مهمة انصحك تتبعها و ان شاء الله تروح عنك الحيرة

القاعدة الأولى : اختار التخصص اللي تحبه و تميل له و تحس انك ودك تتعلم تفاصيله

و من كلامك يبدو لي انك تميل للميكانيكا لكنك تأثرت بزملائك و اقبالهم على الاليكتريكال
فلا تخلي احد يؤثر على اختيارك

افترض ان كل الاقسام تمام و الرواتب تمام …وكل شي تمام …ايش راح تختار؟ اسال نفسك هالسؤال

القاعدة الثانية: راعي سوق العمل ، كيف طبيعة العمل؟ الرواتب؟ مكان العمل؟

بالنسبة للتخصصين مرغوبين في كل مكان ، و اكثر تخصصين عليهم الطلب ما ينتهي ابد
اللي يتخصص كهربا او ميكانيكا لا يشيل هم الوظيفة

لكن حاول تتعرف على كل تخصص و فرصه الوظيفية بشكل دقيق حتى تكون الصورة واضحة
في المستقبل

القاعدة الثالثة: اصعب شي في الدراسة لما تدرس شي ما تحبه

هذي طبعا وجهة نظري، يعني حتى لو كان القسم ممتاز لكن التخصص ما تحبه ، يمكن راح
تفقد الحافز

هذي حاجة مهمة لازم تاخذها بعين الاعتبار

9

انا متخرج هندسه مدنية من البترول قبل شهرين جاني 7 عروض اقلها عشرة الاف وشوي

لكن ما ادري ليه اغلب الطلاب يدخلون يا اليكترك او مكانيكال و كان ما فيه تخصصات اخرى مطلوبه و المنافسه فيها اقل بكثيررر و الخريجين اقل و فرص الوظائف في كل مكان و في اغلب الشركات

10

وجهت نظري المتواضعه للطرح فقط

لان الهندسة المدنية مر عليها فترة من الزمن و كان فيها تشبع من الخرجيين و الموظفيين فالناس راحت تتخصصات ثانية

و زي ما انت شايف شركات كثير بتروكيميا طلعت في الفتره الاخيرة و تحتاج حرجيين كهربا و كيميا و حاسب الخ الخ

اتوقع السوق الان رجع للهندسة المدنية لكن يبغالها وقت عشان الناس ترجعلها و هذا دور الجامعه نفسها انها تثقف الشباب عن سوق العمل و عن المتغيرات

جامعه الملك فهد اللي اذكره انها كانت تسوي للسنه التحضيريه ايام لكل تخصص و لكل قسم و عندنا كل رئيس قسم بابه مفتوح في اي وقت لاي سؤال

الله يوفقك يا غالي و يوفق الجميع

11

يعطيكم العافية ياشباب والله قريت كلامكم كلمه كلمه والحمدلله حسيت اني ارتحت
لقرار تعديل الرغبة من كهربائية الى ميكانيكية ، لكن ابغى احد يريحني اكثر

هل شركات سابك و ارامكو تطلب مهندسين ميكانيكيين نفس ماتطلب كهربائيين وبنفس الرواتب ؟

غير كذا اي قسم بالميكانيكا هو اللي يهتم بصناعة الالات و ابتكار آلات جديده وهل وظايفه عليها طلب ؟
لاني الفترة الاخيرة اهتميت بالقراءة عن تخصصات الكهرباء وسحبت على الميكانيكا والحين مدري
وش تخصصاتها بالضبط …

وآخر شيء هل كلا التخصصين وظايفها متوفرة بالرياض ] بالشركات الكبيرة بكثرة ؟

شكراً صانع القرار شكراً انج م شكراً بور شكراً هدوء الكون شكراً محاسب شكراً مهندس ضايع شكراً ماجكم
شكراً ليالي نجد وشكراً كونان قلب1

12

بالتوفيق طالب سعود

مثل ما قالوا الشباب روح للشيء اللي تميل له علشان تبدع فيه

بالنسبه للطلب على الهندسة المكيانيكية في سابك أكثر من الهندسة الكهربائية بالتوفيق

13

اخوي الطلب على المكيانيكيه اكثر من الكهربائيه على حسب علمي

واذا كان انت تقول اغلب الطلاب عندكم رغبتهم كهربائيه اول شي انت ماعليك من الناس وش رغبتهم ثاني شي اذا الموضوع هذا يهمك ترى البترول اكثر تخصص في عدد طلاب هو الهندسه المكيانكيه اكثر من الكهربائيه : )

لكن سعود الكهربائيه اكثر عشان سمعه دكاتره المكانيكيه انهم مريضين نفسين انا حقيقا ماعرف عن دكاترته سعود شي اسئل طلاب التخصص راح يفيدونك اكثر !!

انا حاليا بدرس هندسه صناعيه لان نظرت الى رغبتي والوظايف متوفره والحمد الله

وبالنسبه للوظايف كل المهندسين رواتبهم وحده مثلا في ارامكو كلكم قريد 11 والراتب على معدلك ! مو صحيح ان الكهربائي اعلى المكيانيكي او العكس

14

نصيحتي لك …!!

اول شي اخي الكريم … لا تدخل تخصص عشان احد يقولك ان رواتبه عاليه او مع الخير ياشقرا شفت الناس طايحين فيه قلت بدخل !

انا مهندس كيميائي من خريجين البترول … توظفت بسابك بإداره المشاريع

بالنسبه لإدارتي … اشووف ان وضع مهندسي الميكانيكا افضل بكثير والطلب عليهم جدا قوي !

اختر الطريق والتخصص اللي يلائم ميولك وماعليك من اللي يقولك روح كهرباء او كيمياء !!

الطلب على المهندسين بالمملكه كل ماله في زياده غطينا على خريجين الإداره وهذا طبعا كله نظرا للمشاريع الكبيره في البلد !