سلام عليكم … جاني اتصال من شركة الزامل وقالوا لي تعال استلم العرض الوظيفي
المهم اني قلت للموظف ، لو تقدر ترسله لي على الايميل يكون افضل لاني حاليا جدا مشغول، فوافق الرجال.
لي حوالي ٣ ايام اشيك الايميل و لا جاني اي شي 
اتصل عليهم من نفس الرقم ولا احد يرد ؟!
مدري يا اخوان وش تنصحوني فيه ؟؟
المشكلة ما اعرف اسم الشخص اللي كلمني ، ولا وين موقعهم
العادة العرض يجيك على الايميل. انا جاني العرض على الايميل من الزامل لكن صراحة بالزامل لازم تقعد تلاحق ورا شغلك عشان يخلص للأسف ولو تسكت يمكن ماعاد يكلمونك الا بعد 6 شهور. العرض من اي قسم جاك؟
هلا اخوي ترانسفورمر، ما ادري والله وش القسم ،سويت المقابلة في يوم المهنه
ولما دق علي قال: اكيد كلموك الشباب وترى للحين ماجيت تاخذ العرض؟؟ ولا فيه احد كلم ولا يحزنون
انت تقول لازم اقعد الاحق ؟؟ طيب عندك لهم رقم او ايميل
وياليت تقول لي اخوي كيف عرضهم ؟؟ يستاهل؟
حاول تشيك عالجنك ميل
تسير مع كثير من الشركات ان ايميلاتهم تتحول للجنك
احتمال ارسله … شيك ف ال
Junk أو ال SPAM
من الآخر … الباكيج عند الزامل تقريبا 11,000 ريال … وبعد خصم التأمينات بتصفالك حول 10,000 ريال … الدوام من 8-6 في الصناعيه الثانيه … بالتوفيق,
شيكت … وللاسف ما لقيت شي ؟!
مشكور اخوي 
انا معلوماتي عن الزامل للاستثمار الصناعي. فما أدري هل هي الشركة اللي تعنيها؟ أتوقع انها هي لأنهم يوظفون أكثر من غيرهم الفترة هذي.
الزامل للاستثمار الصناعي رواتبهم حلوة للمهندسين الجدد وعندهم بونص سنوي ممكن يوصل لسبع رواتب في بعض الأقسام لكن أكثر الأقسام مابين راتب وأربع رواتب على حسب الأرباح. عيبهم ان الدوام شوي طويل (8-6) لكن الشركة الشغل فيها حلو ومنظم.
عندي ايميل مدير التوظيف وهو هندي اسمه أسلم بير لكن الله يعينك تقعد تزن عليه الين يرس لك العرض :
AslamPeer@zamilindustrial.com
يعطيك الف عافية اخوي 
ما ادري اذا تعرف كيف برنامج التدريب عندهم ؟؟ ونوعية الشغل؟
الحمد لله اتصلت ورد بعد ماكنت معلق على التلفون ،
وارسل العرض
العرض لشركة زامل للحديد ؟؟ احد عندة اي فكرة يا شباب؟؟
السلام عليكم اخوني عندي مقابلة في الزامل للصيانة والتشغيل حبيت اسال كيف طريقة المقابلة…
والله الموضوع جاي بوقته …اتمنى القى رد في منتدكم انا خريج هندسة بس ماني من جامعة البترول…
الله لايحرمكم الاجر…
اها … صراحة ماعندي معلومات عن شركة الحديد لكن مبروك والله يوفقك
الله يكتب اللي فيه خير ويوفق الجميع
اخوي كانت المقابلة حوالي ١٠ دقائق مع اثنين من منسوبين الشركة واحد تكنيكال والثاني موارد بشرية ،في البداية سلام و اسمك و كم معدلك
بعدين سال وين كان تطبيقك و تكلم عن المشاريع … وبعدها جلس يسال في مواد التخصص
مثل الثرموداينمكس و هيت تراسفير و هيت اكسشينجر ، طبعا في بعض الاسئلة ما عرفت الجواب وجاوبت اني ما اعرف بصراحة … اهم شي انك تكون مستعد و لما تجاوب تجاوب بقوه
اذكر اني صححت له معلومه كان مخطي فيها لما كنت اتناقش معاه 
، خلك طبيعي ولا تتوتر واعرف اذا كان لك فيها رزق بتاخذه
وبالتوفيق يالغلا
العرض اللي كتبتلك اياه حق الزامل حديد 
بالتوفيق, ,