شباب انا انسان ماعرف اذاكر ،، الحين انا توني مخلص ال ٣٠ ساعة ومعدلي متجه للاسفل
عندي مشكلتين رئيسيتين الاولى :
اني كل ماحاولت ابدا اذاكر اما انه يجيني نوم او اذاكر شوي واحس اني فهمت بعدين ابدا افهي ومافهم الباقي ،، حاولت اغير طريقة مذاكرتي من نهار الى ليل واغير المكان بس مانفع معي الوضع
المشكلة الثانية اني اذا بديت اذاكر اتشتت وماعرف من وين اذاكر المصادر كثيرة كنت اشوف النوت وكانت جددا سيئة ، حاولت اغير للكتاب شف اني ابذل وقت كبير والنتيجة فرق بسيط … المشكلة اني مدرسيني جددددا سيئين
انا اعرف ان في ناس ماشاءالله متعودين على المذاكرة من ايام المدرسة بس اكيد في طلاب ماعرفوا الدراسة الا بالجامعة وقدوا يتغيرون
المشكلة الكبرى: اني الحين تحطمت من نفسي وبدا التبلد يصيبني وماصارت تفرق الدرجات معي … ابي احاول اتدارك نفسي قبل ما اتدسمس او حتى اني اترك الجامعة بحجة انها مو مكاني
والله كل اللي أقدر أفيدك فيه إن ما فيه عصا سحرية بتحقق لك اللي تبيه , المسألة كلها الاجتهاد والعزيمة وشكل هذا اللي ناقصك من كلامك انه كل ما بديت تذاكر يجيك نوم ولا تفهي.
بداية انت خلصت 30 ساعة يعني مايقارب ربع ساعاتك الجامعية … والفرصة أمامك ان أردت بإذن الله … استعن بالله ولا تعجز … وتوكّل على الحي القيّوم … ثم أفعل الأسباب …
أوّل شي بوجهة نظري الكتاب هو المصدر الوحيد والموثوق والمضمون بإذن الله في اي منهج أو اي مادة تاخذها … لأنه لا يمكن أسئلة الاختبار تخرج عن مواضيعها …
فأبدأ وانتهي من الكتاب … تشتيت النفس بين Note و slides و كتاب يضيع الوقت بلا مذاكرة فعلية …
مثل ماقلت لك أبدا بالكتاب وضبّطه وإن خلصته وحليت اسئلته روح لأي شي ثاني من باب المراجعة …
خصوصا مواد الفريشمان … كتبها ممتازة وواضحه … أوصيك بأسئلة الكتاب …
يعني الرياضيات مثلا … حل أسئلة الكتاب مضبوووط … أفهمها الواجب دايما حلّه ( بفهم ) … كل سؤال فيه عطه وقته اذا أشكل عليك شي روح لدكتورك …
أخيرا اعط الـ old exam وقته … وحل ثلاث على الأقل … .
ترتيب الوقت شيء مفصلي بين كثير من الطلاب … . بالتوفيق عزيزي …
طيب ممكن تذكرلنا المواد اللي منزلها هذا السمستر ؟ لأن كل مادة لها طريقتها في المذاكرة …
أهم شيء إنك أبداً ما تنقص من ثقتك بنفسك , صدقني قد ما تعطي المادة قد ما تأخذ , مثلا في طلاب طول السمستر جالسين تحت ضغط دراسي وتضيع الأوقات لاهم اللي ذاكروا ولاهم اللي أرتاحوا بينما تحصل طلاب مهم شايلين هم كبير بس كل يوم يخصصوا وقت يحلوا فيه الواجبات ويذاكروا للكويزات ويجيبوا أحسن الدرجات.
بالنسبة لمكان الدراسة كثير طلاب يعانوا من هذا الشيء بس حاول إنك تجرب اكثر من مكان وان شاء الله تحصل المكان اللي ترتاح فيه , مثلا اذا كنت تحب تذاكر من سلايدات في الكمبيوتر حاول إنك بعد ماتخلص الدوام او إذا كان عندك بريك تروح لأحد اللابات تجلس فيه شوية لين تحس نفسك طفشت أو إذا انت ما تحب الأماكن العامة تقدر تذاكر في غرفة القراءة أو المكتبة في الدور الرابع مثلا.
الصراحة… الموضوع ياخوي على الجرح , وهذا الشيء يعانون منه طلاب كثر ( من اللي اعرفهم ) اللي تغير علينا من أيام الثانوي , إن أيام الثانوي كان عندنا مرجع واحد , أما الكتاب ولا دفتر الرياضيات لكن في الجامعة تغير الوضع ما تدري تذاكر من الكتاب ولا النوت ولا الاولد اكزام وحتى في مصادر من النت … فالواحد يخبص , يسمع خويه يقول ذاكرت من الكتاب وجبت قريد عالي ويسمع خويه الثاني يقول ذاكرت من النوت الفلاني وجبت قريد كويس … فيضيع الواحد ولايدري وين يذاكر منه … هذي المشكلة …
أنا كنت مثلك يوم كنت فرشمن كنت اذاكر من هنا وهناك وكان معدلي متواضع. بعدين فكرت قلت ليش تعطينا الجامعة كتب بس كذا علشان نناظر فيها بس. عزمت اني أذاكر من الكتاب وأخلي السلايدات كعامل مساعد. بصراحة لقيت صعوبة اول الأمر وكنت أخذ وقت طويل في المذاكرة ولكن بعدها صار الوضع عادي وفي بعض الأحيان كنت اعتمد على الله ثم على نفسي في مذاكرة المادة لان دكتورها شرحه سيئ واجيب درجة عالية لاني فهمت الكتاب صح.
المذاكرة من الكتاب تحتاج لفراسه ومثابرة وعزم. مو كل شي في الكتاب تذاكره ولكن هناك أشياء جوهرية في الكتاب تركز عليها وهي عادة تكون قلب الدروس. بعد كذا أروح لـ الأسئلة حقت الكتاب وأحل منها ماطاب ولذ لـ Test my might وأشوف انا فاهم أو لا
سويت هذي الطريقة في فيز 102 وجبت درجه عالية
ملاحظة
مو كل كتب الجامعة جيدة خاصة في الكورسات المتقدمة فتضطر بعض الأحيان إلى النت والنوت الخارجي ولكن كتب الفرشمن كلها جيدة و تدرس في جامعات عالمية
نسيت نقطة مهمة :
اذا مافهمت نقطة استعين باليوتيوب ترى فيه من العلم ماالله به عليم ويغنيك عن القراءة بعض الأحيان من الكتاب
اتفق معك في اخر نقطة : اليوتيوب
احيانا ما كنت افهم الا من النت او اليوتيوب …
لان بعض معادلات بالكتب والسلايدات ما كنت افهم وش حدودها او مجاهليها, والنت فيه انواع كثيرة للشرح
مثل ما كنت بالفزكس 101 , ما كنت افهم كيف اجيب قوة الشد للحبال … بحثت في اليوتيوب
لقيت فديو لقناة khan academy رغم في فديوات وقنوات كثيرة, وفهمت منه المطلوب, وتسهلت معي
