يا جماعة الخير ولله الحمد انا طالب متميز وانا من المدينة المنورة والحمد لله انا كل المواد فاهمها والانجليزي حقي تمام عدا الgrammer بس الى الآن ياتي الي خوف وتوتر رهيب واخا اني ارسب في الاوريا وكمان افتقد اهلي تكفون انصحوني ايش اسوي حاسس اني شوية وانهار
انت واثق من نفسك يا مهند والدليل انك تقول انك طالب ممتاز فليش الخوف ؟ الأوريا والله ثم والله انها سهلة لكن المشكلة في اول الايام انك ما تعتاد على نظامها وانك مغترب عن أهلك … انا من دفعة 2012 و أقسم لك بالله ان اول اسبوعين لي هنا اني كرهت نفسي من الضغط والغربة حتى اني فكرت اسحب لكن كل ما شفت طلاب الجامعة قلت ليش هذولي قدروا يكملون وانا ما قدرت ؟ هل انا ناقص عنهم ؟ أبداً كلنا متساوين في نفس الظروف اللي نتعرض لها لكن الفرق في من يصبر حتى يتعود على الوضع ويألفه وصبرت حتى فرجها الله وصرت أحب الجامعة وصرت والله اذا رحت اجازة أشتاق ارجع لها ولجوها خلاص صارت وطني ومكاني … أيضاً الجامعة بنظام السنة التحضيرية تأهلك في جميع المجالات تقريباً وتخليك شخص آخر تماما اذا خلصت التحضيرية … انا كنت ما افرق بين is و are اول مادخلت هنا لكن الحمد لله بعد 4 مستويات انجلش صارت لغتي ممتازة وصرت استفيد منها في نواحي الحياة المختلفة غير الناحية الجامعية , ايضاً الرياضيات كنت والله ما افهم فيها شيء وكنت احضر الكلاس واطلع وانا ما فهمت ولا كلمة من اللي قاله الاستاذ لكن مع الايام ومع المذاكرة اليومية تعودت وصرت افهم , الغالبية الساحقة من الطلاب مروا بذي الظروف الصعبة ظروف الغربة وظروف الضغط لكن اللي صبر منهم ظفر وكمل دراسته في أرقى جامعة على مستوى الشرق الاوسط في العلوم الهندسية والعلوم الطبيعية , أهلك ما خلوك تجي تدرس هنا الا لأنهم واثقين فيك ومتوقعين منك الشيء الكثير ان شاء الله وراح تلاحظ اذا رحت لهم ان شاء الله في اجازة الحج كيف يستقبلونك وكيف اهلك يفتخرون بأنك تدرس في جامعة البترول فلا تخيب ظنهم فيك وترى كلها ثلاثة اسابيع او بالكثير اربعة وتعتاد على الوضع هنا وتصير تحبه.
انا اقول اطرد الشيطان وشد حيلك في دراستك وارفع راس اللي يدعون لك في تالي الليل بالتوفيق والنجاح.
الخوف اللي انت فيه شي طبيعي يمرون فيه الطلاب ومرينا فيه ،
الخوف يحملك مسؤولية زيادة فوق مسؤولية الأهل وثقتهم فيك ،
مسألة وقت وان شاء الله تتأقلم وتضبط أمورك
أردوغان: السياسة فيها مخاطر. والتجارة فيها مخاطر. والحياة فيها مخاطر. الرجل الذي يخاف من المخاطر لن ينجح في حياته.
شيء طبيعي لأنك تمر بمرحلة جديدة في حياتك…
كلنا مرينا بهالمرحلة والحمد لله عدت…
إذا ماعرفت شيء اسأل…
روح للدكتور المكتب…اسأل زملاءك… اسأل من له خبرة أكثر منك…ماهو عيب إنك تسأل…
حوط نفسك بمجموعة طيبة تعينك وتساعدك…
نظم وقتك واعرف كيف تذاكر…
رفهه عن نفسك واستمتع بوقتك…
ولا تنسى فوق كل ذا…دعاء الوالدين والتوكل على الله
موفق
يا رجال تعوذ من ابليس كلنا مرينا بهذي الخالة وكان وضعي انا أخص منك كانت الانقلش على الزيرو احضر ولا أفهم شيء وتيسرت الحمد لله انت اهم شي توكل على الله وأفعل الاسباب وتعدي ان شاء الله
ونصيحة لا تفكر بس في انك تعدي لكن فكر انك تتفوق هذا هو المفتاح
الله يوفقك
والله تذكرني بأيام الماضي الجميل … ايام الاوريا كنت اقول " يالله انا وش جيبني هنا … هذا مو مكاني … اخاف اني افشل … الدراسه بالانقلش وانا مو ذاك الزود … إلخ "
وسبحان الله مررت الايام وتخرجت من الجامعه والحين اسال نفسي وش كنت انا خايف منه …!
لا تخاف اخوي كلنا مرينا بهالمرحله … بس لازم انك تشد حيلك وتعتمد على نفسك وتكون ثقتك بنفسك عاليه !
ليش المبالغة في الخوف!!
انت ماتعرف القرامر, وهم ألحين حطوك بهالكورس عشان تتعلم هالشي…
اهتم واجتهد وأكيد انك بتنجح إن شاء الله
شكرا اخواني على هذه الردود المحفزة وبإذن سوف اجتهد وشكرا لكل من ساهم في هذا الموضوع واتمنى التوفيق لي ولكم وفعلا لن انساكم وانسى ردودكم وان كان بوسعي ان اقدم لكم اي خدمة نتيجة مساعدتكم لي فأسأل الله العلي العظيم ان يقدرني ان افعلها لكم ولكم مني جزيل الشكر والتقدير اخوكم : مهند عبدالحميد عبدالله الحازمي.
خوفـك هذا هو الي راح يخليك بعد إذن الله عز وجل ، من المتفوقيـن
على قول الشاعر ، لأني تجنبت الغرق عديت من فوق السحاب
مهند ما بقولك غير شئ واحد … احمد ربك انك تعرف انجليش .
انا دخلت السنه التحضيريه وكنت جاي من قريه صغييره بالجنوب بعيده من ابها
ومدرستنا اصلا ما كان فيها اصلا مدرس انجليزي >> والله ما اكذب يا شباب … يعني دمرااان من الانجليزي والله ما كنت اعرف شئ ابدا ابدا ابدا
لما دخلت الوريا نجحت بالبركه التررم الاول ورسبت بالثاني ب engl 002 والماث2 واخذت ماث 2صيفي ونجحت على الحااافه . واخذت الترم الي بعده engl 002 وكنت خااايف ارسب وجبت بالميد تيرم تحت الافرج لكن. فجأه عديت لاني ما فكرت بشئ ثاني غير الجبل كنت اشوف مكاني فووق مو بالاوريا …
وتعاااااال بالاوريا ما كنت اعرف احد والله والله ما عرفت الا واحد بس كان صديقي الروح بالرووح وكنت ابي ارمت معاه وسحب ملفه ورجع الباحه … كنت بتجنن ما اعرف غير روميتي الي كل يوم في مشكله معاه والله يا مهند كنت ابكي بكاء بسطوح عمارتنا ووالله مو مستحي اقولها بس ذي اوريتي وتعايشت معاها وكنت اكثر خوف منك والله لاني كنت محطم من كل ناحيه … ما عندي اصدقاء روميتي معاي وياه مشاكل وكل حياتي مدمره كانت
الاحين ذا انا جينيور ميكانيكال ومع برنامج ccp لارامكو وجالس اعمل على برائه اختراع الحينه مع الدكتور مراح بقسم الميكانيكا وتغيرت حياتي جذريا
ارجوك مهند لا تستعجل وتدمر حياتك
وتذكر الطالب الي يتدمر ويتعذب بالوريا راح يبدع بالجبل والعكس صحييييح
لان مكانك مو انجليزي مكانك مهندس عالم مبرمج محاسب …
:)الله يوفقك يارب
وتذكر كل ذولي الي يشاركوك بالمنتدى معك …اي استفسار احنا هنا وحتى بالانديه تلاقينا بس اخرج لا تكتم نفسك
انحش عن المثبطين اللي يحطمونك وتذكر انك بمرحلة تعلم لذلك شد حيلك وتعلم
أسأل الله ان يوفقك وييسر لك … ثق تمام الثقة أن الجميع مر بما تمر به وربما أشد
والآن الامور ممتازة ولله الحمد
1-ادعي الله ييسر همك
عن أبي سعيد الخدري وأرضاه قال: دخل رسول الله المسجد ذات يوم فرأى رجلاً من الأنصار يقال له أبو أمامة جالسًا فيه فقال : يا أبا أمامة ما الذي أجلسك في المسجد في غير وقت صلاة؟ قال: يا رسول الله، هموم لزمتني وديون غلبتني. فقال : ((أو لا أدلك على كلمات إذا قلتهن أذهب الله عنك همك وقضى عنك دينك؟ قال: بلى يا رسول الله. قال: قل إذا أمسيت وأصبحت: اللهم إني أعوذ بك من الهم والحزن، وأعوذ بك من العجز والكسل، وأعوذ بك من الجبن والبخل، وأعوذ بك من غلبة الدين وقهر الرجال))
2-شد حيلك وذاكر , وصدقني اذا ذاكرت وحضرت أول بأول وصرت تفهم عالمدرسين بتحس انك مسيطر عالوضع وان الامور ماشية …
وفقك الله يالحبيب
مهند تخليني أزعل عليك يا ولد الكلاس !!
اطرد " الوساوس " اللي داخل عقلك ، وفكر بطريقة إيجابية ، أنا أشهد بالله إنك طالب مميز ، وقسمًا بالله إنك تقدر تجتاز الأوريا ، الكثير من طلاب الجامعة كانوا سيئين في الانقلش ومع ذلك تفائلوا ونجحوا ، أعرف واحد ما يفرق بين He و She والان ما شاء الله خريج ومعدله كان جيد جدا ، لا تخسر نفسك بسبب تفكير سلبي ، فكر بطريقة ايجابية وحفز ذاتك وصدقني إذا توفرت عندك الارادة والعزيمة راح تأخذ A+ مو C بس !!، وأنت تقدر ، أنت تقدر ، أنت تقدر ، أنت تقدر !