السلام عليكم ورحمة الله وبركاته
مساكم الله بالخير
انا للاسف فكرت اسحب من الجامعه
نفسيتي تحطمت مره
ادخل الحصص واطلع مثل مادخلت
مافهم شي فيه انقلش
وفوق كذا حاطيني 00 وبعد مافهمت الى الحين
والله تعبت نفسيا
فكرت اني اذا ماسحبت ابقعد سنه واحتمال كبير انطرد
ما ادري اسحب ملفي من الان واريح نفسي
وش رايكم انتم
وازيدكم من الشعر بيت
مر اسبوع والله كأنه سنه
ي ليت تعطوني رايكم عشان ما اسوي شي واندم عليه
وجزيتم خيراً
الصبر ثم الصبر ثم الصبر
الصبر على اني ما افهم واذا فتحت الكتااب ماعرف وش مكتوب
ي خي والله لو انك في مكاني تعرف
تبي تذاكر ماتقدر ولاتعرف
تبي تشارك ماتعرف
تبي تكتب ماتعرف
تدخل الفصل وتطلع مثل مادخلت
معليش أخوي طارق ، عارفين موقفك وشعورك
كلنا مرينا بالضبط بمثل اللي انت تمر فيه
شوف هالموضوع , http://skfupm.kfupm.edu.sa/vb/showthread.php?t=110746
ولا قلنا هالكلام اللي فوق الا عن تجربة موب فلسفة
اتمنى لك التوفيق
توكككككككككك بدريي كثيييررررررررررر توك اول اسبوع ياخوي والكل تراه مر في مشكلتك هذي والكل كان مايفهم في البداية وعادي احتمال حتى اول شهر ما تفهم شي في الانجلش لكن يا حبيبي هم مدرسينك المادة عشان يفهموك مب عشان تقول ما افهم شي وكلنا كنا زيك كذا انا واحد مثلك بالضبط فا عليك يا حبيبي تترجم كل كلمة غريبة قدامك اما الرياضيات فا عليك ترجع البيت وتدرس وحاول تاخذ نوتت ايمن لان فيها شرح واجلس حل الاولد قزام ومن تخلص الدرس ارجع طبق على المسائل وذاكر وما عليك من كلام الناس اللي يقولو لك ان الاوريا صعبة وكذا بس اللهم السالفة كلها تعود بس اول شهر هذا عادي لكن اوعاك انك تفقد الصبر وفالك a+
كل شخص مرّ بنفس مرحلتك … فلاتخاف ياأخوي …
وإن كنت مصرّ جداً جداً على ترك الجامعة …
فاتركها بعد ماتنهي هالسنة …
اعتبرها كأنها دورة انجلش وماث و و و … اعتبرها سنة خبرة لك ولحياتك … ولأنك لو طلعت الحين بتجلس عند أهلك فاضي … مافي جامعات تقبل الحين على حد علمي …
فنصيحتي لك تكمل … وتعوذ من الشيطان :d
اذا استسلمت من الحين ,ماراح تقدر تقابل الصعوبات اللي راح تجيك في المستقبل , وكل مابتجيك صعوبه راح تستسلم لها
توكل على الله عزوجل كافح ,لاتيأس ,لاتستسلم , حتى واذا انت مش فاهم شيئ لازم تجتهد ومن اليوم تبدأ صفحة جديدة وترا كلنا مثلك ومرينا باصعب الحظات انت انسان ناجح وقادر انشاء الله على النجاح
وعليكم السلآم ورحمة من الله وبركآته,
معك أوريآ 2012 وبديت من أنجلش 00, وكثير سمعت كلام محطم وما له سنع , وهو بلا شك أثر علي وحطمني, ولكن بدت الأمور تتحسن, الشغلة كلها يبيلها صبر وتوكل على الله والدعاء.
أتوقع إن أنت عند مدرس أسمه قيلآرد, الشيبه اللي يلبس القميص الأخضر, هذا سلّمك الله يحب يحطم الطلآب, وهو قصده غير التحطيم إلا وهو أنه يحفزهم, وحتى يفصل على كل طالب بالفصل, ولآبد إنك كنت أحد الضحآيآ 
لآ تخآف هو طبعه كذا وبالعكس خذ كلآمه من باب الونآسة صدقني رآح تفلها معه وترتاح له, ناهيك عن الشرح حقه, هو مدرس يحب يشرح ويحب يوصل المعلومة بأي وسيلة كانت, حتى لو كانت من باب التحطيم.
أذكر إنه يقول لبعض الطلآب , قم أشتغل بسوق الخضرة ولا شوف لك تاكسي أشتغل فيه, حتى لو تسأله سؤال وهو يشوف إنك ما راح تحتاجه بالليفل"المستوى" , راح يقولك أنت ما راح تحتاجه بالتآكسي 
.
لآ تفكر كثير, التفكير الكثير ما راح ينفعك وبالعكس راح يحطمك , أشتغل وأشغل نفسك بالمذاكرة, راح تنسى شي أسمه " بسحب ملفي".
“ومن يتق الله يجعل له مخرجا ويرزقه من حيث لا يحتسب” . أجعل تقوى الله بين نصب عينيك, سيجعل الله من بعد عسراً يسرا.
لآحظ أن النجاح من دون عسر ليس له طعم أبداً, هذه هي الحياة الجامعية, لابد من إنك تصبر وتصآبر وترآبط , " يا أيها الذين أمنوا اصبروا وصابروا ورابطوا واتقوا الله لعلكم تفلحون".
وهي أول أسبوعين إلى ثلآث أسآبيع هي اللي بتشعر فيها بغربة بنت كلب 
, بس أصبر شوية 
وتذكر إنه ما أحد راح ينفعك غير نفسك, أمسك الكتاب وفصفصه تفصفص, وإذا عندك سؤال, رح للأوفس أور حق المدرس, وأحشره بالأسئلة إلى ما تفهم منه, وسجل ملاحظات لأي شي يقوله لك المدرس.
ولا تفكر كثير, أبداً!
التفكير بالأنجلش والمآث والضغط الدرآسي والأمور هذه كلها , رآح تروح عنك , ولكن أشتغل على نفسك بالمذاكرة , وأنسى شي أسمه " بسحب ملفي".
موفق يآ أوريآ 
انا بديت بـ 001 وكنت استحق حقيقة 000 بس مدري كيف حطوني فيه , كنت مثلك بالضبط اطلع من الكلاس زي ما دخلت وخاصة الماث كان يجيب الهم ما كنت افهم اي شيء وكان في كلاسي ناس كثيره مستواهم عالي في الانجلش فكنت احس اني كذا الوحيد اللي ما يفهم ولا يقدر يشارك لكن مع الوقت ومع الصبر والتحمل صرت افهم شوي شوي حتى صرت افهم كلام الدكتور الانجليزي زي باقي زملائي , فالشاهد هنا انك تحتاج تصبر وانت الآن تتعلم الانجلش الحقيقي موب مثل الخرابيط اللي في الثانوية فلازم تصبر ثم تصبر ثم تصبر وصدقني راح تلاحظ انك تتحسن في كل شيء تدريجيا.
هذا رد لي حطيته في موضوع آخر ممكن يفيدك:
اذا نظرت لنفسك انها قادرة على شيء راح تشوف نفسك واصلة لذا الشيء
مهما يكون مستوى ذكائك ومثابرتك
كثير ما دخلوا الجامعة مع انهم اذكى من بعض طلاب الجامعة
الجامعة يبالها شيء واحد فقط
انك تذاكر
لو انك اغبى واحد وذاكرت راح تجيب اعلى العباقرة الي ما ذاكروا
بالنسبة للانجلزش
ما في حل الا انك تخلي الكتاب عربي
ترجم ثم ترجم ثم ترجم
مو شرط تحفظ
بالعكس ترجم وانسى
مع الوقت راح تحفظ تماتيك وبسهولة وبسرعة
لا مشيت بمشوار لا تفكر بالرجعـة ، هالترم هذا مشوار ونهايته تحويلة اما تكمل او تروح جامعـة ثانية
فأصبر وشف نفســك واختبر وشف الدرجات ، كلنا كنّا مثلك
اااااااه ياليتك كنت معي قبل 4 سنوات لما كنت اوريا وصديقي القرني سحب … والله كان يكلمني وهو يبكي والي زادني اصرار اني ما اسحب … رسالته لي ما دامك وصلت كمل اذا سحبت بتنقفل الابواب بوجهك حتى من اقل الجامعات بالسعوديه ماراح تحصل غير الملل بالبيت ينتظرك …
كمل كمل والله جلست شهرين ما افهم اتفه واسهل الكلمات … واحمد ربك الحين التحضيريه منظمه اول كان دش في دش … يجلس بجنبك واحد من لهجته تقول مو سعودي واصله بريطاني >> حقيقه
المهم تكفى كمل ما بينقص منك شئ … وراح تتفاجئ باخر كورس بالجامعه engl214 ان قريدك اعلى من خويك البريطاني الي كان بالاوريا هههههه >> والله حقيييقه
يالغالي حاب أقلك شيء
ترى الواحد مو من أول حاجز يواجهه خلاص يتراجع ترى هالكلام غلط 
المفروض تقنع نفسك انك انت جيت وتغربت عن اهلك بهدف انك تتخرج من الجامعة ان شاء الله وبمعدل حلو وهالحواجز ما تأثر عليك ترى انا كنت نفس نظامك 
00 وكلنا نفس الوضع وشوفنا مشينا والحمد لله وطلعنا الجبل 
.
بالتوفيق ولاتنسى تتوكل على الله 
أول ما رأيت موضوعك حرك في الرغبة في الرد،
لكن كلامك عن أن القارئ ربما لن يفهم شعورك أوقفني، فقد كنت جيدا في اللغة عدما دخلت الجامعة…
ثم تذكرت
أني اضطررت في المتوسطة للعيش في أمريكا الجنوبية 3 أعوام،،
واضطررت تبعا لدخول مدارس باللغة الإسبانية
وتذكرت ترجمتي للكتب لعلني أحظى بفهم موضوعاتها
وتيقنت أني مررت بما تمر به أو بأسوأ منه
وها أنا الآن لا أكاد أتذكر المعاناة
مرت الأيام وبقيت اللغة
لا بد من المرارة
لا بد من المحاولة تلو الأخرى
ولا بد لك من توفيق الله، فاسع لنيله
إذا لم يكن عون من الله للفتى *** فأول ما يجني عليه اجتهاده
فتوكل على الوهاب الكريم
الحكيم الرحيــــــــــــــــم
وبر الوالدة باتصالاتك
كلام الشباب عين العقل واعجبني رد اخونا الحنتوشي على الاقل كمل الى نهاية الترم لانك لو سحبت ببكرة رح تقعد بالبيت 4 شهور فانت شدشوي واصصصصصصصصصصصصبر والله مامر علي اسوا من اول اسبوعين بالاوريا لكن مع الصبر وتحفيز الشباب عدت بسلام
اول شي يا أخ
لي صديق عزيز كان مثل حالتك أو أشد يكره شي اسمه انجليش وأول شهر على حد قوله أنه كان " طااولة وكرسي"
مع الوقت تتطور وتطور وكمل بالجامعة والان ماشاء الله سفمور ووضعه زي الفل , وبما أن الترم رايح عليك رايح كمل وشوف وش أنت عليه
أسأل الله ان يوفقك وييسر لك … ثق تمام الثقة أن الجميع مر بما تمر به وربما أشد
والآن الامور ممتازة ولله الحمد
1-ادعي الله ييسر همك
عن أبي سعيد الخدري وأرضاه قال: دخل رسول الله المسجد ذات يوم فرأى رجلاً من الأنصار يقال له أبو أمامة جالسًا فيه فقال : يا أبا أمامة ما الذي أجلسك في المسجد في غير وقت صلاة؟ قال: يا رسول الله، هموم لزمتني وديون غلبتني. فقال : ((أو لا أدلك على كلمات إذا قلتهن أذهب الله عنك همك وقضى عنك دينك؟ قال: بلى يا رسول الله. قال: قل إذا أمسيت وأصبحت: اللهم إني أعوذ بك من الهم والحزن، وأعوذ بك من العجز والكسل، وأعوذ بك من الجبن والبخل، وأعوذ بك من غلبة الدين وقهر الرجال))
2-شد حيلك وذاكر , وصدقني اذا ذاكرت وحضرت أول بأول وصرت تفهم عالمدرسين بتحس انك مسيطر عالوضع وان الامور ماشية …
وفقك الله يالحبيب
اكثر من ذكر الله …
لاتنس : لا إله الا أنت سبحانك إني كنت من الظالمين …
* أنا تقريبا الى نهاية الفصل الاول من الاوريا لم ألق تغيير ملحوظ … بس بعدها الحمدلله قدرت استوعب الانجليزي
ثق تماما انك لست وحدك من تواجه هذي المشكلة …
* كن أجتماعي واسأل الآخرين عن طرق مذاكرتهم …
اشغل نفسك بالمفيد واطلب المساعدة ان احتجت .
طلاب الجامعة اوفياء حريصين على بعض …
الله يوفقك …
لا تستعجل وتتسحب ملفك من الجامعة
انا اول مادخلت قاعدة is الخبط فيها
وفالصيف جبت 530 بالتوفل ولله الحمد
والله كلنا مرينا بحالتك
وكل اللي معك بالكلاسس نفس حالتك
استعن بالله واجتهد وراح تقدر
اترك العواطف وفكر بمنطق لو سحبت من الجامعة الآن ما راح تستفيد أي شي ما في أحد راح يقبلك هذا السمستر وحتى السمستر الجاي
يمكن، واحد كان معاي في الأوريا صمم يسحب قلتله ما بتستفيد شي وبتقعد في البيت ما صدقني وسحب. بعد شهر اتصل علينا ويقول الجامعة اللي مدينتي قالتلي قدم السنة الجاية! يعني بيجلس 8 شهور عاطل! أسألك بالله لو أنه جالس يدرس هنا مو أحسن؟