جدا مشتت .تحويل والا انسحاب ؟

سلام عليكم ورحمة الله وبركاته

اخواني
انا طالب سوبر اوريا باقي انجلش وماث

صراحة تعبت نفسيا خلاااااص
احاول اركز لكن ما اقاوم الافكار التي تجيني

ميجر الماث جبت 9
والانقلش ورانا التوفل

نفسيا خلااااااص دمار

فكرت اسحب ملفي بس وين اروح واغلب الجامعات مافيها تقديم الترم الثاني
قلت تحويل بس وين

جدا متشتت
هل من نصيحة

قاتل و قاتل و قاتل

^^
أولا: ما انصحك تنسحب طول بالك شوي ومر على مركز التوجيه والارشاد

ثانيا : اذا أنت ناوي تسجل ترم ثاني ما فيه عندك الا برنامج المنح الدراسية من جامعة الامير سلطان
أنت لا تستعجل استخر واستشر

الله يوفقك وييسرلك امرك
والله اعلم انه على قولتك مافيه قبول الترم الثاني والتحويل كمان ماتوقع يقبلوك وانت ماخلصت الاوريا فانا اشوف انك تستهدي بالله وتروق بالاجازه هذي وتعاهد نفسك بالبدايه الجاده بعد العيد
ترا ماراح الا شهر ونص بس يعني خاصه بالماث باقي ميجر ثاني وفاينل والله اذا شديت حيلك واجتهدت يمديك وانا اشوف انه هو الحل الوحيد المتاح لك يعني مانت خسران شي (لاكن حط همتك انك تبي تنجح)

احاول ارفع من معنوياتي لكن. …
اقول لنفسي الوضع شبه منتهي

لكن وراي ابوي الي حاط كل أمله فيني
وأمي بعد

اذا جيت بذاكر تهجم علي الافكار

وأبكي وأبكي وأبكي
ماعندي حيلة الا البكاء

انت لك 3 اترام بالجامعة
فاكيد انك بدعت لو بميجر واحد بس
تذكر وش سويت وحاول تكرر الانجاز مرة ثانية

وتذكر ان الصعوبة بس في البداية (اول ما تمسك الكتاب)
بعدها كل شي يتيسر

لاتياس …حاول تبذل الاسباب مع الدعاء
وحاول تغير عاداتك القديمه الخاطئة وتستبدلها بعادات جديده صحيحه! سواء علاقتك مع ربك او طريقة المذاكرة او علاقتك مع اصدقائك…الخ

اذا نفسك قفلت غير المكان الي تدرس فيه وياغالي لازم تذاكر وتشد حيلك لانك اذا ما شديت حيلك طبعا راح تأخذ درجة سيئة وعليك بالاولد اقزام اتوقع انك ماث 002 ذاكر نوت ابراهيم ناجي واولد اقزام ابو ادهم وباذن واحد أحد انك راح تعدي.
الله يوفقك وييسر امرك

بقلك كلمتين صلي استخارة وربك ان شاء الله راح يختار اللي فيه الخير لك

الله ييسر امرك ولا تتسرع بالانسحاب من الجامعة لانه ضيعت مايقارب السنة والنص من حياتك

ركز وراجع حساباتك من جديد

انا جبت 9 في اول ميجر في ماث 02
وعديت ب +c
يعني يمديك تعدي ان شاء الله

التوفل يبغاله براكتس
عندك تمارين التوفل الي في السي دي انا اشوفها مفيده

حاول تسوي براكتس قد ما تقدر سواء في الماث او التوفل
اذا انت 04 اسحب على كل شي في الكورس وركز على التوفل وبس

واذا انت 05 عادي لا تشيل هم التوفل على حسب ما سمعت انك تقدر تعيده ولا تنطرد

أتذكر جبت 13 في أول ميجر و جاني تحطيم شديد مثلك . شديت و جبت 18 بالثاني وكان أصعب بكثير . و شديت و جبت 35 في الفاينل تقريباً . يعني الميجر الأول لا يعني شي إلا إذا ألحقت به الثاني … ذاك الساعه يبيلك ترتاع . لذلك شد حيلك . كل يوم 3 ساعات متواصلة بمتعه و تفكير و لو تقعدها كلها على سؤال واحد . بتحس بطعم حلو بعدين : )

اطرد افكارك المحبطة

و استبدلها بافكار رائعة عن الاجتهاد

ولا تنسى الدعاء … تراه يصنع الأعاجيب ( مجرب )

ابدأ مذاكرة من أول يوم بعد الاجازة

وروح لمدرسك بالاوفس مرة واحدة اسبوعيا فقط كافية

و اكتب نوت مع مدرسك

عادي جدا جدا جدا

و انا بعد يوم كنت سوبر اوريا خذت في ميجر 10 و عديت يا ربي لك الحمد

انا في ماث 002 أخذت 9 في الميجر الثاني و12 في الميجر الأول … والكلاس وورك خسف فيني الدكتور …
لكن الحمدلله … عديت

صدقني بسيطة …
الله يوفقك

فكر بمنطقية واترك عنك العواطف، الخيار الوحيد المتاح أمامك(باستثناء الجلوس في البيت لمدة تقارب السنة) هو أنك تجتهد وتبذل كل ما تستطيع عشان تعدي الماث والانجلش ، وفقك ربي

شد حيلك وقاتل وتراها سهلة انك تنجح وبقريد بعد متى ما استبعدت الافكار السلبية من راسك

" شد حيلك" ,

ممكن بعض الناس يفهمونها على إنها " توكل على نفسك " , وقد خاب من توكل عليها . توكل على الله , وثق بالله إنه راح يصلح حالك وأحسن الظن به .

غير مكان مذاكرتك , أطلع للكومن روم ولا المول ولا أحدى المباني الأكاديمية,

حاول تذاكر مع طلاب " إيجابيين" , صراحةً شفت فكرة حلوة في قسم السنة التحضيرية إن فيه قروب يتجمعون ويذاكرون مع بعض , وترا أحسن شي لما تكون ما تعرفهم عشان تنجزوا أكثر وما يكون بينككم سوالف وغيره.

لو ذاكرت لحالك , شغل قرءان , و أختر لك قارئ تحب تسمع له . فإنه يهدي الأعصاب وترتاح نفسيتك حتى لو لم تكن متابع للشيخ .

سجل بحلقة تحفيظ قرءان , وخلها الفجر , ممكن تقول إن ما عندك وقت عشان تحفظ , أظن إن خمس أيات إلى وجه واحد يوميا لا تضيع وقتك .

ولو قلت " ما عندك وقت" راح يكون فعلا ما عندك وقت , الوقت موجود , وقدامك فرص كثيرة , أستغلها إستغلال حقيقي.

كل ساعة مذاكرة , خذ لك بريك أبو ربع ساعه إلى عشر دقايق , أقرا مع الشيخ وركز على التجويد. وحاول تكون السورة حقك حفظ الحلقة.

أدع ربك بكل ساعه , لا تمر ساعة إلا وأنت رافع يدك للسماء ورافع يدك وطالب الله ان يصلح حالك .

صدقني فيه طلاب يتمنوا إنهم يكونوا بمكانك , لأنهم يحبوا شي أسمه " تححدي " ولازم تبدأ تتحدى مع نفسك أولا وتنافس , هذا لا يعني إنك تضيق على نفسك , بل بالعكس عطها حقها ولكن دع التحدي يكون من جهة راحة النفس.

غير الجو وأطلع للجم , مارس الرياضة الله تحبها , سباحة كورة وغيرها .

سورة التغابن فيها الكثير من العبر والآيات العظيمة عن التقوى ومن يتق الله ما هو ثوابه .

عليك بأذكار الصباح والمساء .

“العظماء ما بلغوا عظمتهم إلآ لأنهم قدروا على التحدي وبلوغ مبتغاهم.”

أعضاء المنتدى هنا لمساعدتك لإجتياز محنتك, ولكن المطلوب منك فقط هو فعل الأسبآب , إجتهد إجتهد إجتهد.

صدقني لو جلست راح تطلع الجبل و راح تجيب الاونر بالجبل

ممكن اكثر كلام واقول سوي وسوي وسوي بس انت اخلق نصايحك بنفسك وتعلم من اخطائك

ووالله الاوريا سهله وانا كنت بمكانك يوم رسبت بالماث والانقليش واخر فرصه وخبست بميجر 1 ماث والميد تيرم انقليش لكن ما هربت

كمل لا تهرب

وعليكم السلام ورحمة الله
عزيزي الإخوان اللي قبلي كلهم قالو لك استمر وشد حيلك والله ييسر لك
أنا مع إحترامي للجميع رأيي مخالف
ياعزيزي إذا شفت وجودك في الجامعة متعبك نفسيا ومنت قادر تحقق اللي تغباه وأنت جربت وحاولت كل شي في يدك بعد توكلك على الله سبحانه وتعالى
فمع احترامي أرى أنه من غير العقل إن الإنسان يبقى في مكان ماراح يوصله لهدفه
أنت قبل كل شي حدد هدفك وش تبغى تكون بعد ماتتخرج إذا تبغى وظيفة في شركة وماتفكر في إكمال دراساتك العليا كثير فأنا اقول مثل ما قالو الشباب كمل
ولكن إذا هدفك دراسات عليا فلا والله حول من الجامعة وريح راسك
وعشان لا يجيني واحد مدرعم أنا قعدت في الجامعة 3 سنين وماأخذت F في أي مادة ولله الحمد يعني above average يعني مو عيب الإنسان يحول عادي أنا الحين حولت ومرتاح الحمدلله الأشياء اللي قعدت 3 سنين أحاول أحققها في البترول, الله يسرها لي في جامعتي الحالية في أسابيع قليلة فما تدري وين تكون خيرة الله
عموما بالنسبة للتحويل ومن تجربتي هو دائما بعد نهاية الترم الثاني في أغلب الجامعات السعودية ولكن ممكن تروح على عميد القبول والتسجيل في الجامعة اللي تبغى تحولها ويعطيك استثناء على الترم الثاني
والله يوفقك
الحين ركز في هذا الترم ونهايته خير
ولا تيأس الخيارات قدامك مفتوحه

السلام عليكم
مرت علي الحالة هذي اول ما دخلت الجامعة , كنت افكر بابوي اللي حاط فيني امل كبير وفرحان عشاني دخلت هالجامعة بس الشي اللي مخوفني مرعبني لدرجة كبير الرياضيات والانجليزي (التوفل بالاخص) كنت اشوفها صعبة معقدة وبديت افكر اني ما راح اعدي الا بالحظ , وكان اغلب تفكيري كذا لدرجة اني ما كنت افكر ادرس كثير لان هالتفكير مسيطر علي ,بصراحة اول ما دخلت الجامعة كان فهمي للرياضيات صعب وحسيت اني ما اعرف رياضيات , (لكن سمعت اكثر من شخص يقول ان الرياضيات ممارسه ) وحط ببالك انه مو اي واحد ينقبل بهالجامعة , يعني مستحيل يقبلونك وانت فاشل :slight_smile: لازم يكون فيك اكثر من سبب انك تنقبل بهالجامعة , وعلى فكرة انا انقبلت بالدفعة الثانية ( كانت نسبتي 81.3 والنسبة المطلوبة 82 ) كنت دايم افكر بهالموضوع واني ماني كفو وافكار بصراحة اعتبرها زباااالة ووساوس عجيبة اول كويز جبت فيه 30 من 100 وثاني كويز بعد 30 وثالث كويز 10 من 100 !!! تخيل ؟ صرت افكر باقاربي واهلي اللي يحسبونني نابغة :“”( وكان مدرسي يقولنا دايم ان الرياضيات ممارسة وفعلا بديت احل تمارين كثير واولد اقزامز واحاول افهمها زييييين , اول الوقت كنت اوقف بنص الحل ولا اعرف اكمل لاكن مع مرور الوقت وحل تمارين كثييرة والممارسة تعود عقلي على الرياضيات وصار يعرف الطرق والاساليب اكثر من اول بكثيييييير (حسيت انه صار مرن مع المسائل الرياضية اكثر من اي وقت) !! معقولة ؟ صرت احب احل مسائل واحب افكر فيها !! (على فكرة كنت اكره الرياضيات بالثانوي واتوقع السبب انهم كانوا يعلموننا الرياضيات بطرق غلط) والحمد لله اول ميجر 15 من 20 واندهشت ان عقلي قدر يجيب هالدرجة !! ماكنت متوقع اني راح اجيب درجة زي كذا صدقني مريت بشعورك وتفكيرك هذا وجربتة وعانيت منه لأسابيع كنت احس انه هذا مو مكاني, غير الناس اللي قالولي وضعك سيء ومدري وش ] وبالنهاية حط هالعبارة برااااسك واشتغل عليها (الرياضيات مماااااارسة ) حاول تجمع اسئلة من كلاسات ثانية وريزيتيشن واولد اقزامز وشف الكويزات الصعبة حقت الكلاسات الثانية صدقني بتجيب فوق 15 بالميجر الثاني , الفرق بيني وبينك اني عرفت مشكلتي بدري , وانا الحين اقولك حل هالمشكلة اللي عانيت منها شخصياً واختصر عليك القصة . بالنسبة للانجليزي يبيلك تراجع الدروس وتترجم الكلمات اللي ما تعرفها كل يوم بيومه وصدقني وضعك بيمشي فالسليم ان شاء الله (اسأل مجرب ولا تسئل طبيب)

بدرررري على مثل هالقرارات ، أقل شي بعد الترم الأول