بصراحة ما أبغى أكبر الموضوع وهو صغير… لكن ظاهرة ترفع الضغط… وهي ترك علب الحليب الفاضية في الصينية ترى والله ملينا… في كل مبنى وفي كل يوم تلاقي اقل شي 3 علب فاضيه موجوده (فاضيه مو باقيلها شوية)
المشكلة ان سلة المهملات جمب الحليب والسكر… مدري ليه طلاب كثيرين يصرون على تركها في الصينية… (إلا لو كان طالب واحد يشرب حليب كثير ويداوم في كل المباني)
أتمنى أننا نتحضر شوي ونرمي مخلفاتنا (سواءً علب الحليب الفاضيه أو أكياس السكر المستخدمة أو غيره) في سلة المهملات… المكان مو بس لي أو لك… المكان للجميع…
وزي ما علمونا في مادة الوطنية في المتوسطة: (أترك المكان أنظف مما كان)… ما نبغاه أنظف… بس نبغاه زي ما هوا على الأقل
شكراً للي راح يستجيب للموضوع… نتمنى نشوف تغير من بكره…
اقترح يضعون كاميرات مراقبة في كافتيريا كل مبنى تقفط الطلاب اللي يسوون هالحركة ويتم تحويلهم لعمادة شؤون الطلاب عشان يوقعون تعهد " عدم رمي علب الحليب الفارغة "
أو يركبون سينسر في كل علبة حليب ( ممكن يستغلون ويت العلبة هنا ) .
أو يوظفون طلاب ببارت تايم يسنترون عند طاولات علب الحليب .
لا صراحة الحالة ماينسكت عنها
لزوم نبلغ الشيخ بالسالفة ثم(ن) ننشئ حملة ع الفيس بوك " رمي علب الحليب الفارغة "
شوفوا، جرب الآن استخدم موية المنهل ولا نوفا ولا اي نوع اغله بالغلاية ثم حط فيه ليبتون واحد , راح يستغرق الليبتون اقل من 5 ثواني عشان ينتشر في الكأس , بكره رح للجبل وجرب الليبتون مع الموية حقتهم وشف كم ياخذ وقت غير الطعم الغريب للشاهي السادة
ههههههههههههههههه حاس بمعاناتك من جد حاجة تنرفز فيه بعض الشباب لازم يناحسون بكل المواضيع
بالنسبة لي كلامك سليم … وللأسف دائماً ألاحظ بجامعتنا (ومجتمعنا بالعموم) ان الغالبية ما يراعي مدى تأذي غيره بسببه على سبيل المثال عندنا بالجامعة الي يدخنون بكل مكان ولا عليه من اي احد ويقلب لك المكان ديوانية بيته
أيضاً بأماكن المذاكرة بالجامعة تقعد تذاكر وتبي جو هادي وابسط حاجة عند بعض الشباب الله يهديهم يسولف مع خويه بأعلى صوته ولا يكلم جوال ولا كانه بمكان عام مخصص للي يبي الهدوء
على العموم الموضوع ذا يطول والواحد ما عنده الا انه يقول الحمد لله على كل حال والله يصلح حالنا دائماً
