سابك شركة ضخمة لكن ابتدا يظهر لها منافسين (صدارة-ساتورب…الخ) بينما أرامكو هي أضخم كيان اقتصادي بالشرق الأوسط وتعتبر شريان للدخل الوطني
بي دي بي سابك سنتين بينما أرامكو ثلاث سنوات
الإبتعاث للدراسات العليا في سابك صعب ونادر (الا اذا كنت على كادر الباحثين) على عكس أرامكو حيث الفرصة للإبتعاث أسهل نوعا ما خصوصا اذا كنت مهندس
ادارة التطوير المهني في سابك صغيرة ويادوبهم أعادوا تشكيلها بطريقة حديثة وشغالين يبنون في الأساسيات (اللي أرامكو خلصت منها من زمان) وانت وادارتك بخصوص تطويرك بعد نهاية البي دي بي بينما أرامكو عندها جهاز ضخم للتطوير البشري وسستم واضح الكل شغال عليه
سابك مافيها اي نظام بخصوص تكاليف الشهادات المهنية وانت وادارتك بينما أرامكو فيها نظام رائع بخصوص تكاليف هالشهادات وتشجيع عليها من قبل الشركة
مكافأة نهاية الخدمة في سابك أعلى من أرامكو
أرامكو توفر لك العلاج في مرفق طبي واحد وبعد التقاعد يستمر لك ولزوجتك بينما سابك تأمين طبي (حاليا مع بوبا VIP class ) وبعد التقاعد يستمر خمس سنوات فقط لك ولزوجتك ووالدينك (طبعا التقاعد في سابك هو الإجباري عند الوصول لسن 60 هجري- ماعندهم شي اسمه تقاعد مبكر الا اذا هم عرضوه عليك وبرضو وقتها يستمر العلاج خمس سنوات فقط)
التقاعد الإجباري في سابك عند وصول الموظف لسن ال60 هجري (بينما مكافأة نهاية الخدمة يتم إحتسابها بعدد سنين العمل الميلادية) بينما أرامكو سن التقاعد 60 ميلادي
بدل النقل الدائم في سابك 10٪ من الراتب الأساسي بحد أعلى 1000 ريال لقريد 13 ونازل وحد أعلى 2000 ريال لقريد 14 وطالع بينما في أرامكو اذا كان بيتك في نفس المنطقة اللي يقع بها مقر عملك (مثل اللي ساكن في الدمام وشغال في الظهران) ماتوصل للمبالغ هذي (طبعا اللي شغالين في مناطق نائية يختلف الوضع والبدلات أحسن بكثير)
مناطق عمل سابك هي الجبيل - الرياض - ينبع. مركزها بكاوست للبحوث فقط، ومكاتبها بالدمام وجدة مهمتها خاصة بتنسيق اعمال المبيعات وشحن البضائع وأعداد الموظفين فيها زائدة عن الحاجة والشركة تسعى لتقليصها والنقل لها يبيلها (سوبر واو) على عكس أرامكو الممتدة في كل مكان (وان كان النقل ماهو بذيك السهولة)
في سابك مالهم شغل فيك اذا كانوا اهلك في ينبع وانت مقر عملك الدائم بالجبيل على عكس أرامكو اللي عندها نظام حلو بخصوص توفير الطيران للموظفين في مثل هالحالة
سابك ممكن توفر لعائلتك سكن جاهز في منطقة عملك فقط مقابل خصم بدل السكن وفواتير الخدمات طبعا عليك
في سابك ممكن تجيب لهم بيت في منطقة عملك فقط يستأجرونه من راعيه بمبلغ معين على حسب عدد الغرف وعمر البيت (حد اقصى 63 الف بالجبيل سنويا) والفرق (ممكن يوصل لفوق ال10 الاف سنويا) تدفعه انت (اغلب اصحاب البيوت اللي يأجرون بهالطريقة يشترطون انك تدفع الفرق عن كل سنوات العقد مقدما)
برنامج القروض السكنية في سابك (يختلف عن برنامج تملك البيوت المبنية من قبل الشركة) متوفر لك فقط في منطقة عملك وسداد القرض في مدة اقصاها 15 سنة بالتقسيط وفيه تكييش اذا حبيت واذا طلعت من الشركة قبل انتهاء السداد يخصمون الباقي من مكافأة نهاية الخدمة واذا ما كانت كافية طالبوك بسداد فوري للمتبقي بينما أرامكو فيه أريحية كبرى بخصوص المنطقة اللي يقع فيها البيت وأعتقد اذا تركت العمل يوفرون لك خيار التقسيط بشروط عديدة طبعا.
برنامج تملك البيوت المبنية من قبل الشركة في سابك متوفر لك فقط في منطقة عملك ويوفر طريقة واحدة لسداد قيمة المنزل عن طريق خصم بدل السكن زائد 17٪ من الراتب الأساسي واذا استقلت من الشركة قبل الإنتهاء من سداد كامل المبلغ عن طريق الأقساط يسحبون البيت منك ويرجعون لك فقط مجموع مبالغ ال17٪ اما بدل السكن فيعتبرونه ايجار مقابل البيت ولا يرضون بخصم المبلغ من مكافأة نهاية الخدمة أو التكييش أما أرامكو فأنا سمعت انهم الحين يبنون بيوت للتملك واعتقد طريقة السداد نفس طريقة سداد القروض. (ملاحظة: في سابك، اذا أوضحت الحسابات إنك راح تتقاعد إجباريا قبل الإنتهاء من سداد قيمة المنزل بالتقسيط، يجبرونك تدفع المبلغ المتبقي مقدما قبل الحصول على المنزل)
مادري ليه موضوعك استفزني اكتب هالمقارنة الطويلة P: بس اتمنى اني ما سببت لاي احد المل 
