خلوني اختصر عليكم و أعطيكم خلاصة من الموقف الي صارلي مع ادارة الاسكان.
أنا روميتي جاه دسمس من الجامعة لفترة الصيف, معناه هذا الكلام اني صرت فرادى. المهم, الاربعاء الماضي رجعت من الدوام الساعة 5 تقريبا لأتفاجئ من أغراض في غرفتي 
فعرفت من وقتها ان الاسكان شكلهم جابولي روميت. قلت لنفسي غريبة الاسكان دخلو غرفتي بدون ما يعلموني شيء عن سبب دخولهم لغرفتي , فتشت الغرفة على أمل اني ألقى ورقة من الاسكان يعلموني ان فيه واحد دخل غرفتي و حط أغراض بدون علمي و بعد نصف ساعة من التفتيش ما لقيت أي ورقة, قلت اوكيه شكلهم أرسلولي رسالة في الايميل و بعد البحث في الايميل عن رسايل آخر شهرين ما لقيت أي رسالة من الاسكان. فكرت شوي و قلت لنفسي “اذا انا ما علموني انهم رمتوني مع واحد أكيد الي جابوه عندي ما يدري انهم شالو أغراضه من غرفته و رمتوه عندي” فقررت اني اروحلهم شخصيا و أشوف وش السالفة. رحت لهم اليوم كلمت الموظفين و قلتلهم السالفة قالي الموظف الأول انهم ارسلولي رسالة قلت له “ما أرسلتولي أي رسالة” قال" الا حنا معلمينك انك فرادى و ان ما ضبطت وضعك و بحثت عن روميت سيتم دمجك مع فرادى ثاني" قلت له “على عيني و راسي تحطولي روميت تنقلوني هذا شغلكم و أنا متفهم الوضع و لكن موب من حقي انكم اذا دخلتم عرفتي- لأي سبب من الاسباب - انكم تنبهوني انكم دخلتو غرفتي عن طريق ارسال رسالة في الايميل أو أقل شيء تحطون ورقة فالباب مكتوب فيها انكم دخلتو غرفتي و نقلتو أغراض لغرفتي؟” قال لي الموظف الأول : “حنا ارسلنالك رسالة” فدخل في الموضوع الموظف الثاني يكلم الموظف الأول و قال " هو يقصد انا نرسله و نقوله ان الطالب الفلاني دخل غرفته" و قال لي “الرسالة هذي ما نرسلها لأن صعب نرسل الرسالة هذي لطلاب كثار” قلت له: “طيب كيف تدخلون غرفتي الي هي خصوصيتي بدون ما أتنبه انكم دخلتوها و هل يعني هذا ان الرجال الي جبتوه روميت عندي ما يدري انكم نقلتو اغراضه عندي؟ " قال لي الموظف الأول “الغرفة الي ساكن فيها انت هي غرفة الجامعة و ليست غرفتك و حنا ارسلنالك رسالة انك فرادى و لازم تضبط وضعك”
قلت له " انت واع عن الكلام الي قاعد تقوله الحين؟ انت قاعد تقولي ان من حقكم تدخلون عرفتي بدون أي تنبيه لأي سبب من الاسباب , أنا ما طلبت شيء كبير أقل شيء تقدرون تسونه انكم تكتبون لي رسالة في ورقة انكم دخلتو غرفتي. و الرجال الي نقلتوه هل يدري انكم جبتوه عندي؟”
قال لي الموظف الثاني : “ارسلنا له رسالة” قلت له ايش دراني انكم ارسلتو له؟ أنا ما جتني أي رسالة شلون هو ترسلون له؟ " قال لي " ما تصدقنا يعني؟" قلت له : “طيب ممكن تعطيني الأي دي حقه عشان أتفاهم معه و أنبهه ان أغراضه عندي؟” قال لي" ممنوع نعطيك الايدي حقه" قلت له : “طيب ممكن انت ترسله رسالة الحين ؟ " قال لي” ياخي ارسال الرسايل هذي مهي شغلتي"
قلت له “طيب من يرسل الرسايل للطلاب؟ موب الاسكان الي يرسل الرسايل؟ يعني رسالة تجيني مكتوب فيها ادارة الاسكان هذي تجي من قسم ثاني فرضا؟” قال لي الموظف الاول “أول ما كنا نرسل رسايل الحين بدينا نرسل رسايل” قلت له “طيب تكتبلي ورقة و تحطونها فالباب طيب؟ هذا كان أول الحين الوضع متحضر صار عندنا نت التواصل صار اسهل و لكن حتى لو ما فيه نت أقل شيء انك تكتبلي ورفة ياخي” قال لي “الطلاب صارو متدلعين” رد الموظف الثاني : “حنا أصلا نحط ورقة رسمية من الاسكان اذا دخلنا غرفته و نحطها بالباب و لكن في الصيف ما نسويها” قلت له “ليه ما تسونها في الصيف؟ هل انت ترضى أحد يدخل بدون ما ينبهك على الأقل؟” قال لي الموظف الاول “هذا في فرنسا (مدري ايش الدولة الي قالها) مو هينا” كان اسلوب الموظف الأول استفزازي شوي,
فسألت الموظفين و قلت "انا أبغى أتكلم مع الرجال الي شلتو أغراضه و حطيتوه عندي ايش اسوي؟ " فقال لي الموظف الثاني “انتظر الين ما يجيلك” .
سألت عن المدير و لكن للأسف كان مو مداومر مع انه وقت دوامه بس وش نسوي.
انا اشاء الله بكرة رايح للاسكان عشان أكلم المدير عشاني أبغى أعرف وضع الرجال المسكين الي رمتوه معي وش وضعه هل يعرف انهم رمتوه عندي؟ يدري وين أغراضه؟
على العموم آرائكم في الموقف الغريب؟
