جاني عرض اليوم من ارامكو و لله الحمد كتالي:
اداره التنقيب (Exploration)
الوظيفه (محلل نظم اعمال 4) الي هي بالانقلش (Business System Analyst IV)
الراتب (11605)
بدل سكن (3 رواتب)
راتب رمضان
الموقع: الظهران
هذه الي موضوح بالعرض… و بعده كاتبين: خطه الحوافز --> علي حسب نظام الشركه
الي مستغرب منه انه مافي بدل مواصلات
و سؤالي هنا هل هذه الاداره كويسه بالنسبه للمستقبل؟؟ هذا اهم شي!!
هل الراتب يستحق؟
مع العلم اني متخرج من امريكا بتخصص ادارة نظم معلومات بمعدل (3.8/4) و حاليا شغال في سابك كــ(مخطط مخزون) و تقريبا نفس الراتب و المميزات باضافه بدل المواصلات 1000 ريال
لو كنت مكانك كان ما اطلع من سابك و اروح ل ارامكوا ولو عرضوا علي فوق الراتب 6000 ريال طالما اني مبسوط ومرتاح في شغلي ومع الزملاء وخصوصاً المدير… ارمكوا خلاص عجزت وما صارت زي اول. يا حبي ل سابك … سابك 1+1 = 2 يعني النظام هناك يا حبيبي يمشي على الكل ومافيها فسادأ و لنقل من اقل الشركات فساداً. شوف يا استاذ… فساد = مشاكل في العمل بالنسبه اذا كان الشخص يعي مسؤوليته وواجباته تجاه الوظيفي وامانته.
والله ثم والله افضل شركه في المملكه من ناحيه المهنيه والنظام وقله الفساد هي سابك. ارامكوا قديماً كانت زي سابك ولكن دب فيها الفساد وسرقات وبعض الاحيان عشان تتوظف في ارامكوا تدفع مبلغ وقدره وما شاء الله هناك مبدعين في الواسطه هناك انواع الفساد وقله الوعي في الاحساس بالمسؤوليه، لكن هنالك من موظفين يخافون الله في ارامكوا ولايعملوا هذي الشغلات وقد تحصل لهم بعض المضايقات في العمل، لكن هذا رأيي والرأي رأيك في اتخاذ القرار. اتمنى اكون احد منسوبي سابك لكن الخيره فيما اختاره الله…
انا اعلم اني تكلمت بصوره عامه واكبر قليلاً عن موضوعك، لكنها جزءاً لا يتجزء.
خطة الحوافز هي 1.6 راتب * تقيمك * عامل الشركة قرض ارامكو تكون مستحق له بعد 4 او 5 سنوات وفي فرصة توزيع اراضي مجانية في احدى احياء ارامكو مثل في حي قريب هافمون يقلون بيزعون فيها بس اتوقع بيكون في انتظار
بشكل عام لما تكون ادارتك لها فرعين في الظهران وفي مثلا تناجيب فرصة خروجك لدورات تدريبية يكون اكثر في تناجيب. انت حدد اولياتك تبي القرب ولا تبي التطوير . اذا كان في تطوير افضل في ارامكو رح لها واذا سابك خلك بسابك.
اسوأ شركة في المملكة من ناحيه المهنيه والنظام والفساد هي سابك .
شركة سابك اخذت جائزة افضل شركة في الواسطات والمحسوبيات ، يا رجل انت مهندس يجيك واحد تكنيشن وعلاقته بالرئيس حلوة يصير هذا التكنيشن رئيسك ( سلاماااااات ) !!!!!!!
شركة تفتقد للمهنيه ، اكبر مثال عندك ادارة المشاريع ( روح شوف الفرق بين ادارة مشاريع ارامكو وسابك ) . ( سابك كلها ابو هنود وفلبن ) .
هذا غير العيشه في الجبيل والحياه فيها اللي تجيب الهم والغم والانتحار وغلاء المعيشة الفاحش ، تلاقي بيت ايجاره فوق 40 الف على شي ما يسوى ، والله لو اني في سويسرا ما استاجر بالمبلغ هذا ، ناهيك عن بيئة المصانع من الناحيه الصحيه دمار ، والحياه الاجتماعيه سيئة ، وخصوصا صاحب الموضوع من الغربيه ، يعني الجبيل تعتبر قريه بالنسبه له .
يا صاحب الموضوع … باختصار شديد :
الراحة النفسيه فوق كل شي ، لحد يجي ويقلك سابك احسن والا ارامكو احسن . انت حدد اولوياتك ، تحب تعيش في صخب المدينة ؟ تحب تعيش في جو هادئ زي الجبيل ؟ تهتم بالتطوير والاستقرار ؟ معاملة رئيسك معاك حلوة ؟ بالعربي مرتاح في شغلك ؟
اهم شي راحتك
انا محدثك جلست في سابك اقل من خمس شهور وعجزت اتحمل الجبيل والخياس اللي فيها وبعد ما ارتحت بالشغلة اللي راح اشتغلها وكنت من كرهي للجبيل اطق مشوار من الدمام الى الجبيل يوميا
المهم الحمدلله وفقني الله وجاني الان فرصة في ارامكو الظهران
اللي باوصله لك
“اهم شي راحتك”
اينما وجدت الراحة النفسية اينما وجد الانتاج
استخر والله يوفقك…وحط في بالك ريال فيه بركة خير من ١٠٠٠ مافيها بركة …وتوكل على الله … لا تفكر في الفلوس كثر ما تفكر في الجوانب الاخرى مثل الراحة الوظيفية … الاستقرار … الفائدة العائدة عليك من الوظيفة مستقبلا …
من ناحية اخرى :: الاخ Test123 والاخ سعادة المهندس…
اتوقع انكم مهندسين وعاقلين وفاهمين … ممكن تعطونا اثبات على الكلام اللي كتبتوه ؟؟!! اذا بس سمتعم ولا احد قال لكم ولا بس نقلتوا كلام قريتوه في احد المواقع … فهذا ما يجوز … وحتى لو كلامكم صحيح … اش الفائدة العائدة على الاخ aalshareef ؟؟
لو كان فعلاً داقها الفساد زي ارامكو والبلديات زي في الظهران والدمام والخبر كان شفت الجبيل الصناعيه زي الدمام والخبر. اجمل مدينه في السعوديه من حيث التنظيم والاهتمام بالشوارع والبيوت والمرافق هي الجبيل الصناعيه. ناهيك عن زيارة حقين البلديه للمطاعم ومحلات الحلاقه ومحلات السلع بشكل اسبوعي لمراقبه الجوده. صح ولا لا؟ والله انك تحس مو في السعوديه.
هذا يدل على حسن التنظيم وحس بالمسؤوليه. انا ما اقول ولا اجزم سابك 100% مافيها فساد لكنها اقل فساداً من اغلب الشركات.
وعلى فكره انا لست متعصباً، لو جاني عرض من ارامكو فقط سأقبله اذا كان هو خياري الوحيد لكن هذا لا يعني سأعمل فيه على المدى البعيد او المتوسط. لكن لو جاني عرض من سابك وارامكو ل اخترت سابك بالتأكيد. عموماً، هي اختلاف في الاراء وهذا شيء ليس مستغرب فكلاً يدلو بدلوه.
ولصاحب الموضوع ترى هذه ارائنا فيما يتعلق بموضوعك. واعتذر لك وللاستاذ سعاده المهندس اذا سببت اي ازعاج او اني طلعت من برا الموضوع.
أهم شي الراحة النفسية هي رقم 1 صراحة لانك اذا ارتحت نفسياً راح تفيد و تستفيد بينما لو ما كنت مرتاح نفسياً فما راح لا تتهنا براتب حتى و لو كان عالي و ما بتنتج و ستصل لمرحلة من الكره لوظيفتك و المكان اللي انت فيه . فلذلك الجانب النفسي مهم جداً جداً
^^ نفس السيناريو …بس اتحملت واستنيت 8 شهور على اساس تجي الخطه الي قالو وقت المقابله انها جاهزه يوم تجي … اتحطمت اني انجنير بسابك ماتحس في تطوير ولا شئ ومديري تكنشن وطب فجاه منجر علينا … ومضيع القسم وضايع بالميتنقز وبس يحول الأيميلات علينا والشغل حوسه … وشغلك ترد على الأيميلات وتكلم فندر لو صارت طعه …
والخطه والدورات لكل المهندسين نفسسس الشئ … شي يحطم صراحه … اني بعد سنتين بلاقي خبره يمكن 10% داخل مجال عملي …
عموما عموما ترجع لقسمك لو مرتاح لا تروح تجرب بشئ ثاني … لو مو مرتاح وتحس ممكن تكون لك فرصه افضل خارج سابك فا قلهم مع السلامه …
الجبيل هذي اللي انت شايفها حلوة ومرتبه مو بسبب سابك لا .
هذي يا حبيبي بسبب الهيئة الملكية بالجبيل وينبع متعاقدة مع شركة اسمها بكتل شركة مقاولات امريكية محترمة ، الشركة هذي هي اللي بنت الانفاق والجسور وزينت الشوارع والكورنيش اللي انت شايفه في الجبيل الصناعيه .
يعني سابك مالها اي دخل بتطوير الجبيل ، والا كان سابك اللي في الرياض طورت الرياض من باب اولى .
اللي جالس يعزز لسابك
اخوكم في الله خريج علوم حاسب جتني فرصة بشركة كيميا وظفية بمسمى application eng !!! اللي يعرف هالشغلة يعرف ان الشغلة شغلة process control !!!!
الشي المضحك ان في الجوب دسكربشين من المتطلبات لهالشغلة انه يكون الموظف مهندس كيميائي والا سيستم انجينير !!! التخصص حقي في وادي والشغلة بوادي ثاني
المهم يوم شفت الغلط ورحت اسال المنجر حقي ليش موظفيني بهالمكان قالي الشايب “يقصد GM” يقول جيبوا واحد حاسب الي خلونا نجرب ونغير هالمرة !!! قلت وانت راضي بالموضوع ؟! قالي لا !!!! يعني موظفيني بدون مشوارة مديري !!
هذا ان دل دل على ان المنجمينت رايح في ستين داهية!!
يارجل بالوقت اللي كنت موجود فيه اعرف ثلاث مهندسين كيميائين استلموا ثلاث رواتب وهم “منسيين” بمكاتبهم لا شغل ولا مشغلة !! هذي وهي من افضل شركات سابك
على العموم انا اقول دايم تعتمد الشغلة على مديرك وعلى طبيعة العمل والراحة النفسية
دور هالاشياء والله يعينك وييسرلك
صحيح هو بسبب الهيئه الملكية وقد اخطأت في ردي السابق. اشكرك على تصجيح المعلومه. يعطيك العافيه
وكلمه اخيره لصاحب الموضوع انا مع اغلب الاخوان هنا… اذا انت مرتاح نفسياً في شغلك والمدير فله. اقترح عليك الا تنقل. لكن كما اسلفت في ردي الاول هو مجرد رأي شخصي
لا اعلم بعض المرات احس ارامكو وسابك زي نادي الهلال ونادي النصر ههههههههههههههههه
الف مبروك
انا اقول استخير واسأل اللي في نفس الديبارتمنت
وانا اللي سمعتو اللي تحت ال upstream معاملتهم غير واحسن وتطويرهم مختلف غير عن البقيه
ربي يوفقك وييسرلك
ولا يهمك حبيبي احنا هنا نتناقش ونتبادل الآراء ، دحين تلاقي صاحب الموضوع مو قادر ينام في الليل من كلامنا ههههه
وفعلا زي الهلال والنصر على قولك .
وارجع وأقول الراحة النفسية وحسن المعاملة هي الأساس بالكل يا صاحب الموضوع .
انا حاليا قاعد اخلص إجراءات دراسة الماستر في الهندسة الميكانيكية في جامعه البترول ( بارت تايم ) ، ان شاء الله اذا خلصت الدراسة وتخرجت ، بروح للجنرل منيجر تبعنا وأقول له ( شوف هذي شهادتي في ماستر الهندسة ، بتعطيني بوزشن وقريد والا لا ) ، اذا شفته ما عندك احد وقتها أقول لسابك مع السلامة .
بس حاليا لو جاتني أي فرصة في أرامكو ، بروح علطول .
تسلمو يا شباب و ماقصرتوا… وضحتو اشياء مهمه و اتمنى من له خبره خصيصا بالادراه هذه لا يبخل علينا… و ب ياليت تعطوني كيف طريقة التقييم و الزيادات السنويه… و ركزوا انه انا مو مهندس مووو مهندس و الوظيفه “محلل نظم اعمال”
انواع الفساد وقله الوعي في الاحساس بالمسؤوليه، لكن هنالك من موظفين يخافون الله في ارامكوا ولايعملوا هذي الشغلات وقد تحصل لهم بعض المضايقات في العمل، لكن هذا رأيي والرأي رأيك في اتخاذ القرار. اتمنى اكون احد منسوبي سابك لكن الخيره فيما اختاره الله…
ماتحس في تطوير ولا شئ ومديري تكنشن وطب فجاه منجر علينا … ومضيع القسم وضايع بالميتنقز وبس يحول الأيميلات علينا والشغل حوسه … وشغلك ترد على الأيميلات وتكلم فندر لو صارت طعه …