أنا أتكلم عن الوظيفة من حيث العمل في مجال التخصص , صدقني إن ما تخصصت في الشبكات والسيكيوريتي بتشتغل آي تي , سيستم ديزاين بيشتغلو سباكين في الشركات , مين يبغا سستم ديزاين في السعودية بالله ؟ , إحنا سيركت ما نعرف نسوي تبغا نسوي ulsi ؟
معليش أخوي ، بنفس المنطق ، ايش أهمية الهندسة الكهربائية ؟ احنا ما نصنع و لا نصمم أي دائرة إلكترونية أو نظام اتصالات أو محطة كهربائية أو نظام تحكم ؟ طيب على كذا ايش يشتغل المهندس الكهربائي ؟
الإجابة على الهندسة الكهربائية هي نفس الإجابة على هندسة الحاسب.
الموضوع هنا انقسم الى فرعيت و هي الوظائف في الشركات (خاصة او حكومية ) و الرواتب … باختصار, انا اتفق مع بعض النقاط
نبدأ بالوظائف:
1- الوظائف الهندسية و الغير اللهندسية متوفرة بشكل مهول جدا جدا جدا ولكن لازم تعرف الطريق المناسب للتقديم و احدى هذه الطرق:
أ- الواسطة: وهو حال وضع البلد . حتى الواسطة قد تكون غير مباشرة بمعرفة اسمك قد يكون الشخص اللي قدمت له الطلب يعرف احد من اهلك و تمشي امورك سهالات …
ب-التقديم المباشر: وهذا النوع المتعارف عليه في البلد لخريجي الجامعات و الكليات و غيرها. ان تحضر يوم المهنة و تطبع 100 سي في 50 منها تعطيها للشركات و من ال 50 40 منها في الصندوق او الزبالة اعزكم الله و 10 منها تجذب انتباه الشركات. مثلا, اعرف شخص راح يوم المهنة في جامعة من الجامعات و كان فيها شركات كبيرة حكومية و خاصة. و قدم على احدى الشركات و قالوا له “قدمت عن طريق الموقع” قالهم “لأ” قالوا له “قدم عن طريق الجهاز اللي ورا الكشك” قالهم " طيب و بعدين" قالوا له “انتظر اتصال او ايميل” مننا, قالهم “بس” قالوا “نعم”. طبعا الرجال ما دخل في راسه الموضوع و سحب على الموقع و راح يقدم على شركة كبيرة ثانية و من قبل لا يقدم سألوا عن معدله و ردوا عليه بالتقديم عن طريق النت. بأختصار الرجال قدم على شركات ثانية و لقى فرص ممتازة و بعضهم كانوا يرحبون به. رجع الرجال لاول شركة قدم عليها اللي صرفته و قالوا قدم عن طريق النت و نتصل عليك. الرجال قابل نفس الشخص اللي كان بالاستقبال و قاله عن تخصصه و المعلومات المطلوبة, المهم قالوا له “تفضل معنا للمقابلة الشخصية” !!!!!!!!!!, و بعدها مشت اموره الحمدلله. الهدف من ذكر القصة انه الموظفين اللي يجوا يوم المهنة غير واضحين و صريحين, ما يقول لك اكتفينا ولا يقولك نحتاج يخليك ضايع و لازم يحسسك انك تشوف الوظيفة شي محاااال.
ج- “انك تكون صبَّة”: احدى الحلول انك تدخل على الشركات " ان استطعت" و تحاول من هنا و هنا تجيب رقم ادارة الموارد البشرية و تقول لهم ابغى اتوظف في شركتكم لانها احدى طموحاتي و هذي الشركة من احسن الشركات … “تبهير”
بأختصار كمية المشاريع في البلد تدل على الاحتياج الكامل للمهندسين الجدد, لكن التوزيع خطأ او وضع الامانة لغير أهلها
2- الرواتب و الوظائف بالنسبة للاجانب:
سأقسم الموضوع هذا الى فرعين ايضا
أ- الوظائف المتاحة: في اعتقادي ان اغلب الوظائف المتاحة الان بحاجة الى خبرة كبيرة خاصة للمشاريع الحالية, و الخبرة هذي غالبا لا تتوفر في بلدنا و لذلك تلجأ الشركات الى التعاقد مع الاجنبي مع العلم ان السعودي لو عنده الخبرة, احلف بالله انه يطرح الاجنبي اذا كان منضبط و دقيق و امين و الامانة اهم صفة في العمل. و اذكر اني قرأت اننا اكثر بلد لديه نسبة عالية جدا من الشباب (70%)
ب- الرواتب: السعودية بالنسبة للجو و الطبيعة و اسلوب الحياة, 100% لا تناسب الاجانب (الاوروبي و الامريكي) و الكل يعرف ليش. لذلك تضطر الشركات بالتعويضات المادية و البدلات لجذبهم للعمل. لكن للامانة بعضهم عبقري جدا جدا جدا و من الممتاز ان تنقل خبرته للشباب السعودي.