السلام عليكم و ر حمة الله و بركاته
أنا طالب ثالث ثانوي و جبت في ثالث إختبار لي في القدرات 95 و أظن ترتفع في آخر إختبار و النسبة التراكمية أتوقع ما تنزل عن 98 بس خايف من التحصيلي ماقد جربته و في نفس الوقت أحس مذاكرته غثيثة و تحتاج وقت مو زي خويه قدرات الممتع … كل ما حاولت أجد أمل و أسحب على الكتاب الي هو تحصيل 2
…من يواسيني بتجربته الحلوة … أنا لو أجيب بس 76 ضمنت نسبة مركبة 86 هل أقدر أجيبها من غير مذاكرة قويه
وعليكم السلام ورحمة الله وبركاته
ما شاء الله عليك ، درجاتك جدا ممتازة ، واستغرب انك خايف من التحصيلي
وضعك الحالي ممتاز ، ودرجاتك في القدرات دليل على انك كويس في الرياضيات ، ما ادري عن بقية المواد العلمية
عموما، أخوك من دفعة 214 ، جاب 93 في القدرات وجاب 90 في التحصيلي ( آخر دفعة تختبر التحصيلي مرة وحدة ) [emoji16]
المهم في الاختبار التحصيلي هو مدى المامك بالمادة اللي راح تجيك في الاختبار ، علما بأن التقسيم - على حد علمي - هو 20% لأول ثانوي ، 30% لثاني ثانوي و 50% لثالث ثانوي
بالنسبة لطريقتي ، كان الاختبار وقتها بعد اختبارات الثانوية على طول ، اتذكر خلصت اختبارات يوم الاربعاء واختبرت تحصيلي يوم الاحد ، يعني الوقت قريب ، فكان عندي المام بمنهج ثالث ثانوي ، وبشكل أقل لمنهج ثاني وأول ثانوي
ذاكرت بعض التجميعات ، ولاحظت كثير اسئلة تتكرر من التجميعات + فيه كتاب كثير ينصحون فيه ويقولون كثير من الاسئلة اللي فيه تجي في الاختبار التحصيلي
صورته:
http://uploads.tapatalk-cdn.com/20160315/0e246083774aa219ea9f80d76ea09d2d.jpg
اللي اتذكره اني دخلت بالتجميعات ومن اختبار واحد وطلعت بـ 90 [emoji28] >> الحمد لله
عموما انت شد حيلك والله يوفقك ، وعلى درجاتك الحالية اعتقد 80 في التحصيلي راح تكون كافية لقبولك في الجامعة ؛ لكن شد حيلك واطمح لأعلى شيء ، بس من باب اني اطمنك بغيت اقول لك إن 80 كويسة عشان ما تخاف اذا شفتها
ملاحظة اخيرة: لو جبت درجة عالية في الاختبار الاول ، ادخل الثاني وبإذن الله راح تكون قادر تجيب أعلى لأنك تمرست على الاختبار
موفق
والله لو جبت درجة عالية في الاختبار الاول بسححب سيفووون عالاختبار الثاني:p بس مسجل الثاني احتياطا
والله كلنا عندنا رعب من الاختبار التحصيلي ذا , وانا نفس درجاتك في الثانوي والقدرات بس فررق شوي , التحصيلي قاعد اسوي اصعب طريقة للمذاكرة الي هيا امسك الكتب كلها كتاب كتاب وافصفصها من الجلدة للجلدة ! منها فايدة ليا وغير كذا استعداد للتحصيلي , والله يوفق الجميع 
نصيييحة، لا تفكر أبد بدرجة معينه، شد حيلك وحاول انك تجيب أعلى شي تقدر عليه، لأنه لو بتحط درجة معينة ببالك، غالباً بتجيب أقل منها حتى لو كانت نازلة جداً.
وبالنسبة لوضعك، فما شاء الله تبارك الله، درجاتك ممتازة وما يحتاج تشيل هم، وإذا ودك ترتاح من هم الاختبار ، ما فيه الا انك تشد حيلك وتذاكر قبله بشهر ع الاقل، عشان ما تلوم نفسك بعدين انك ما شديت حيلك…
الله يوفقك ويسدد امورك وكل اللي يختبرون 
الله يعطيكم العافية و يحقق أمانكم أشعرتوني بالحماس
الأيام تمضي بسرعة، توني أمس في الأسبوع التعريفي للجامعة
المهم، نظراً لوضعك الحالي أقدر أطمنك بالقبول إن شاء الله لو استمريت على نفس الوضع
لكن عندي لك نصيحة لا تاخذ الكتب وتفصفصها حبة حبة، ترا الأسئلة اللي تجي في الاختبار سطحية وما تهتم بالتفاصيل الدقيقة
التجميعات أهم شيء، كتب التحصيلي تشتريها وفي الأخير تمل منها، كتب المدرسة لو لك نية تذاكرها فـ ذاكر أسئلة التقويم الإختيارية والاختبارات المقننة اللي في نهاية كل وحدة، ترا تتكرر كثير في اختبارات التحصيلي.
هذا وفقاً لتجربتي المتواضعة، فيه في منتدى يزيد تجارب تحصيلي لطلاب دوافير ، أنا كنت أسلي نفسي فيها وقت الفراغ.
وأبشرك مستواك يبشر بخير، كذا شخص من اللي كانوا معي في الثانوية دخلوا التحصيلي على التجميعات بس وعلى معلوماتهم السابقة
وجابوا 85+ وبعضهم 80+ بالراحة ، سهلة لا تخاف .
نصيحة لما بعد التحصيلي / لما تخلص من التحصيلي لا تلعب، إذا كان مستواك في اللغة الإنجليزية ضعيف فإبدأ بتطوير لغتك فوراً، ادخل معهد لو كانت حالتك المادية تسمح، وإذا ما تسمح يا كثر المواقع على النت، لا تهمل الموضوع كـ نصيحة أخ لأخوه.
المهم انتبه لدروسك الحالية والله يوفقك ، أخوك دفعة 2015
عقبال ما نشوفك أوريا 2016 السنة الجاية .
الله يسعدك مشكور ما قصرت
هههه هههه هههه-قاعد أضحك على سؤالي-مسكين يا أنا قبل شهرين الاختبار أسهل مما توقعت و النتائج مرضية و الحمد لله لا تقلق يا قارئ الموضوع فالله معنا…
و مبروك للحاصلين على درجات مرضية في التحصيلي