اليوم و أنا متجه للسيارة بعد ما خلصت الدوام جاني أحد العمال سلم علي و كيت و كيت و طلب مني توصيله لشارع الدوحة التجاري… قلت له تفضل (وللعلم الموقف هذا تكرر معي مرتين قبل)
المهم و حنا بالطريق صار يفضفض لي و يشكي الحال… يقولي بما معناه يعني راتبي 350 ريال و غالبا أحاول على الظهر أروح أشوف لي شغلة أطلع لي كم قرش و يقولي بطاطس طماطم ثوم كله فلوس زيادة بس سراكو مافي زيادة… والله استغربت 350 ريال ! بالله هذه وش تسوي ! … بعدين قلت بنفسي أكيد في مميزات لهم من هنا ولا هنا… سألته سكنكم بالجامعة مثلا قالي لا بالدمام و استمريت أحاول أعرف وش في مميزات قالي بالحرف “هذا سراكو حتى موية مافي أعطي” حتى إذا فرضنا أنهم يعطونهم موية وش تسوي بالـ350 الرجال عنده أهل و مرأة…فرضًا فرضًا دفع 3-5 ريال يوميا على أكله لمدة شهر هذه 90-150 طارت ! بعدين سألني قالي انت في سالاري (Salary) قلت بنفسي أحلى شي أقوله إني أخذ 1000 كل شهر والله يجيه إغماء الرجال فلمحت له على مكافآت الأونر فقط
زبدة الموضوع… إني أتمنى زيادة رواتب عالضعوف والله حالتهم حالة… إذا في إمكانية يقللون عدد العمال و يزيدون الرواتب و الإنتاجية بنفس الوقت بكون شي ممتاز
فعلا رواتبهم قليلة جدا ويكسرون الخاطر خصوصا اذا شفت شايب في سن كبير اللي المفروض عيالة يقومون على خدمتة ورعايتة, لكن الغريبة ان عمال سراكوا يجلسون يفضفضون للطلاب الجامعة ويشكون الحال وهم عرفين ان مافي يدهم شيئ غير انه ممكن يعطيه 10 او 20 ريال , ولا يصارحون مسؤولينهم ويتشكون عندهم بتعديل رواتبهم اللي هي الجهة المعنية بالأمر واللي قادرة تسوي لهم شيئ !يمكن يكونون خايفين منهم ؟
فعلاً سمعت من أكثر من عامل ان رواتبهم 350 ريال لكن العجيب ان العامل اللي في عمارتي يقول لي تشوف العمال اللي لون ملابسهم أزرق غامق “المشرفين اللي يجون يشكيون” هذولا بس يدورون على العماير ورواتبهم قريب الـ 1000 ريال وحنا اللي نكرف من الصباح للعصر رواتبنا 350 ريال !!
المفروض الجامعة تتنبه لراتب العامل عن التعاقد مع الشركة
اجحاف بالحقوق
بعد ما قرات الموضوع تاكدت من الذي اخذ الاله الحاسبه و جهاز اخر بنفس حجمها و سامحتهم ان شاء الله
نفس الموضوع صار لي مع عامل و تكلمت عنه قبل في فترة في سنابي من الغبنة والله … شيء غير مقبول ابدا لاي شخص مسلم يعيش هالمعيشة ب 300 او 350 لكن م نقول غير حسبنا الله ونعم الوكيل في الشخص المسؤول عن امثال هؤلاء المساكين اللي يجيو من بلادهم عشان لقمة العيش وهو م يخاف الله فيهم
الله المستعان
انا المكافأة ماتكفيني لنص الشهر وكلها تروح أكل وهذولا المساكين رواتبهم 350 بالله ايش تسوي لهم
لكن اللي يقدر يساعدهم ولو بمبلغ بسيط لايبخل عليهم ويحتسب الاجر
السلام عليكم، الله يوفقك على كتابتك هذا الموضوع. الموضوع مرة غير مقبول.
مكتب العمل هو المسؤول عن حقوق العمال،
اتمنى نوصّل الموضوع أول شيء لإدارة الجامعة ( كيف تتعاقد مع شركات لا تحترم أدنى حقوق العامل)، إذا ما في تجاوب ، ننشر الموضوع في الإعلام و نبلّغ مكتب العمل.
حسب مافهمت منهم وتحسبا لدقة المعلومة، حبيت أشارك باللي أعرفه من بعض العمال:
1- رواتبهم أكثر من 350 ولكن يستقطع منها مبلغ عشان تجديد الإقامة فتصير 350 .
2- كانوا زمان ساكنين في صندقة زي اللاينات، كل 8 في غرفة.
3- الغرفة سرسرين اللي ب3 أدوار وسرير بدورين فقط (لايوجد حتى دولاب للملابس أو ثلاجة) الغرفة يادوب تشيل السرر.
4- الأن الغرفة أوسع شوي وصار مكانهم أقرب (قريب من مستشفى العيون على طريق الجبيل)
5- 350 تقريبا تروح في المكالمات مع أهله في البلاد !
6- الجامعة من وجهة نظري للأسف ضيقت عليهم من ناحية غسيل السيارات الي كان بالنسبة لهم دخل.
7- اللي يقهر إن في إجتماعات لجان الجامعة يعطونا كطلاب على كل إجتماع أظن 300 ريال وكذلك الدكاترة، يعني تطلع من الإجتماع وأنت ماعملت حاجة وتاخذ على الأقل أكثر من 60% من راتب واحد من هذول المستضعفين.
8- للعلم الشركات الثانية (مثل اليمامة) عندهم مشاكل أكثر، مثلا العامل لمن يشتغل شغل إضافي (غير الأساسي) في الليل، مثلا مشغل ألعاب في الملاهي، الشركة تاخذ جزء من راتبه الثاني بحجة إنها سمحت له !!!!
9- أنبه كل من له يد في تعديل الموضوع بأن التطفيف ليس فقط في البيع والشراء وأن الظلم ظلمات .
10- شكرا لكل من شارك.
