من دخولي الجامعه ولمده خمس سنوات كان حلمي العمل في شركه كبيره مثل ارامكو وشلمبرجير او العمل براتب جيّد في مدينه الرياض (عند الاهل)
جميع هذي الفُرص أُتيحت لي لكني ضيعتها …
دخلت مقابله في ترم 152 ( في يوم المهنه ) مع ارامكو ، وارسلو لي ايميل رفض بعدها بفتره … وقلت خيره،
بين ترم 152 و 153 ( في الاجازه ) سويت مقابله مع الشركه الوطنيه للانظمه الميكانيكيه في الرياض … وارسلو لي رفض … علماً بان رواتبهم للمهندس الفريش 15000 (فل باكج) ، ولكن الحمدلله على كل حال
في ترم 153 سويت مقابله مع شلمبرجير ولا ردو علي ( المقابله قبل شهر تقريبا ) قالو بنرد خلال اسبوعين على المقبولين ، فمعناها رفض
الزبده بعد ماراحت عليّ هالفرص الذهبيه كلها ، وكلها كانت اولوياتي ، حاس اني متحطم شويّ
شكلي اجيب العيد في المقابله
الزبده ناوي بعد العيد اقدم على المصانع اللي في الرياض (مصانع اغذيه واسمنت وبلاستيكيات … الخ)
روتبهم ماتتعدى 7000 اتوقع ،
هل تنصحوني اتوظف في احدى الشركات ذي واكمل معهم لين اترقى ويرتفع الراتب؟
هل الشركات الصغيره غالباً اذا استمريت فتره طويله معها يمديك تترقى ولا يطفشونك لين تقدم استقاله (حسب ماسمعت)
مشورتكم ياشباب بالنسبه للمقابلات الشخصيه بشكل عام ، وبالنسبه للوظيفه بشركه صغيره براتب متواضع والاستمرار في هذه الشركه للوصول لمناصب عليا بإذن الله
اولًا مافيه مشكلة انهم يرسلوا لك رفض ومن ثم يتواصلوا وياك بعد اشهر ويقولوا لك عندك مقابلة او اختبار او ايًا يكن … مثل مايصير في ارامكو … واغلب الشباب يعرفوا هالشيء
ثانيًا ان كنت بتتوظف على تخصصك … فأنا اقول انك تتوظف لأن عامل الخبرة يفتح لك ابواب واسعة ويعطيك فرص اكثر من الحالية (لانك انت فريش وموب كل الشركات عندها تدريب للفريش. ياخذوا Direct hiring)
ثالثًا: مثل ماقال اخوي @7madah سو لك بروفايل في مواقع التوظيف وحدث بياناتك وتابع وياهم اول بأول.
ولا تنسى ان تسجل في الشركات عن طريق مواقعهم وتتابع وياهم الوظايف الجديدة المطروحة وتحدث بياناتك .
لاتتحطم , ترا رفضك مايعني إنك ماراح تتوظف في الشركة … في ارامكو مثلا عادي يجيك رفض وتقدم بعد فترة ويقبلونك في قسم ثاني . حاول تعرف وش سبب رفضك مثلا في المقابلة وش كانت اخطائك . ما يمنع إنك تقدم ع الشركات الصغيرة أو حتى تتوظف معهم وإذا توفرت لكم فرصة أفضل في الشركات الكبيرة اتركهم .
اولا سلام عليكم و رحمة الله
ثانيا قل لن يصيبنا الا ما كتب الله لنا و الحمد لله على كل حال و الخيره في ما اختاره الله… عموما تقريبا سالفتك قريبه مني الا اني متوظف حاليا في احد الشركات في الصناعيه الثانيه بالرياض صار لي سنه. غير صحيح ما ذكرت عن الرواتب فالرواتب هنا اغلبها للمهندسين فوق 10000.
المقابلات الشخصيه كمتخرج حديث اغلبها عن شخصيتك يشوفون تصرفاتك و ردت افعالك ليس المهم عندهم ما تملك من معلومات فحاول جاهدا ان تنمي لغة التواصل مع الاخرين و طريقه التكلم معهم…
كاحد موظفين احد الشركات المتوسطه-الصغيره. فانا انصح الجميع بالعمل فيها خصوصا انها تكسبك مهارات لن تتعلمها في الشركات الكبيره. عندك مساحه كبيره للابداع و الاهم عندهم هي النتيجه اذا انت شغال و سويت تغيير في الشركه فسوف تكون اول من يستثمرون فيه من ناحيه الدورات و غيرها. اخذت مع هذي الشركه دوره في ابو ظبي و القادمه سوف تكون المانيا. صديق لي في هذي الشركه زاد ارباح الشركه اربعت اضعاف في الاداره اللي هو فيها زاد راتبه خلال شهر ثلاثه اضعاف مع دورات سنويه لتطويره. فرصه كبيره جدا للشباب الاستفاده من ذي الشركات اللي غالبا ما يكون فيها سعوديين كثير و لا يمشي عندهم نظام الاقدم يستحق الدوره. عموما اايد بقوه الذهاب لها و خوض تجربه الحياه العمليه على حقيقتها. صحيح الامان الوظيفي مو فيها يعني بكره و الا بعده يفصلونك و هذي هي ميزتها لانك بتكون على باب الخطر فيدعك هذا الى التطوير من نفسك… بالاضافه انه اذا مافيه ترقيات على قولتك انت في الشركات هذي ما تنتظر ترقيات انت تنتظر عروض من شركات ثانيه و منها تسوي الجنب في حياتك… هذي نصيحتي و الله يوفقك
اللي خلاني اتوقع ان رواتبهم قليله حصلت اعلانين لشركتين في الرياض مصنع زجاج ومصنع بلاستيكيات ( كاتبين في الاعلان طالبين مهندس كيميائي والراتب من 5000 الى 7000 كامل )
فهذا اللي خلاني اتوقع ان رواتبهم قليله نسبياًُ … بالنسبه لي مو مهم الراتب اهم شيء استفيد واشتغل بتخصصي واخذ خبره واطلع في الشركه لمراتب عاليه بإذن الله
سؤال اخير اخ طموح ، هل تنصح التقديم عليهم عن طريق الايميلات المواقع … الخ ، او الذهاب هناك شخصياً؟
(ان نفسا لن تموت حتى تستوفي رزقها وأجلها) صححه الالباني
اقول لك لا توجع قلبك وخلك مطمئن ومرتاح وبكامل راحتك النفسية
العمر ما يزيد ولا ينقص يوم واحد
والرزق مايزيد ولا ينقص ريال واحد
اذا حصلت وظيفة صل استخارة وروح
وتذكر ان غيرك لا درس ولا تعلم وعنده قصور ومليارات
وغيرك عنده دكتوراة وبراتب ضئيل ما يسوى تعب هالسنين ومن جامعة الى جامعة ومن دكتور الى دكتور
الحرص كل الحرص على كمال الدين والرزق بيجيك بيجيك حتى لو تأخر ١٠٠ سنة اللي مكتوب لك بيجيك ما ينقص هللة واحدة
تبي الصراحة ماعندي مشكله اشتغل 5000 ريال… لان مافيه شي يضمن أني راح اشتغل في ارمكو او سابك او صدراة في الوقت الحالي… انا حتي قدمت علي هرفي يارجال وانا مهندس كيميائي… قالوا بنحطك في المصنع… علي فكرة في الصناعة الثانية الي ف الرياض فيها شركات كثيرررررررة
التقديم اغلبه يدوي و مثل هذي الشركات اللي يجيهم و يحسون في نفسه الحماس يتفاعلون معه اكثر من التقديم اون لاين اللي تقريبا معدوم ذا الفتره… عموما راح تنصدم من الرواتب هنا هههههه زي ما قلت لك احد الزملاء رفع دخل الشركه خلال سنتين راتبه الان 24 الف اساسي و الاساسي حقه كان 8 . لا تخصصي هندسه مكانيكيه, عموما اكثر مرحله اثاره راح توصلها اذا دخلت شركات تقدم لك عروض علشان ياخذونك و شركتك تبغاك هنا يتضاعف راتبك في يوم و ليله… و لكن و الاهم من ذا كله بعض السعوديين هنا عطو انطباع في الشركات ذي ان السعوديين ما يشتغلون فلا تنصدم اذا ما عطوك شي في البدايه و الا سحبوا عليك لانهم ينتظرون منك انك انت اللي تتحرك و بعدها ابشر بكل شي…
الصناعية الأولى بالرياض مافيها شيء ورشات في ورشات بأستثناء كم شركة اكبرهم قد اصغر شركة بالصناعية 2 ، وفر مالك ووقتك ورح دايركت للصناعية 2 وبجنبها 3 ( ماراح تحس انهم 2 و 3 لانهم بجنب بعض )
الخزف: مريت الموارد عند الأخ نايف المقاطي على شهر 12 سويت مقابلة أولى وثانية وباقي اعتماد عيد العنزي مدير المصنع الي قريب من مصانع العبيكان وماصار شي ، يمكن الوضع تغير بوقتك الآن
لا تبالغ في ردة فعلك و تحطم حالك , لعلها خيرة من رب العالمين سبحانه وتعالى
اداء المقابلة بشكل ناجح يكون حسب تمرسك وممارستك للمقابلة بشكل دوري ,
الاسئلة والاساليب اللي تقوم فيها الشركات وموظفين الموارد البشرية متكررة بامكانك استغلال هالشي والبدء بالتدرب على المقابلة الشخصية بشكل يومي لتصل لحد الثقة بالنفس ان اجوبتك و اسلوبك وقت المقابلة هو المطلوب ,
