السلام عليكم
حاب انقل لكم تجربتي في الشركة الي تدربت فيها تدريب تعاوني (شركة اسمنت الشرقية).
قبل بداية التدريب حاولت ابحث على معلومات عن الشركة فما لقيت شي لا بالمنتدى ولا بالشيخ قوقل والحين بعد ما انتهيت تدريب قلت انقل لكم تجربتي.
اجراءات القبول كانت بسيطة رحت الفرع الرئيسي بالخبر وقابلت الHR وطلب مني بعض الاوراق (صورة من بطاقة الاحوال و صورة من الايبان للمكافأة الشهرية وكانت 2000 ريال) وبعدها علمني وقت ومكان الدوام.
في اول يوم دوام رحت لهم بلانت في منطقة الخرسانية (تبعد عن الدمام 160km تقريبا) وقابلت الplant maneger واعطاني نبذة عن المصنع وبعدها حولني لقسم التدريب. طبعا موظفين الHR وباقي الموظفين الي بالمصنع ما كان عندهم علم ان في طلاب راح يتدربوا بالمصنع فصارت لخبطة في اول يومين.
التدريب كان في 4 اقسام: التدريب / المحاجر / الصيانة / الانتاج .
قسم التدريب جلست فيه تقريبا مابين ثلاثة الى اربعة اسابيع واخذت فيه عدة كورسات ومنها كورسات في السيفتي والايزو
الشي الحلو في الكورسات ان بعد كل كورس تاخذ شهادة تدريب وهالشهادة راح تفيدك بالتقديم بعد ماتخلص جامعة.
قسم الصيانة اكثر قسم جلست فيه بحكم ان تخصصي هندسة ميكانيكية واكثر قسم استفدت منه من ناحية المعلومات.
بقية الاقسام مريت عليهم عالسريع اخذت فكرة عنهم ووش مسؤوليات ومهام كل قسم.
نجي للدوام ، دوامك اغلبه ميداني تطلع مع المهندس تشوف المشاكل الي بالمصنع وكيف يتعاملوا معها. وقت الدوام كان شوي متعب لأن الشركة كانت متشددة في مسألة الحضور والانصراف لدرجة انهم يعاملوك معاملة الموظف ، طبعا الدوام بصمة من الساعة 7:00ص الى الساعة 3:00 م .
الشركة بالنسبة لي كانت ممتازة من ناحية التدريب واستفدت اشياء كثيرة في التخصص ، ولكن مايعيب الشركة ان ما فيها اماكن مخصصة للطلاب فكل مرة تدور لك على مكان تجلس فيه.
, إذا تسمح بخلي رابط تجربتك في هذا الموضوع