السلام عليكم
أنا عاطل ومعدلي كويس ليا سنة ونص تقريبا عملت مقابلات كثيرة وكلها انرفضت
أدائي بالمقابلة عموما ليست بالمستوى المطلوب بسبب التوتر غالبا , برضو حاولت أحسن من أدائي بالمقابلة لكن بدون ناتج مرضي
أنا الآن أدرس ماجستير ( ليست طموحي لكن حتى أحصل على وظيفة ), وإلى الآن لسى أعمل مقابلات
المهم سؤالي هل أحد عنده نفس مشكلتي؟
وهل أقدر أتوظف من دون عمل مقابلة؟ راضي بأي راتب عموما
الله يرزقنا واياكم بالوظيفة اللي تسركم 
انا عاطل مثلك لي تقريبا سنة و معدلي كويس و تخصص هندسة كيميائية… الله يرزقنا
وانا عاطل مثلكم تخصص هندسة كيميائية ومعدلي كويس عملت اكثر من مقابلة بس مايجيني رد منهم واذا تواصلت معهم يصرفوني
ممكن تفيدنا في اي جامعة تكمل ماستر
الله يوفقنا جميعا
أخوي أقترح عليك تجيب كامرا وتجلس قدامها وتصور فيديو وانت تتكلم عن موضوع محدد… أنا جربت هذي الحركة قبل واستفدت منها في جانب الأسلوب واختيار الكلمات أكثر من التردد … لكنها مفيدة …
لمن ترجع تتفرج الفيديو راح تكتشف نقاط ضعفك وراح تقدر تطورها… + الكامرا كأنها شخص قاعد تكلمه فراح يقل التوتر عندك مع التدريب…
أحيانا ما يكون التوتر هو المشكلة الأساسية … مثلاً إذا صرت تطالع تحت كثير وما تنظر لعين اللي تكلمه أو تبين له اهتمامك بكلامه يوم هو يتكلم… ذي كلها تسبب لك مشكلة في المقابلة…
الله ييسر أمرك …
الماستر ليست حل أو سبب في الحصول على وظيفة كما ذكرت بل بالعكس اغلب الشركات تعتبر الماستر overqualified وتفضل أصحاب الباكالوريوس
يا أعزائي الله يوفقكم و يرزقكم ، أهم شيء لا تتحطمون أو تشعرون بالنقص ، الوضع الاقتصادي من سنتين يجعل الشركات حذره في التوظيف، فما حصل لكم ليس بسبب انكم سيئين بل لأن هناك ظروف فوق طاقة الجميع .
معاكم في الفرق عاطل لسنة و الحمدلله … تفائلوا و ربنا يرزقنا جميعا
صحيح التوظيف حاليا ً ضعيف لكن خطأ إنك تعتقد الحل هو الماستر بدل ماتطور نفسك وتستعد للمقابلات , اكذب عليك اذا قلت هالشي سهل لكن في نفس الوقت هالشي مقدور عليه
بس يحتاج تدريب , مرة مرتين ثلاث مرات مافي مشكلة وصدقني ماراح يضيع تعبك اذا سويت الي عليك ,
دراستك للماستر كأنك قاعد تأجل المشكلة سنتين بدل لا تحلها , لاتفكر الماستر راح يساعدك في التوظيف لأن للأسف الاغلب يعتبر الماستر overqualified
وضعك مقارنة بغيرك جيد , في غيرك للأسف حتى ماحد طلبه للمقابلة , فحاول تعرف قيمة المقابلات والفرص الي تجي لك ,
فيه طرق كثيرة تطور نفسك وتستعد للمقابلة , واليوتيوب وتويتر مليان تجارب وشروحات الي يبقى عليك بس تشد حيلك واذا مثلا عندك مشكلة في الكلام قدام الجمهور او المحادثات او حتى الانجليزي , حاول تطور نفسك .
ولو تذكر المواقف الي على اساسها حكمت ان ادائك في المقابلة كان أقل من المطلوب , ممكن نفيدك بحل لمشكلتك .
+
شوف هذا المقطع ممكن يفيدك
https://www.youtube.com/watch?v=N1te1Y6nuzY
وبخصوص التوظيف بدون مقابلة هالشي حاليا ً شبه نادر وصدقني لو صار هالشي فغالبا الجهة الي بتتوظف فيها بتكون اقل من المستوى .
ومادامك تدرس ماستر حاول تعرف أنظمة الجامعة الي انت فيها والدكاترة , لأن بعض الجامعات طلاب الماستر أو الدكتوراة بإمكانهم التقديم على الوظائف الأكاديمية حتى قبل التخرج بسمستر .
والله يوفقك و يرزقك بالوظيفة الي تتمناها , أهم شي لاتتحطم وسو الي عليك وبإذن الله بتتيسر الأمور
كان الله بعونكم ، كلكم متخرجين من البترول؟
الله يوفقكم جميعا ويرزقكم الوظيفة المناسبة
السلام عليكم
اخوي ان كنت تبغى توظف على طول اذا كنت مكانيكال او معماري او مدني ما يهتموا للمقابلة كثير بس العرض سي جوالي 4 ونص لانك فريش روح لجدة شركة عبدالقادر كرديه للمقاولات جرب حظك و الله يوفقك
طالما أنك مشخص المشكلة و دخلت مقابلات ( الكثير مو قادر يدخل مقابلات و لا يعرف المشكلة أين)
فاعتقد أنك في طريقك للوصول دام أنك تقدر تحصل مقابلات
فقط اشتغل على روحك أكثر. اعتقد أن الهروب إلى الماستر (إذا ما كان لك رغبة) و بحث عن شركة ما تسوي مقابلات هذه فعل مب جيد
عندك قدرات أكبر
أرجو أن اسمع خبر توظيفك قريب
أعانكم الله وسدد خطاكم وسعيكم ، وياصاحب الموضوع تدرب يا أخي الكريم أجمع لك شباب أو صور نفسك واعمل محاكاة.
أتمنى ممن يريد المشاركة يتذكر أن العطالة تعني أنك لا تشغل وظيفة هندسية ، وليس معناها ان المرتب أقل من السوق أو طبيعة العمل لا توافق التخصص. ما أشك ولا أشكك بمصداقية أحد بس للتذكير.
والله اني اعاني من نفس الشي لدرجة اني انكسرت وتحطمت نفسياً , شعور الرفض يدمر انا اتكلم عن نفسي خصوصا لما يتجمع مع بعض
لي سنة من يوم تخرجت وسويت اكثر من 10 مقابلات تقريباً وكلها اما يجيني رد بالرفض او يطنشون لدرجة صرت افكر اني ما عاد اروح اي مقابلة ابد…
طبعاً انا لاحظت اني تطورت يعني مثلاً اول مقابلة سويتها عكس اخر مقابلة الاولى كنت متوتر واكلج كثير لكن الاخيرة كان فيها شوية ارتياح وثقة بالكلام …
لكن عموما ما زلت انرفض…
هالفترة اختبار حقيقي لصبر المهندسين الكيميائيين
الله يفرجها ع الجميع
الشباب ما قصروا اعطوا نصايح مهمة. ابحث اذا في نادي toastmasters في جامعتك او مدينتك. انا ما جربته لكن اعرف ناس مجربين يدخلون هالنادي وجدا استفادوا منه. ببساطة هي جماعة تساعدك على تطوير مهارات الالقاء والتواصل. ممكن بعد هالشي يخفف شوي من مخاوف المقابلات انك تروح وتقابل ناس وتتكلم قدام مجموعات. الله يوفقك ان شاء الله ويسهل عليك.