حابب افتح معاكم موضوعي لانه اشغلني جدا ومحيرني وابغا استشيركم واستفيد من خبراتكم.
اخوكم متخرج من جامعة الملك عبدالعزيز هندسة كهربائة قوى ومحركات وبمعدل 4/5 .
طبعا زي ما الكل عارف وضع الوظايف تعبان وياكثر المهندسين العاطلين مع الأسف. المهم بعد 6 شهور من التقديم وطبعا ماردت علي اي شركة خاصة في هذي الفترة, حصلت اعلان في لينكد ان لوظيفة (Industrial Electrician الوظيفة مسماها فني وطالبين شهادة بكالوريوس غريبة ! ) الشركة بارنيز مروفة عندنا بالغربية هما عندهم محلات قهوة (زي د.كيف في الرياض وقهوة الطريق في الشرقية). اتصلوا علي وسويت المقابلة وقبلوني وكانت المقابلة والوصف الوظيفي على اساس الشغل في مصنع تحميص القهوة (مصنع صغير) داومت فيه اسبوع. بعدها اتفاجأ فيهم يطلبوني اشتغل في المكتب لأتابع اعمال مقاول الصيانة لصيانة فروع اكشاك القهوة وماتشملها من اجهزة. المهم عدت الايام واغلب طابعها روتيني استلم طلبات الصيانة واسلمها لفريق الصيانة واتاكد من انتهاءها وارفع طلب في حال الحاجة لقطع الغيار.
حاليا عدت اربع اشهر. وتم رفع تقييمي للادارة (الفلبيني سلكلي وحط كل شي 10/10) وصاحب الشركة وضحلي انه يبغاني استمر معاهم ومستعد انه يتكفل بأي دورات احتاجها ممكن تفيد الشركة وتفيدني حتى لو خارج المملكة. وايضا المدير الفني تكلم في موضوع الدورات ولمح انو ممكن يطلعني في دورات على مكاين تحضير القهوة. بس ماني مرتاح للوضع لانه مافي مهندسين خبرات في الشركة (غير المدير الفني واللي متوظف في الشركة من يوم تخرج) ووضعهم متخبط ومافي سيستم واضح في الصيانة وغير كذا انا قبلت الوظيفة في البداية عشان المصنع ممكن اخذ خبرة فيه مع اني وضحتلهم في البداية يوم نقلوني بس قالي انو نحتاج مهندس عنده شخصية عشان يتعامل مع شركة الصيانة ( احسه سلكلي ) لانه اول مانقلت جابوا فني كهرباء سعودي في المصنع.
الوضع من ناحية الراتب والتأمين فهو تعبان 5500 ريال وتأمين اقل نوع. وماني عارف ايش الخطة اللي قدامي في الشركة. المدير الفني اعطاني بروجيكت اشتغل عليه واضح انه رماه تسكيت يبغاني امسك مشروع تركيب خلاطات وجهاز قوالب ثلج !. وقالي انه ممكن اترقى واصير اشتغل في قسم البحث والتطوير.
انت الان حسب اللي ذكرته, وظيفتك هي بروجكت انجنير, حتى لو كان مسماها عندهم فني, هوه نفس شغل اي بروجكت انجنير يشرف على تنفيذ نشروع مع اختلاف المجال, مثلا لو كنت في مجال البترول راح يكون المشروع اكبر لكن يظل المبدأ نفسه.
انصحك الاتي: كمل معاهم و اطلب رخصة PMP خليهم يحضرونك لها , اذا اخذتها راح تمسك منصب اعلى في شركة كبيرة ان شالله.
لكن لو جاك عرض وظيفي اعلى منه بفرق كبير في المسمى و الراتب لا تتردد.
والله ما شاء الله عليك أخوي نايف معدلك عالي وتخصص صعب ومرغوب
ما ودي أتفلسف عليك ، لكن هل حاولت في شركة الكهرباء (غير التقديم على النت) ؟ هل حاولت مع الـ Vendors اللي تتعامل معهم الكهرباء مثل سيمنس وأيه بي بي و ألستوم وغيرهم ؟ هل حاولت مع المقاولين اللي تتعامل مهم الكهرباء مثل الفنار و إس إس إيه إم و الحيدر والطوخي وغيرهم ؟
فيه خبرات عظيمة ممكن تحصل عليها إذا عملت في قطاع الكهرباء ، وأنت في نظري شخص مرغوب فيك نظرا لتخصصك ولمعدلك العالي
معقولة لها الدرجة الوظائف مقفلة ؟؟ أخاف أنت ما سلكت الطرق الصحيحة للتقديم ولتحضير السيرة الذاتية
الله يوفقك أخوي
والله الوظيفة لاترقى لتخصصك ومعدلك ابدا، تأكد من طريقتك بالتقديم، هل رحت للشركات ولا بس من المواقع؟ هل رحت لمعارض التوظيف؟ انتبه تتخدر وتوقف البحث عن وظيفة يعني ابحث كأنك ماتوظفت
الكل مشكورين على ردودكم بخصوص الدورات على ماسمعت من الفني انو عندهم استعداد على تقديم دورات وهما شركة اسمهم الامجاد عندهم كذا استثمار غير القهوة (مخبز - مختبر اطارات - ومختبر انسجة). لكن يعتمد اذا عندهم شروط جزائية على الدورات (من الدورات المقترحة دورة PLC من سيمنس واتوقع يقدموها في معمل الاتمتة في جامعة الملك عبدالعزيز). لان المدير الفني سبق وجاب طاري الموضوع في المقابلة (المدير الفني زي ماذكرت له يمكن 10 سنوات هنا وسبق طلع دورات على اختبار الاطارات قبل ما يسووا المختبر).
ومعانا كم فلبيني تخصصهم كهرباء والكترونيات بحاول استفيد منهم قد ما اقدر وادخل في شغل المصنع بين فترة والثانية عشان اخذ خبرة كويسة قد ما اقدر.
بخصوص التقديم على الوظايف. تقريبا جربت كل الطرق ماعدا انو اروح لمقر شركات للاسف. رحت معارض توظيف و المدينة الصناعية في جدة وقدمت عن طريق الايميل ومواقع الشركات على النت. وغيرت السي في 4 مرات. مع ذلك من تخرجت الى الان عملت فقط مقابلة وظيفية واحدة ( اللي اشتغل فيها الان) غير اللي يرد على الايميل او يتصل ولا يرجع يتواصل.
بحط لكم هنا نص الرسالة اللي ارسلها في الايميل والسيرة الذاتية حبذا لو عندكم الوقت وتشوفوا اذا في شي غلط فيهم. واللي عنده نصايح ياليت تشركها تفيدني وتفيد غيري. وشكرا لكم
Dear Employer
Greetings
I am Naif Ibraheem Tamia Electrical Engineer graduated from King Abdulaziz University in Feb/2017 with GPA of 4 out of 5. I am working now as Maintenance Engineer in Al Amjaad group. My mainly duties consist of supervising the maintenance contractors and also communicate with operation department to insure solving issues related to our department. Also I recently involved some development projects. I am interested to work with such leading company to utilize my skills and abilities to participate in the company success.
Kindly check the attachment to have a look on my resume. For further information don’t hesitate to contact me.
ماني فاهم المقصود من ردك لكن تعليقي بخصوص الPMP اللي انت اقترحت عليه يطلب من شركته يدعمونه فيها لكن من شروطها انك عملت 7500 ساعة عمل بالمشاريع وبحسبة ٨ ساعات يوميا و ٥ ايام عمل بالاسبوع يبيله ٣-٤ سنين عشان يوصل الرقم المطلوب وهو كاتب ان له ٤ شهور معهم.
يبدو لي أنك تقدم في جدة وما حولها
الفرص أكبر في الرياض
و مادامك توّك خريج ، ويمكن غير متزوج ، لا تتشرط في الموقع ، اطلع بره جده
اهم شي الوظيفة تكون في شركة محترمة وطبيعة عمل محترمة و فيها خبرة ، أما الموقع فلا تتشرط
لاحق على جدة ، لا أخذت خبرة قوية تبي تلقى إن شاء الله الوظائف في المكان اللي تبيه
بصراحة حرام عليك تخصص هندسة كهربائية ومن جامعة محترمة ومعدل 4 من 5 وما تلقى العمل الوظيفي اللي يقدم لك الخبرة القوية
وهذي غالبا تلقاها في مجال شبكة الكهرباء ، سواء المشغل شركة الكهرباء أو الفيندورز أو المقاولين
أهم شي مثل ما قلت لك لا تحكر نفسك في مكان واحد وتبحث عن الوظيفة والشركة المناسبة اللي فيها مسار مهني عالي المستوى
أمثلة:
مهندس مشاريع = إدارة هندسية + إدارة مشاريع + فهم تقني إلى حد ما + فهم التقاطعات بين التخصصات المختلفة (البور مع التحكم مع الاتصالات مع التشغيل مع الاختبارات … الخ)
مهندس تصميم وهندسة في إدارات الهندسة والتصاميم أو في إدارة المواصفات
مهندس حماية شبكات الكهرباء
مهندس تحكم وسكادا
في الخلاصة، العمل في قطاع شبكة الكهرباء سواء عند المشغل المالك (شركة الكهرباء) أو عند المقاولين اللي ينفذون المشاريع الجديدة لصالح المالك أو عند الفيندورز اللي يصنعون المعدات والأجهزة لشبكات الكهرباء ، وهو قطاع ضخم بحكم ضخامة الشبكة وتعقيدها ، هذا يعطيك فهم عميق لمكونات الشبكة وكيفية تشغيلها وصيانتها وكيفية إدارة مشاريع تطويرها
طبعا ما تحدثت فيه سابقا هو مجال عمل من مجالات خريج الهندسة الكهربائية ، وتكلمت فيه بإسهاب لمعرفتي ، ولكن هناك مجالات أخرى يمكن الإخوة يفيدونك اكثر
انا ما ودي اصغر عملك الحالي واكرهك فيه … لا ، ما دامك شغال فيه وقاعد تتعلم ، فاستمر في التعلم والإخلاص والإنجاز ، لكن لازم تفتح عينك وتعرف أن هناك مسارات مهنية أفضل … وطبعا الأفضلية هنا نسبية بحسب ما نشوف احنا ، ولا ما تدري وين الأفضلية بالنسبة لك والله الهادي إلى سواء السبيل