انا طالب جينيور والسمستر القادم سينيور ان شاء الله . اعاني من التأتأه وهالشي كان يمنعني او يحدني اني ما اتكلم كثير وبالتالي مهارة التحدث بالانجليزية صفر للاسف . عندي كمية مصطلحات جيدة و مهارة الاستماع و الكتابة ممتازة جدا لكن مشكلتي بمهارة التحدث .
معدلي 2.9 ومعدل التخصص 3.2 و الحمد لله يعتبر هالشي جيد .
متخوف من اجراء المقابلات الشخصية الاسبوع القادم . اعاني من تاتاه و مهارة التحدث سيئة … يعني بيصير تخبيص بالكلام مو طبيعي وما اتوقع احد يقبلني بوضعي هذا حتى لو معدلي 3.9 !!
أقترح عليك تروح عند واحد من الدكاترة اللي ترتاح لهم و قوله أبغى أسولف معك عن شغلة فلانية عشان أمرن لغتي
كثير من الشباب كنت أشوفهم جالسين و يسولفون عن أي شي كورة سيارات تكنلوجيا أي شي أي شي
و أنا شخصيًا كنت أروح عند الدكتور لانس كنج نتكلم عن مانشستر يونايتد، و كنت أستفيد كثير (إذا تبغى مساعدة بالمقابلات الدكتور خبير جدًا بهذه الناحية، وظيفته السابقة كانت HR)
أيضًا دكاترة الإنجلش عندهم اجتماعين أسبوعيين بغرفة و قت معينين، موجود يساعدون الطلاب بس، ممكن تشوف متى موعدهم و مكانهم و تروح هناك يساعدونك
و تذكر كثرة التدريب و التمرس يزيد من اتقانك للمهارة، مثل الماث مثلًا تحل مسائل أكثر تبدع أكثر
انا مشكلتي مو اني ابغا احد اسولف معه انجليزي عشان اتدرب , اقدر اسجل بموقع كامبلي واسولف ساعه كل يوم اونلاين لكن انا مشكلتي بالتأتأه
احسها حاجز كبير بيني وبين الوظيفة والاسبوع القادم المقابلات الشخصية للتدريب الصيفي وشايل هم .
هل الشركات تقبل توظف شخص متأتئ عاجز عن التعبير عن مدى فهمه وتمكنة في مجالة !!
أخي الفاضل، اسأل الله أن ييسر أمرك ويريح قلبك ويرفع عنك.
أنصحك تدعى ربك وان شاء الله أمورك بتكون ميسرة وتمشي، كثير عانو من التأتأة وهذا الشي ما منعهم يكونوا قادة وعظماء في التاريخ وأكيد أنك تعرف هذا الشي ولكن هذه من باب وذكر فإن الذكرى تنفع المؤمنين.
يا بو فيصل لاتشيل هم لكن إبذل إلي تقدر عليه واقولك من تجربة بعض الشركات تهتم بثقة الشخص في نفسه ، أما التأتاة فما هي مانع إن شاء الله
وهذي تجربة أحد خريجي الجامعة و مر بنفس موقفك والحمدلله تيسرت أموره لكن مثل ماقلت لك حافظ على ثقتك بنفسك واسعى بالي تقدر عليه وصدقني الله مايضيع تعب أحد . اجتهد واسعى إنك تطور نفسك و توكل على الله وبإذن الله راح تحصل كل خير
أخي أبو فيصل.
اتفهم جدا اللي تمر فيه, التأتأة من العوائق اللي لم يوجد لها حل جذري تماما الآن ( علميا )
لكن المبشر بالموضوع ان فيه كثير ناس تعالجوا منها وكثير جدا بالرغم من شدة التلعثم عندهم.
كيف؟ فيه تكنيكات تتبع للسيطرة على التأتأة وهالتكنيات هي الحل تقريبا بإذن الله. ( فيه حلول كثيره بالنت )
بذكر لك عدة عوامل ممكن تساعدك
تمارين التنفس
وهي تمارين استرخاء تقدر تبحث عن طريقتها بالنت لما تطبقها يمكن تحس بزيادة بالتأتأة بأول اسبوع لكن اعتقد مع الاستمرار عليها بيكون الفرق
خفض الصوت ومد الكلام
والأهم من ذلك أتمنى ماتظلم نفسك بعدم اخبار اللي بيقابلك بهالموضوع قبل ماتجلس او اول ماتجلس قله انا عندي تلعثم بلساني وتلعثمي مايعكس عدم ادراكي بالتخصص او حتى التوتر
للأسف ما عندي حلول أو تمارين تخفف من التأتأة، و لا أقول لك اني جربتها. لكن اللي شفته انها ليست عائق طالما اللي قدامك يعرف بالحالة. و ان شاء الله مع الممارسة تتحسن.
وعليكم السلام ورحمة الله وبركاته … سوف أكتب لك أمور وإن شاء الله تساعدك حاول تطبق ما تقدر عليه منها … ولا تنسى النصيحة في آخر سطرين بشكل مائل عن هذي التمارين …
1- قراءة مقالات ( لكُتاب اليوم )من جريدة ما : مثل عكاظ أو الوطن : بصوت عالي لمدة 20 دقيقة بشكل يومي … ولو أنت شخص منضبط في النوم تقدر تقوم تصلي الفجر في جماعة ثمن تقرأ الأذكار … وتسوي هذا التمرين قبل الدوام … ولو متعب في الصباح خليك في وقت أنت متاح فيه غالبا كل يوم … رابط مقالات كتاب عكاظ
2- لو تقدر تدخل حلقة قرآن كريم … التجويد والقراءة … يساعدك كثير في النطق ويحسن حالتك بشكل كبير … في الحلقات أكثر من فائدة : أنك تمارس القراءة من مخارجها رغم المعاناة : الثاني أنك تكون إجتماعي مع طلاب الحلقة الطيبين … لو مافيه حلقة حاول تجد طالب حلقة أو أمام وأشرح له أنك تعاني من التلعثم … ولو مافيه أحد … كل يوم بعد المغرب أقرأ بتجويد لو صفحة واحدة من المصحف …
3- حافظ على الأذكار المسائية والصباحية والخروج والدخول من المنزل … فالله خير حافظ ومعين …
4- أقرأ رقية شرعية : بشكل يومي … كل يوم أو كل يومين أو ثلاثة : أو بشكل اسبوعي : القران علاج لكل مشكلة نفسية أو مرضية … وفيه ناس كثير خفت التأتأة لديهم بسبب التأثير النفسي لرقية في حالتهم الصحية … الحالة النفسية تلعب دور كبير في تدهور حال المتأتىء بشكل سلبي …
5- لا تعتزل الناس … هذي أكبر معضلة ممكن تأثر في حياتك وتزيد التأتأة سوء ورغم معاشرة الناس متعبة لكن الخوف من معاشرتهم أكثر تعب وأثر … حاول تطلع وتتكلم مع أي إنسان ودود… ترى أغلب الإخصائيين يشوفون أن العزلة هي سبب كبير في زيادة التلعثم … وأهم وسائل العلاج يكون بالتحدث مع الغرباء ومخالطة الناس … ولو حدث موقف سلبي من شخص غير جيد … لازم تدرك أن كل من يتعلثم يحدث له نفس الموقف … تجاوز الموقف وواصل حياتك ومخالطة الناس لأنه هذا الطريق الوحيد لتغلب عليها بشكل فعال…
وأهم شيء لا تنسى أن رزقك مكتوب من يوم ولدت … لكن عليك أن تسعى وتصبر … وحياتك أكيد مختلفة عن سواك … والشدة قد تكون شيء قد نفعك وخلاك تركز على دراستك وأنت ما تدري … فليس البلاء دائما ضر فقد يكون نفع …
وكما تحدثت أنت فيه موقع أسمه كامبلي … خليك فيه ومارس التحدث والنطق بشكل صحيح … ترى يساعدك كثير وأنت ماتدري … بس واصل عليه …
**هذي الأمور تساعدك على التركيز على أشياء مهمة … ولكن لا تنسى تمارس الرياضة وسواها … لأنك لو تحمست كثير على هذي التمارين … قد يحدث لك موقف وتتلعثم ووتتوقف عنها … وهذا شيء خاطىء لأنها وسائل معينة بجانب حياتك اليومية … فكل شيء يكمل شيء … **
أضيف الى كلام أخوي Yhope انك تبحث عن طبيب نفسي موثوق ( ركز على موثوق ) وخبير بشرط يكون الموضوع بشكل سري لأن المجتمع لا يزال غير متقبِّل للطب النفسي وإذا عرفوا يبي يقولون لك نفسية، بإذن الله راح تستفيد ويتابع معك لين تتعالج وممكن تكتشف لاحقاً ان كثير من الناس اللي ناجحين بحياتهم بل قد يكونوا متفوقين يراجعون طبيب نفسي لكن بدون علم أحد. الموضوع مهم لاتهمله وافعل السبب والله الموفق
ما عندي أي خلفية طبية عن الموضوع -ومع احترامي للي قدموا لك نصائح علاجية، أظن أنهم مثلي-، فما أقدر أقول لك سو كذا أو لا تسوي كذا. و أتوقع أنت بعد تدري أن ما فيه بهالمنتدى أحد راح يعطيك حل سحري ينسيك هالمشكلة.
الي أقدر أقوله أن أوقات مشاكل كثير تكون موجودة في مخيلتك بس، و لأنها بينك و بين نفسك تبدأ تضخمها بشكل كبير بدون ما تدري. “مهارة التحدث صفر” شيء مستحيل تقوله عن طالب في البترول، درس 3 كورسات إنقلش على الأقل -فيها 3 عروض تقديمية-، و كل مواده الثانية بالإنقلش، و كل دكاترته يكلمهم بالإنقلش. ألاحظ طلاب كثير يسوون هالحركة، أكثر من مرة في العروض التقديمية أسمع طلاب يكررون “أنا ما أقدر أتكلم قدام الناس - أنا ما أعرف كيف أسوي تقديم - أنا ما أعرف أشرح”، و تبدأ تتوقع كارثة بتصير، ثم لما يطلعون يتكلمون تشوفهم عاديين، و نص مشاكلهم سببها التوتر بعد.
لا توسوس و تكبر المشكلة في بالك. الإنسان هو أكثر شخص يفكر بعيوبه، في الوقت الي تقلق و تعتقد أن العالم كلها جالسة تحكم عليك، ذكر نفسك بأنك أنت الآن قاعد تفكر في عيوبك مش عيوبهم، و كلهم مثلك. متفهم أن التأتأة أوقات تضعك في موقف محرج و تجذب الأنظار لك، و اذا كانت معك من الطفولة متأكد أن البزارين خلوك تكره نفسك أيام المدرسة. بس أضمن لك ما عمري شفت أحد فوق المتوسطة يضحك أو ينتقد شخص لأن عنده تأتأة. و متأكد قد مر عليك مثل ما مر علي ناس ناجحين و سعيدين بحياتهم بالرغم من أن عندهم تأتأة أو لثغة.
المقصد لا تفكر بالموضوع كثير، ريح بالك و جهز للمقابلات مثلك باقي الناس، و اذا حسيت بالقلق نفذ نصيحة الشباب الي قالوا لك تبلغ المُقابل بالتأتأة قبل ما تبدأ المقابلة، وقتها تقدر تريح بالك و تضمن أنه ما راح يحكم إلا على فهمك و قدرتك.
الله ييسر لك هالمرحلة الصعبة، و يكتب لك السعادة في باقي حياتك.
أول شيء لازم تعرف إن أغلب الشركات تجي تسليك للجامعة أو تأخذ عدد قليل فلا تفكر إن التأتأة هي العائق مو تحبيط لكن هذا الواقع فلا تتوتر .
ثانيا ان شاء الجامعة بتوفر لك اذا ما حصلت.
ثالثا حاول تقدم على شركات ما تطلب مقابلة ولا تشوفك خصوصا إن معدلك كويس مثل أرامكو أو سابك ( للسمر ترينيق)
رابعا قل للي يقابلك اعذرني اذا تأخرت بالاجابة لان عندي مشكلة بالتأتأة وحسسه إنك واثق من نفسك.
خامسا تقدر تتجهز للمقابلة فهذا ممكن يساعدك بان يقلل التأتاة عندك وأغلب أسئلتهم هي
كلمني عن نفسك
وش تعرف عن شركتنا
كثير يتقدمون عندنا وش يميزك عن الآخرين
هل واجهتك مشكلة وحليتها
كذا سؤال عن التخصص بسيطة ما يتعمقون واجد وبعض الشركات ما تسأل أي شيء عن التخصص.
وتوقع اي سؤال من الامور اللي انت ذكرتها في السي في
أول سؤالين اتوقع بنسبة ٩٩.٩٩ ٪ بتنسأل عنه …
السؤال الثالث والرابع تقدر تحولها الى نقطة قوة لك …
تقدر تذكر لهم حادث لك بالتأتأة له علاقة بالدراسة مثلا وكيف تغلبت عليها الخ …
وتقدر توجه المقابلة بالشكل اللي تبيه احيانا مثلا :
خل جزء كبير من السي في متعلقة بمشاريع او ريبورتات سويتها من قبل فلما يسألك عنها تقدر تطلع ورقة وتشرح له عليها بالذات لو فيها رسومات أو قوانين فهذا بيقلل من كلامك وبيكون التركيز أكثر على الورقة …
وترى المقابلة غالبا ما تاخذ اكثر من خمس دقايق في يوم التدريب فلا تتوتر.
وأخيرا خل ثقتك بالله وتذكر إن رزقك مكتوب من قبل …
اللي عليك إنك تجتهد وتدعي ربك وتستعد للمقابلة …
أخي الغالي ،، من خبرة عمل 7 سنوات وفي بيئة عمل متنوعة من الجنسيات واللغات والثقافات ،، عمر التأتأة لم تكن عائق ،، لدينا بالعمل من يعاني من اعافة بصرية و اعاقة جسدية وبالطرف الاخر يوجد عاهات نفسية و عاهات فكرية ،، ولكن في الاخير تقييم العمل مستند على ماينتجه ويقدمه الموظف من عمل و تحليل ونتائج ودراسات تحسين ودراسات تطوير.
العمل هو من يحكم و ليس شكل الشخص او هيئته ،، بعض الشركات تكون المقابلة لديهم بعد تجاوز امتحانات متقدمة فتكون المقابلة فقط للتعرف على فكر الشخص و اهدافه المستقبلية.
أشكر الإخوة على إضافاتهم
لكن لا زلت أُصر على البحث عن علاج نفسي للمشكلة وعدم تجاهلها، قد يأتيك بعض الناس ويقول لك “مافيك إلا العافية” أو “كثير يعانون من نفس مشكلتك وأمورهم ماشية” يريد تسليتك، وأرى أن هذا هو هروب من المشكلة ولايمكن أن يعالجها. نصيحتي لك بما أنك لا زلت شاباً أن تبحث عن حل عن طريق طبيب نفسي بالصفات التي ذكرتها سابقاً وما هو إلا فعلٌ للأسباب والله الموفق