نصيحة من اخوك. لا تدخل اي تي سي. رح يكون محلك سر. فكر بالمستقبل. ممكن في البدايو مميزات الاي تي سي رح تغريك و لكن في المستقبل القريب رح تغير رايك حاول على الاقل انك تاخذ دبلوم الكلية الصناعية.
اي شخص في مثل حالتك رح يتردد و خصوصا انك مقبل على مرحلة جديدة من حياتك.و اي قرار رح تاخذه رح تتحمل تبعاته للابد. انت المفترض ان عمرك 18 او 19 سنة ليه مستعجل على الشغل. انا شخصيا اعتبر الاي تي سي غير مناسب لك و خصوصا ان درجاتك ليست سيئة جدا. خذ دبلوم الكلية و خليك ملك نفسك اقلها معترف بالشهادة و وقت ما جاء في بالك تشتغل في اي مكان احسن من تدريب ارامكو تقعد سنتين و في النهاية مجرد تدريب و بدون شهادة اكاديمية
اول شي انا ما انصحك تدخل ولا وحده منهم اذا انت عندك طموح وتبغى تدرس وتوصل فوق…لاترضى ب اقل من بكالوريوس لانه في النهايه الدبلوم ولا الثانوي اذا انت ناوي ارامكو بعدين راح يعاملونهم نفس الشي وراح يتوظفون ع قريد 7…يعني الكل سواسيه وانا اشوفه ظلم لخريجين الجبيل اللي هم في نظري متمكنين ودراستهم قريبه من دراسة المهندسين…المفروض رواتبهم وقريداتهم اعلى…بس هذا اللي حاصل
ف الاختيار في النهايه يعتمد عليك انت وين تبي توصل في النهايه؟؟ اذا تبغى تكون technician وتضمن الوظيفه انصحك بالitc…راح تضمن الوظيفه وراح يعطونك راتب ويعتبرون السنتين خبره بعد وفي النهايه انت وخريج الكليه نفس الشي…
هذا ارامكو وحدث ولا حرج ع الشركات الثانيه ((الا قله ))…خريجين الكليه مظلومين…رواتبهم نازله 4000 ولا 5000 نفسه نفس خريج الثانويه…يتعب 3 سنين وفي النهايه مايعطونه مايستحق…
واذا ناوي تكمل للأسف بكالوريوس الكليه غير معترف فيه في كثير من الشركات ((استثناء سابك ولا الهيئة الملكيه وعدد قليل من الشركات)) …ف بتتعب ع الفاضي
ماقلت لك ذا الكلام الا اني اعرف خريجين كثير منها ووضعهم يألم صراحه…واعرف ناس كثير ب الاي تي سي حياتهم عسل ومستانسين…
انا نصيحتي لك لاتفكر ب الثنتين سجل في كل الجامعات وادرس بكالوريوس…حتى لو ع حسابك الخاص اذا فيه امكانيه…اما اذا ناوي تتوظف بسرعه وراضي تكون فني ف الاي تي سي هي الخيار الافضل…
اخوي انا والدي في الهيئة الملكية وماسك منصب واقولك لو ابغى غير ارامكو بروح الهيئه ثم الهيئه ثم الهيئه لانه زي ماقلت تقدر الواحد بشهادته وتعطيه حق التعب طبعا اكيد بشهادة بالكالوريوس لانه الدبلوم امن صناعي فقط في الهيئة (لو تبغى تتوظف رسمي ) والله الطموح عالي اذا تبي الصراحة ودي اوصل لماجستر بتخصص نظم المعلومات (حاسب الالي) لانه هي الرغبة من المتوسط بس اشوف بعض اخوياي الي اكبر مني بثلاث اربع سنين بارامكو يقولون حلو طبيعه العمل والرواتب زينه واذا تشتغل شفتات ازين وازين فا هذي الي خلتني اوسوس لكن بستخير وان شاء الله اكمل الدراسة
انا بكلمك من واقع خبرة>>
ITC افضل من دبلوم الجبيل وينبع بمراحل يارجل اسمك ماسك وظيفة خريجين الجبيل وينبع محد يعطيهم وجه الا سابك ،سابك التوظيف حاليا شبه معدوم.
اي تي سي ضمان وظيفي اكثر من الجبيل خاصة انكم سواسية في ارامكو ع نفس القريد
لكن الاي تي سي ع حسب ممكن تتوظف ب 5000 ولا 6 او ماكسيموم توصل 10 هي حلوة
لكن بعد 10 او 15 سنة مرة مو حلوة لانك بتكون على نفس وضعك لاتطوير و قريدات تمشي بطيئ رح تشوف اللي بعمرك ماسكين مناصب لانهم عندهم شهادات وانت لازلت تعتبر فني هذا غير كرف الدوام و ممكن تتوظف بعيد عن اهلك .
في النهاية استخير اما اذا انحديت مرة ع دبلوم او اي تي سي نصحتي خش اي تي سي لانك مارح تفرق عن الدبلوم شي
نصيحتي لك كمل جامعه بكره تكبر وتندم تحصل الناس رواتب ومميزات ولهم احترامهم بمكانهم وانت راح تبقي طول عمرك بنفس مكانك
كمل جامعه حتئ لو تخصص عادي افضل لك من الدبلومات … الزمن مايرحم وانا اخوك
الكلية والآي تي سي راح تكون نفس القريد. انصحك تدرس باكلوريوس ولو على حسابك لان الخيارين اللي ذكرتهم ماراح يفيدوك كثير من ناحية التطوير والمناصب والراتب وخصوصا ان البلد مقبلة على فترة غلاء نوعا ما.
السلام عليكم ورحمة الله وبركاته
بقول لك تجربتي , انا درست في البترول سنتين ونص وطلعت بعدها رحت كلية الجبيل , كانت الدراسة في الكلية سهلة لكن ماحسيت ان الدبلوم تبع الكلية راح يكون شي مضمون اني احصل وظيفة
المهم جلست سمستر ونص في الكلية وبعدها طلعت ورحت ITC
مكان توظيفي الحالي السفانية ( ساعة ونص من الجبيل)
بالنسبة للـ ITC مو بهذا السوء الي الناس تتصوره مثال انا راتبي 15000 مع البدلات بدون ما اضيف معاه بدل السكن وبدون بدل غلاء المعيشة
طبعاً تفرق من تخصص الى تخصص لكن كراتب اساسي ماراح يقل عن 7000 لقريد 7 ( رفعوا الرواتب قبل شهر )
زبدة الموضوع من رأيي الشخصي انك تروح الـ ITC افضل لك من كلية الجبيل طبعاً هذا الشيء راجع لك
انت تعرف نفسك اذا تشوف نفسك راعي تتعب وتحصل شهادة طيبة فالدراسة طيبة قبل مايفوت العمر اما اذا تقول ابختصرها واتوظف ارامكو ماهي شينة ابد واهم امر شاور الوالد هو ادرى بحكم عمله وعمره وخبرته وحاول تمشي مع شوره او تقنعه بشورك ولكن لا تخالفه … العمر يمشي وضعك الان وقرارك اقدر اسميه مصيري لان كل سنه يتغير شي ويفوت عليك اشياء والمنتدى مليان تجارب شباب تعدوا الثلاثين ورجعوا يدرسون ومع الأسف انا واحد منهم واتخذوا قرارات بسن متاخر صحيح الارزاق بيد الله ولكن حاول اذا اتخذت قرار تكون متاكد انك ماراح تندم عليه مستقبلا وياليت لقينا ذاك الوقت ناس تنصحنا … موفق خير
بامكانك تقول رأيك لكن لكن لاتصرف كلام من راسك ان بكالوريوس الكلية غير معترف فيه لان تدري ان الكثير بيشوف كلامك من مرتادي المنتدى وبياخذ فكرة سيئة عن كلية الجبيل!
عموماً لصاحب الموضوع انا بعطيك قصتي باختصار.
انا اخذت دبلوم فكلية الجبيل وتخرجت والحمدلله وقتها جتني عروض من شركات سابك وتصنيع وشلمبرجير كفني لان كلية الجبيل متعاقدة مع هالشركات وترسل اوراقك مباشرة لهم ويسوون معك مقابلات. المهم فضلت ادخل ارامكو VCGNE تدرج الكليات جلست معهم فترة وجت فرصة اكمل بكالوريوس, وانسحبت من تدرج ارامكو وكملت دراستي الكل عارضني لحظتها اهل واقارب واصدقاء كيف تترك ارامكو! ,المهم كنت متمسك بقراري والحمدلله تخرجت بكالوريوس و جتني فرص كثيرة مميزات ورواتب اعلى.
بالنسبة لدبلوم كلية الجبيل فهو خيار طيب اذا انك تبي تستقر فالجبيل لان كلية الجبيل خريجينها يروحون مباشرة لسابك او تصنيع بدون ماتقدم اوراقك
الشي الثاني تقدر تقدم على ابتعاث وتشوف لك جامعة امريكية او بريطانية تعادلك الدبلوم يصير تدرس سنتين وتتخرج بكالوريوس.
او اذا تبي تضرب عصفورين بحجر توظف بشهاددة الكلية وفي نفس الوقت كمل دراستك مسائي بكلية الجبيل او التقنية لكن المشكلة انه بفلوس.
او تقدر تكمل بكلية الجبيل الصناعية بكالوريوس او بكلية تقنية انتظام زي محدثك والقرار الاخير لك.
لكن الله يكتب الي فيه خير يارب وشكرا على النصيحة