بعد التحية، بدخل بالموضوع على طول. تخرجت من امريكا تخصص مالية و استثمار و قدمت على برنامج ( The banker ) للخريجين الجدد في البنك الفرنسي كان عبارة عن برنامج مدتة سنة بعدين عقد لمدة سنتين و المميزات فيها رهيبة و رائعة.
قدمت و سويت اختبارات SHL وعديت و سويت مقابلات ممكن عددها ٤ مقابلات و في أخر مقابلة من كلامها حسيت انو خلاص قبلوني بس باقي اوقع العقد !!! قالتلي عندك اخر مقابلة يسمونها interview panel مكونة من اشخاص مهمين في الشركة ومنهم المدير المالي و الموارد البشرية علمتني ايش الأسألة راح تكون وكنت جدا متحمس لأن حالتنا المادية جدا جدا جدا سيئة و قالتلي خلاص تعال الاسبوع القادم برسلك ايميل و خلك جاهز. قلت الحمدالله راح اتجهز لها كل التجهيز من الحماس ! مر يومين ثلاثة اربعة و ماوصلني ايميل !! مر ستة ايام و لا جاني شيء قلت مو معقول ! طبعا كنت يوميا ارسلها على الأيميل لكن ماترد علي ابد و احاول أكلمهم هاتف و محد يرد ! قلت لنفسي خليني اروحلهم ، رحت و رفضو يدخلوني لأن ماعندي موعد و قلت بسوي موعد و بالموت دخلت بعد ما انتظرت ساعتين رحت قابلت مدير الموارد البشرية و قلتلة السالفة.
رد علي قالي أسمع فية بوزشن ثاني في قسم التريدينق !!! قلت وش صار على المقابلة الأخيرة !! و الكلام من الموظفة !!
قال هي راحت أجازة و صار في لخبطة في المووضع و المفروض جتك رسالة اعتذار !!
كنت دبلوماسي في الموضوع ماودي اعقدها لأنة عطاني عرض آخر وكانت واضحة كل الوضوح ان في واسطة شالتني و العدد جدا محدود
قالي خلاص بيجيك ايميل و تجي تسوي مقابلة. قلت اوك مر ثلاث ايام تقريبا و دق جوالي تقول الموظفة وينك تأخرت !! قلت وش تقولين انتي ماعندي مقابلة اليوم ! قالت الا عندك اليوم الساعة ١٠ ! قلت و الله ماجاني شيء ادخلي الأيميل حقك و شوفي و طلع معي حقك نست ترسلي و اعتذرت قالت برتب معاك مقابلة ثانية.
المهم ضاق صدري حسبي الله عليهم و سحبت عليهم خلاص معد اهتويتهم ابد ابد يعني حتى لو تجيني الوظيفة ما اتوقع اني بشتغل زين عشان الي سووة فيني.
حبيت اشاركم الي صارلي و اطلع الي في صدري من غضب لكن الحمد الله على كل حال.
أخوي أنا جدا متفهم وضعك وأنا ألحين مثلك ماجستير محاسبة من أمريكا وللحين في البحث عن الوظيفة. حبيت بس اقولك ما تضيق الا وتفرج ولا بعد العسر الا اليسر ولا فيه شي يجي بالسهل.
أتمنى يوم انك طلعت غضبك هنا تكون استعدت حماسك للوظيفة وادعي لك انهم يكلمونك باقرب فرصة ويقدمون لك العرض.
نصيحة لو حددوا لك مقابلة ثانية فلا تسحب عليها . يمكن الي صار لك مع الموظفة الأولى خطأ وتقصير منها ، مايعني ان البنك كله ماشي بالبركة وهذا نظامهم.
و إن شاء الله الي صار انه خيرة ، اعرف اكثر من شخص صار له مواقف أسوء من الي صار لك ، مع بعض الشركات و منها شركات كبيرة ، لكن الحمدلله الله عوضهم بوظايف في شركات أفضل و بمميزات أقوى.
تقريبا صار لي نفس الشي مع شركة 3 مقابلات و اختبار و في النهاية ألغو الوظيفة ، لكن سبحان الله ال 3 مقابلات والاختبار مع الشركة الأولى كانت كأنها تدريب لي عشان مقابلة مع شركة كبيرة براتب أقوى من الشركة الأولى
فلا تتحطم و تأكد إنها خيرة لك مادامك سعيت و اجتهدت لكن الأهم الواحد يسوي الي عليه و لا يسحب على أي مقابلة او اختبار.
انا بوظيفة بشركة حكومية ووظيفة جدا ممتازه عديت المرحله الاولى واللي قدم عليها فوق 12 الف شخص وتم الفلتره الى حدود 5 الالف متقدم و المرحله الثانيه اختبار الانقلش وتمت فلترت المرشحين الى تقريبا 1500 متقدم والثالثه مرحلة المقابله الشخصية وكانت مقابلة شخصية منفرده و مقابلة case study وعديتها كلها
وتم التواصل معاي وعلموني المميزات والبدلات و البوزيشن وقالو سو التحليل الطبي وسويته وارسلت لهم الاوراق اللي طلبوها. طبعا انا موظف
وكنت ناوي اقدم استقاله خلاصص واجيهم بس من حسن حظي قال الموظف انتظر وارسلك ايميل عشان تقدم استقالتك .
وش حصل ؟ اتصل علي بعد الداوم يوم خميس وب اسلوب مهذب علمني ان الادارة رفضت توظيفي وانه مالي نصيب . صراحه هالموقف صدمني صدمة العمر
لان الوظيفة والمميزات كانت بتقلع فيني من مرحله الى مرحله وطول الفترة كنت احلم واطمح وفجأة يقول مالي نصيب
عاد رحت لهم وقابلت مدير الاتش ار وقال خلك ستاند ابد بنتصل عليك ( عرفت انها تصريفه )
ف ياصاحبي لا تحلم بالشي ولا تتعلق اليييين يجيك توقع العقد . وبأذن الله يتم الرد عليك
حبيت اشاركك الموقف اللي صار معي لاني حسيت ب احساسك الحين . وصدقني خيرة
اخوي حاول تشوف ال junk mail و اذا كنت تستعمل gmail شوف ال spam mail. لان انا صارتلي نفس حالتك وراحت علي مقابلة مع شركة ما رضوا يسوون موعد جديد.
و الله يوفقنا وياك.
حتى لما توقع العقد برضوه ما فيه أمان
واحد من زملائي بالشركة الان
وقع عقد لما وصل مدير الشركة قال غيروا عقده و طيروا عليه حوالي 2000 ريال بالعقد الجديد
طبعا وقع و سلم أمره لله لأنه كان عاطل