أسعد الله أوقاتكم بكل خير، استفساري بارك الله فيكم كالتالي:
أنا خريج أمريكا وسوية مقابلة مع أرامكو في شهر مارش وكانت المقابلة الحمدلله جيدة، قالوا بنرد عليك خلال اسبوعين ثم جلست انتظرهم شهر، بعدها جلسوا يتصلون علي لمدة اسبوع في شهر ابريل، اتصلوا علي اكثر من اربع مرات وكل مرة يقولون سو اختبار البلايسمنت تست في اقرب فرصة. بعدها سويت البلايسمنت تست في شهر اربعة قبل رمضان، ثم جلست أنتظر وبعد رمضام كلموني اسوي ڤريڤكيشن تست في شهر نهاية شهر جون وبعد ماسويت الاختبار قالوا لي انه ڤريفايد وبيتم التواصل معي، وإلى الآن وأنا أنتظر منهم رد رحت لهم قبل أسبوع في مكتب التوظيف وسألتهم وشيكوا وقالوا لازالت البروسس ماشية.
فهل لديكم أي إفادة بشأن هالاجرءات؟ وهل اللي صاير معي هي اجراءاتهم الطبيعية ؟
السلام عليكم ورحمة الله وبركاته
مساء الخير
أسأل الله لكم وافر الصحة والعافية
شباب الله يرضى عليكم عندي كم سؤال وأتمنى رجل ثقة يجاوبني ضروري
أنا طالب حديث التخرج من جامعة الحدود الشمالية من كلية العلوم والآداب قسم بكالوريوس الكيمياء معدلي 4.49 من 5 مع مرتبة الشرف الثانية قدمت على أرامكو أول ما تخرجت وقبل أسبوع جاني أتصال منهم أنهم قبلوني والعمل كان Lab Scientist وطلبوا مني الحضور للمقابلة وبالفعل حضرت المقابلة وكانت المقابلة جميلة في حالة تم قبولي بإذن الله
أبي الجواب على كم سؤال أبي أطرحهم
1/ مكان العمل في مصفاة جازان وهي إلى الأن ما فتحت هل راح ينقعونا على ما تفتح ولا يشغلونا برأس تنورة على ما يتم تشغيل المصفاة ؟
2/ كم الراتب الأساسي وماهي البدلات المتوفرة لطبيعة عملي وهل لي زيادة على مرتبة الشرف حتى ما ينضحك علي بالعرض الوظيفي
3/ وبخصوص برنامج ال Pdp ياليت أحد يشرحه بالكامل مع ذكر الأرقام الصحيحة والمعتمدة يعني زيادة كل 6 شهور أعلى شي 10% مثلاً من هالنوع ؟
أتمنى الرد ضروري جداً جداً
أسف على الإطالة والله يعطيكم العافية وشاكر لكم
جازان مفتوحة اذا ما خاب ظني و اذا ما فتحت فما عندي خلفية كيف بصير
يختلف باختلاف الجامعة وانا اخوك بس غالبا 12 الف اساسي فوقها ارامكو ما عندهم نظام اللي يضحكون فيه على احد
ال pdp بكون كالتالي كل ستة شهور قسم و تقييم
نفرض ان اعلى زيادة هي 10 % سنويا اللي بصير هو كالتالي ان اذا اخذت اعلى تقييم بيعطونك نصها اللي هي 5 بالمئة بتسال ليش لان تقييمك بكون مرتين بالسنة اتمنى تكون وضحت الصورة و موفق يا رب
انا كلموني بخصوص المقابله قبل شهرين وسويت المقابله وحسيت انهم مبسوطين من المقابلة بعدها بشهر جاني assessment test online قبل حتى ما ارسل الإختبار جاني رفض وش السالفه يا جماعه الخير
علما انا لدي خبره اربع سنوات والوظيه يبودوا انها للفريش
يا اخوان انا سويت مقابلة مع قسم ال Pipeline distributions & terminals
قبل ٥ شهور من الان و لم يأتيتي اي رد لا بالرفض ولا القبول ولا باي اختبار او اي اجراء. فقط اللي سويته المقابلة لا غيييير. و كل ما اكلم الدايركت هاير يقولون لي حالتك تحت الاجراء و كل شي عند القسم اللي سوا معاك المقابلة حنا مالنا اي شغل. هل معقولة توصل ٥ شهور بدون اي شي سوا انهم يرسلون لي رسايل الرجاء تحديث بياناتك في ارامكو مع انه ما فيه شي جديد يعني ليش احدثها!!!
انا في شهر ابريل الماضي جاني اتصال من مكتب ارامكو بالرياض بخصوص اسوي اختبار الاسسمنت سيست وسويته وكان سهل جدا , وجلست انتظر علشان يتصلون علي مره ثانيه بخصوص الفريفكيشن تيست ولا اتصلو رحت لهم مكتبهم في الظهران قالولي لسى انتظر اتصلت عليهم على رقمهم مكتب التوظيف اكثر من 10 مرات خلال فترة الانتظار قالولي انتظر, رحت لهم يوم التوظيف في معرض الظهران وفي البترول يقولون تواصل مع مكتب التوظيف. مو معقوله يا اخوان الان كملت اكثر من 8 شهور انتظر اتصالهم وش تنصحوني اسوي ؟.