السلام عليكم ورحمة الله وبركاته …
اسعد الله صباحكم بكل خير …
يالربع اخوكم في حيره من أمره ، والله يكتب اللي فيه خير ، انا خريج هندسة مدنية و انقبلت نهائي في وزارة الدفاع ، ومشيت في إجراءتها وسلمت اوراقي ، والمفترض الدورة تبدأ نص شهر ١ او بدايته ، اللي ودي اقوله انا لازلت محتار وأحرها وابردها على قولتهم ، انا في شركة الان من سنة ونص تقريباً والصراحة ماهي الطموح للاسف ولو كنت مخير بينها وبين العسكرية رحت العسكرية وانا مغمض ، لكني انتظر رد من شركة أمريكية كلموني قبل شهر وارسلولي العرض المبدئي وتفاصيل المشروع وطلبوا صورة من الجواز كان وقتها الراتب فل بكج ١١٥٠٠ مع خصم التأمينات ، وكلمتهم قبل فترة قالولي توظيفك مضمون باذن الله لكن أوراقك تمشي في الجهة الحكومية كإجراءات رسمية ، واتوقع والعلم عند الله بيردولي بعد العيد باذن الله ، اللي ودي اقوله لو جاتني الشركة الان محتار وش اختار ، وجميعنا نعرف القطاع العسكري إيجابياته وسلبياته ، وانا في حيره الصراحة ، لان الشركة عند اهلي وفِي الرياض ، لكن الدوام طويل نوعاً ما وما ادري عن وضعي اذا خلص المشروع بعدين ، وأحياناً اقول يارجال خش العسكرية وريح راسك ووظيفة حكومية وراتب زين ووجاهه لكن تعيينك اكيد بعيد عن أهلك ، فَلَو كنتوا مكاني وش بتختارون ؟ وليش ؟!
وعليكم السلام ورحمة الله وبركاته
الي اشوفه العسكريه تستلم حدود ال 16000 واستقرار وظيفي لاكن الي درسته بتنساه اكثر الشباب الي اعرفهم مايشتغلون على التخصص
فا انت يا انك تشتري راحت البال و استقرار بلوظيفة وراتب حلو بس تبيع الي درسته
او اذا انت تبي تدخل بتحدي ثاني الي هو تدخل مع شركة الامريكية *اذا كنت ضامنها* وتكسب خبره وتزيد خبرتك ومع زايدة الخبره بتكون بمناصب اعلى وكل الشركات تبيك
لاتخاف بتشتغل بالاشغال و الصيانه مضمون بحول الله بنسبة 90% بتخصصك ح تشتغل
انا خايف يحطوني بمختبر
قلبتها قلت بحط حد لها 10 سنوات وانا مستقيل
و ببدا بمشروعي و الاصح انا اشتغل عليه الآن
العيوب :
1-السفر خارج السعودية و دامك ظابط ما عليك امور سهلات غير الافراد
2-فتح ملف تجاري و هذي قلت هدفي بستقيل بعد 5 الى 10 سنوات لكن تقدر تضارب با الاسهم و العقارات او يكون مصنعك شركتك بغير السعودية او باسم زوجتك
المميزات :
اول مربوط بعد الدورة جدا حلم من 14 الى 16 يصل الى 21 بالحد مع باقي الفلوس وانت بالدورة نصف الراتب
يعني تتكلم عن اطلق شركة ممكن تسلم لك هذا الملبغ لكن بعد خبره 20 سنه لـ زمليك بالقطاع الخاص ممكن يغلبك بالراتب و الامتيازات الماليه نقول معليش انت اخذتها قبله
يعني تجمع فلووووس وتشتغل ع نفسك تطوير مهارات و تخطيط للبزنس حقك و شغل مريح نوعا ما
انا كنت محتار مثلك، لكن ما دخلت عسكرية والحمدلله، اخوي عقيد وقالي نصيحة لا تدخل خلك في القطاع الخاص افضل بمليون مره وغيره كثير ضباط قالوا نفس الكلام
وبعطيك رايي:
بشكل عام العسكرية افضل كـ امان وظيفي من اي شركة مهما كام اسمها وقوتها وهذي نقطة مهمه وايضا ساعات الدوام اقل لكن ممكن يلحقك استلامات فـ تصير ساعات دوامك مثل القطاع الخاص وفيها علاقات اذا كان قطاعك كويس وايضا وضع اجتماعي جيد وراتب عالي بداية حياتك.
بس عيوبها كثيره من ناحية التعيين الي غالبا بيكون بعيد عن اهلك ومستقبلها حسب ما اعرف ان توجه وزارة الدفاع تقليل عدد الضباط الكبار يعني توصل مقدم - عقيد ويقاعدونك (مو اكيد)
بالاضافة الى ان الراتب بعد 10 سنوات مقارنة مع زميلك الي اشتغل بالقطاع الخاص بيكون افضل منك خصوصا مع السعودة ومشاريع السعودية الضخمة المقبلة وطبعا هذا للي يشتغل ويثبت نفسه هذا غير ان بيئة العمل العسكرية سيئة زي ما الكل يعرف والاجازات بتكون محدود فيها وحسب الحالة العسكرية.
القطاع الخاص مافيه امان ابدا باستثناء ارامكو وسابك وبعض الشركات الحكومية، لكن الي يثبت نفسه دايم يكون مطلوب (هذا الي صار معي والحمدلله)
اذا انت شايف نفسك بتوصل لشي كويس في القطاع الخاص وقاعد تتطور، انا انصحك تكمل في شركتك وتنتظر الشركة الامريكية وطبعا مع الوقت والخبره بتجيك عروض.
اما اذا انت من النوع الي تبي ترتاح ومعاد تبي تاخذ تحديات وتبي تستقر، فـ العسكرية ممتازة لك.
اسنخير وشاور اهلك وكل شي يعتمد على رغبتك والله يكتب لك الخير.
ما كانت مهتم بالموضوع لكن استفزتني الصراحة قولتك الحفر ولا تبوك ولا نجران …!!!
طبعا انا متاكد انك تقصد انها مهي اساءة ولكن ماتبغى تتغرب تبغى تستقر
مثل ما انا ايضا متاكد ان فيه ناس بنجران والحفر وتبوك عاطلين ويتمنون وظيفة بمدنهم ماحصلو
لكن هذي يفتح مجال لمشكلة خطيرة ونادرا مايتم طرحها بعيدا عن الوظايف الحكومية او العسكرية
اغلب الوظايف وخاصة النوعيه تكون بالمدن الكبيرة فقط وصار عليها منافسة شديدة يعني
المدن مثل جدة والرياض والدمام الي فيها المنشاءات والمشاريع والخدمات والخ سعتها التوظيفية
اقل من عدد خريجين الجامعات الي في هذي المدن فقط فما بالك بخريجين مدن ثانية مافيها لا تنمية ولا مشاريع ولا يحزنون
فضلا عن المبتعثين…!
الحل هو ان ندعي الله ان يجينا وزير ياباني يلتفت لهذي المشكلة ويحلها لان خلاص فقدت الامل بالي عندنا…
الله يرزقنا وياك الوظيفة الي نتمنى
اختر العسكريه وبدون تفكير حتى ، انا دخلتها ولي سنه متخرج ( دورة 44 ) والحمد لله الراتب 16 ألف والعمل شبه مريح وفيه تطوير للضابط من خلال الدورات التأسيسية والمتقدمة وفيه مزايا أخرى كثير ، والتعيين فعلا مو عند الاهل ( الاهل بتبوك ) لكن هذي ميزه اني اكون بالشرقيه بحيث اتمكن من مواصله دراساتي العليا ( على رأس العمل ) علما ان الابتعاث متوفر عندنا ولكن بشروط ، اتمنى لك التوفيق
اكيد ماهي اساءة ذكرتها لان فيها قواعد عسكرية احتمال كبير يكون التعيين فيها ولبعدها عن الرياض هذي تعتبر شينة بالنسبة لي اكثر من الف كيلو عن الرياض مسافة بعيدة
ارسلولي العقد النهائي يالربع ، ومطلوب ارد لهم خلال ٤٨ ساعة ، حاب اسالكم ومقارنةً بحديث تخرج مامعه خبره الا سنة ونص تقريباً هل ١١٥٠٠ كويسه مقارنةً اني عند اهلي وفي الرياض ؟ ولا اتوكل على الله واخش العسكرية واغامر في قضية التعيينات ؟ أكثر هاجس لي ان الشركات مادري عن وضعها بعدين لانك مرتبط بمدة المشروع فقط … نورنا انار الله بصيرتكم لاني محتار
والله غالبا المهندس يعمل على تخصصه ، فمثلا أنا مهندس مدني وفي التشغيل والصيانة ( الشؤون الهندسية ) ، المهندس الكيميائي لا اعلم بالضبط لكن الاكيد انه في وحده يمارس تخصصه فيها .
