السلام عليكم
زملائي توظفوا عن طريق مواقع الشركات ماعرف احد توظف عن طريق طاقات
والبعض يقول الشركات تتحايل وتنزل اعلان واذا جاها تقديم تحذفه وتنزل اعلان جديد
انا مقدم من شهرين لـ 40 شركة والـ CV يعتبر جيد ولا في رد حتى بالرفض مافي رد
هل تعرف احد حصل على فرصة عمل من طاقات؟ والتقديم عن طريق موقعهم كفاية ام يحتاج اروح لمركزهم؟
شخصيا ً حصلت على عدة مقابلات غير جدية و مضيعة وقت …
قدمت على أكثر من 100 وظيفة عن طريق طاقات و هذا كل الي جاني .
شخصيا انا ما اثق بطاقات ، لكن فيه ناس توظفت عن طريقه
غالب اللي كنت الاقيه وظائف بشركات صغيرة ويجيني الرفض بدون سبب واظن كلنا شفنا اعلانهم اللي يبغو كاشير والمؤهل المطلوب ماجستير 
ولا كان فيه وظيفة هندسية براتب ما اذكره بالضبط لكن حول 4500 لما تقدم لهم شخص مناسب وكل شي ينطبق عليه عدلو في الراتب صار 3500 والدوام اطول عشان يجبروه يرفض (الشخص اللي صارله ذا الموقف كان معانا بقروب وظايف وورانا صور شروطهم قبل وبعد ما قدم ولاحظنا التغيير)
وزارة العمل تلزم الشركات تحط الوظيفة في طاقات لفترة محددة واذا ما تقدم لها شخص مناسب يسمح لهم يوظفو اجنبي بفيزا (ذا هدف بعض الشركات اللي تحط اعلان بطاقات يعني حتى لو كنت جايب كل الشروط راح يحاولو يرفضوك)
2 Likes
عن نفسي ماستفدت منه ولا شي
كل المقابلات اللي جاتني كان عن طريق التقديم بالايميل او موقع الشركة
في بعض الشباب توظفوا عن طريق الموقع لكن بشكل عام:
أغلب الشركات الموجودة صغيرة أو متوسطة و قليل منها جاد في التوظيف ويعطيك راتب بحسب ميزانيته و رينج الرواتب في الشركة ، لكن البقية يعطون رواتب ضعيفة عن قصد وهو تقليل عدد المتقدمين .
على العموم ما انكر في اكثر من واحد من الشباب توظف مع شركات برواتب نوعا ما معقولة بين 8000-10000 لكن بقية الشركات نادرا ما يتجاوز الراتب 7500
والشركات الكبير الي في الموقع الفترة الاخيرة بدأت تطرح فرصها عن طريق برنامج تمهير على نفس الموقع ، بتلاحظ هالشي لو شفت الفرص الموجودة في تمهير اغلبها شركات كبيرة وبنوك
بخصوص مركز طاقات هو يفرق عن الموقع ، وهو انك تروح وتسوي ملف عندهم وراح يقدمون لك خدمة مراجعة السيرة و احيانا تقديم استشارات مع متخصص في الموارد البشرية واحيانا يكون فيه لقائات توظيف في مدينتك فيتواصلون معاك ويكلمونك ليوم المقابلات مع الشركة
طبعا الشركات الي تسوي يوم للمقابلات غالبا تكون افضل من الي مطروحة في الموقع
في النهاية الموقع أقل من المستوى لكن مايمنع الواحد يحاول يقدم ، صحيح تحطيم انك تقدم ويجيك رفض بدون سبب واضح أو حتى مايتم الرد عليك
لكن ما تدري يمكن تكون وحدة من هالشركات جادة في التوظيف .
3 Likes
للاسف مقابلات غير جدية واغلبها تطلب خبرة
للأسف ما فيه جدّية في التوظيف وأغلبهم يطلب الخبرة
عن نفسي قدّمت على أكثر من 80 شركة والنتيجة رفض بسبب إما الخبرة - مخرج رقم 1 - أو المهارات غير مناسبة - هذا مخرج رقم 2 -
حصلت على أربع مقابلات فقط من خلال موقع طاقات ، اثنتان منها كانت مع نفس الشركة وكانت في الرياض و في الواقع لم تكن مقابلة ، بل اختبار تحريري عن التخصص
في المرة الأولى حلّيت بعض الأسئلة وكانت متوسطة في الصعوبة وبعدها بإسبوعين تواصلت معهم وقالوا لي أن المقبولين أرسلنا لهم إيميل يفيدهم بالقبول . أما المرة الثانية توقعت أن الأسئلة ما راح تتغير وفعلاً ما تغيرت وجاوبت على كل الأسئلة إجابات صحيحة 100% وبنهاية الإختبار قالوا لنا إكتب الراتب المتوقع
وكتبت لهم نفس اللي كانوا عارضينه في الموقع - 6000 ريال - ولا زوّدت عليهم ريال واحد والنتيجة رفضوني للمرة الثانية . أتوقع السبب هو أنهم يبون واحد من سكان الرياض وبنفس الوقت يكون راتبه قليل .
المقابلة الثالثة كانت مع مصنع للحديد . قدّمت عليهم عن طريق الموقع و وافقوا على الطلب وحدّدوا لي موعد للمقابلة الشخصية وافقت عليه و رحت لهم ، طبعاً صباح يوم المقابلة وقبل الموعد المحدد بساعتين شيّكت على الإيميل قلت يمكن فيه شركات ثانية ردّت علي وإلا لقيت تنبيه مُرسل من الموقع قبل 10 دقايق يفيد برفض طلب التوظيف من قبل المصنع اللي ناوي أسوي معهم المقابلة الشخصية . رحت لهم وسويت نفسي ما دريت عن السالفة ، المهم وصلت للمصنع وقابلت موظفين هناك لكن مسؤول التوظيف ما كان موجود وقعدت أنتظره تقريباً 15 دقيقة ، بعدها اتصل مسؤول التوظيف على أحد الموظفين وقال أعطني إياه لأني ما راح أرجع للشركة إلا بعد الظهر . كلّمته وقعد يسأل من وين متخرج ومتى تخرجت وبعدين سألني عن الخبرة وقلت له أنا حديث تخرج وما ماعي خبرة ، قال معليش حنا نبي واحد معاه خبرة ويعرف يتعامل مع الآلات
تذاكر طيران و سكن و مواصلات وخساير والنتيجة رفض ويا ليتني قابلته بعد لا كانت عن طريق الجوال .
المقابلة الرابعة وبصراحة ما كان فيه مقابلة ، قدّمت على مصنع مياه وبعدها بشهرين وافقوا على طلب التوظيف وحددوا موعد المقابلة في اليوم التالي ، رفضت الموعد لأن جاني الرد الساعة 1 الظهر في يوم الإربعاء والمقابلة كانت الخميس الساعة 9 الصباح . إقترحت يوم آخر لأني ما أقدر أحضر على الوقت لأن مكان المقابلة يبعد عنّي أكثر من 450 كم . كنت محظوظ لأن اسم مسؤول التوظيف و رقم جواله كان موجود على الموقع ، حاولت أتواصل معه أكثر من مرة لكن ما يرد على جواله ، طبعاً قررت أني ما أسافر وأتعب وبالنهاية يكونون طالبين خبرة ، بعدها بكم يوم جاني رفض منهم لأني ما حضرت المقابلة الشخصية
الخلاصة :
1- معظم الشركات ليست جادة في التوظيف
2- حاول تتواصل مع الشركة وتأكد من جدّيتهم معاك قبل لا تروح لهم
3- قدّم على الشركات المعروف نشاطها وإسمها فقط
4- أكثر الشركات يبون المتقدم يكون ساكن في نفس المدينة علشان كذا لا تقول لهم أنا جاي من بعيد
5 - لا تطلب راتب أكثر من 5000 ريال وإلا راح يرفضونك على طول
أعتذر عن الإطالة
1 Like
+1
نفس شي معي مع 5 شركات واغلبها تسكيت لمكتب العمل وطاقات
1 Like
تفاءلنا باخر سنة بالجامعة ببرنامج طاقات حيث كان الخوف دائما عن طريقة تواصلنا مع الشركات وتيقنا أن طاقات سيحل هذه المشكلة،لكن شيء مؤسف والله خيبة الأمل هذه.
زميلي لما طرحت عليه الموضوع قال في شركة منهم سوت معي مقابلة وجاوبتهم على كل سؤال وعلى اساس حاتوظف عندهم خلاص! بالنهاية قالوا له احنا نحتاج مدني وانت ميكانيكي ! طيب والمقابلة الي لها ساعة؟ والله شيء مؤسف. وايميلات الشركات والتوظيف الي وصلتنا اغلبها قديمة وانتهت صلاحيتها،لدرجة من كثر تقديمي عليها ويطلع الايميل قديم ومنتهي تقفل ايميلي لكثرة الرسايل،ومواقع الشركات الكبيره تاخذ شهور لين يردوا عليك وشهور بعد المقابلة الشخصية، الخطة اخذ السي في حقي واروح المدن الصناعية وادخل عليهم بنفسي 
وعليكم السلام
بالنسبة للوظايف نفس المشاكل اللي ذكروها الشباب يجي الرفض بسبب (مؤهل + مهارات) برغم انه مو مذكور في إعلان الوظيفة أي منها.
وأراقبها فيه وظايف عادية ماتحتاج مؤهلات خرافية لها شهور وماتقفلت هل يعقل خدمة عملاء مثلا مو قادرين يحصلون شخص يستحق!
من تجربة شخصية برنامج تمهير أعتقد هو الأبرز من طاقات، الآن بالشهر الثاني بديت تدريب وكم شخص أعرفه بعد إلتحقوا وفيه منهم جاهم عرض عمل بعد شهرين من التدريب بدون مايكملون الفترة.
وبالنسبة للجدية بالعمل بتختلف من شركة لأخرى لأن الشركة مو خسرانة عليك شي وبالأكيد تبي تستغل الفرصة وتطلع اللي بجعبتك عشان يستفيدون منك وقت التدريب وحسب حاجتهم.
وفيه رقابة منهم على الحضور والدورات اللي يطلبونها منك وقت التدريب (دروب) وإرتباطها بالمكافاة يصعّب على الشركات إستغلالك.
العيب في البرنامج انه بعد مابديت البرنامج جتني عروض تدريب ثانية على مجال بالتخصص او يكون انسب من اللي انا فيه بس ماتقدر تغير عرض التدريب (حسب ما قريت ما ادري عن صحة المعلومة).
خلاصة السالفة برنامج تمهير هو الوحيد اللي بيفتح لك باب لممارسة العمل، أما الوظايف المعلنة مجرد ديكور.
1 Like
لي شهر ساحب عليهم طز فيهم والله الي بينتظرهم بيموت جوع
2 Likes
قدمت في طاقات على وظيفة مهندس كيميائي (تمهير) وجاني قبول لعمل مقابلة بعد اسبوعين تقريباً. يوم دخلت عليه قالي ترا ما فيه وظيفة ولا تدريب لمهندس كيميائي بس عندنا وظيفة رسمية شاغرة Hazard Safety Supervisor، وقال انت مؤهلاتك فوق الوظيفة لكن لو تبي تمسك خط السيفتي تقدر تبدأ من هالوظيفة. ما قهرني إلا انهم ما كانوا واضحين من البداية، وانا ملاحظ هذا الشي بكثرة في الفترة الأخيرة، الشركات صارت تستغل مشكلة بطالة المهندسين بعرض وظائف لا تتناسب مع مؤهلاتهم.
1 Like
نفس وضعي لكن اقبلها واشتغل ازين من انتظر حل لمشكلة المهندسين
1 Like
وانا نفسك، والمشكلة يغثونك بالايميلات
" تعليق الدخول الدوري "
لو الدخول منه فايدة كان ندخل بس للاسف ماستفدنا شي
1 Like