تخرجت من جامعة حايل لي ١٠ شهور وكل معرض وظيفي رحت له ومابقى شركه ماقدمت سيفي فيها يدوي وللحين عاطل والشركات كلها ماترد علي مدري وش الحل فقدت الامل لدرجة ودي ادخل عسكريه يمكن تقولون من السيفي عدلته وضبطته ويمكن تقولون عشان المعدل لان معدلي نازل ومو حاطه بالسيره لانه تحت ٢ من ٤ اذا احد يقدر يساعدني او يعلمني الاماكن اللي اقدم فيها بالشرقيه او الرياض او اي مكان اكون له شاكر ، العطاله ذبحتني
اول شي تسويه تاخذ اسماء كل الشركات الموجودة في المنتدى
وتبحث عن ارقام التيلفون او الايميل وتبدا بالاتصال والمراسلة
احس الشرقيه الخيار الافضل لانه في شركات كثيره وان شاء الله تحصل عندهم
صدقني راح تلاقي في المنتدى من يفيدك … وابدا مع الشركات الخاصه عشان تبني خبرتك هناك ومايصير احد اصلا ينتبه لنسبتك
اهم شي لا تستسلم او تسمع كلام المحبطين … صدقني الاجانب المهندسين جاوا السعوديه ومتخرجين من جامعات زباله ومعدلاتهم رايحه فيها واشتغلوا على نفسهم وحصلوا وظايف ممتازه
توكل على الله وابدا في البحث
والله يوفقنا ويوفقك
انا مثلك معدل في الحضيض وقدمت في كل مكان في خلال سنتين صار لي مقابلات معدودة ماصار لي نصيب
نصيحتي اشتغل مندوب مبيعات او اي مهنة تحتاج سعودة وفي خلال عملك قدم على شركات في تخصصك … لا تظل عاطل هذا يؤثر عليك صحيا ونفسيا… اهم شي تحرك واشتغل اي شي ماتدري البركة وين … كلم اقربائك القريبين والبعيدين يتوسطون لك تشتغل في غير تخصصك
حماسك في البحث لازم مايوقف ابداً :
اسباب توقف حماسك ممكن يكون عدم معرفتك بالوظيفة اللي تبغاها وانت ايش تبغى من وظيفة بالضبط ، وانك تروح تقدم على اي احد على امل القبول من مصانع مثلاً بالرغم ان مجالك ممكن يكون واسع جداً لكن فيه مناطق ما اعدت النظر فيها، ( لغة الكلام مو لغة لوم لك ، لكن هذا جزء غايب عن الناس كثير )
اللي اقصده بمعرفتك بالوظيفة هو البحث عن ( المنصب الوظيفي ) او البوزشن اللي يناسبك وفي حدود قدراتك، ابحث الان وشوف جميع (المناصب ) اللي ممكن تتوظف فيها في تخصصك، صدقني راح تلقى ناس نفس تخصصك في لنكدان وشغالين في مجال تنصدم انه له علاقة مباشرة او غير مباشرة بمجالك !
من تحديدك للمناصب اللي تبغاها شوف المتطلبات لشغل المنصب هذا من بعض الشركات وحاول الوصول لهم ( طبعاً تعتبر انت جاهز وقارئ عن الوظيفة اللي عجبتك وعارف رؤيتك وين ) ، روح لهم حتى لو المتطلب خبرة سنة او سنتين ( روح مكاتبهم ولا تكتفي بالايميل او التقديم اونلاين )
انك تتوظف في شيء يتماشى مع قدراتك راح يسهل عليك حياتك في البحث عنه في البداية ( الشغف في البحث اكثر والوصول ) وكذلك حياتك العملية والترقية لاحقاً ،،،
موفق خير ان شاء الله