ابي مشورتكم الله لا يهينكم اذا تكرمتم في عرض و ظيفي من بيكر هيوز Field Specialist في ال drilling .
انا حاليا شغال في الوزارة في الرياض متعاقد مع شركة و راتبي 11 الف مع خصم التامينات و بقولكم الايجابيات و السلبيات الوظيفة الي انا فيها و هدفي الي افكر فيه طول اليوم
ايجابيات وظيفتي: ان مسماي هو مهندس صيانة مشاريع و راتبي حلو و دوامي عند اهلي في الرياض امي و ابوي و بدون بصمة و اجي متى ما ابغى و اطلع متى ما ابغى و عايش الحياة و عندي انتدبات تجي حدود ال 5 الاف تقريبا الحمدالله مستانس و عندي مكتب و اموري طيبة و مديري متساهل
السلبيات: مافيه اي تطور ابدا الانتاجية 0 انا متخرج من امريكا (هندسة ميكانيكية) لي سنة متخرج و الوحيد تقريبا الي يعرف انجليزي في الدوام مافيه اي تطوير بس سوالف و لا فيها مستقبل يعني اقعد سنة وبعدها يا يفصلوني او يشوفون وزارة ثانية يعني مافيه امان و ظيفي و لا اشوف نفسي فيها بعد خمس سنين و لا حتى سنتين في المجال هذا يعني من جيت الشغل ما تعلمت شي غير فلان قال و علان قال حش بالعربي
هدفي و طموحي: اني اصير منصب في شركات النفط حتى لو كرفوني و يصك راتبي 25 الف و طالع خلال الخمس سنين الجاية بحكم اني من الشرقية و شركات النفط من المقدسات و المهنة الي عليها الكلام و حاليا عزوبي الله يزوجكم ان شاء الله المهم مالكم بالطويلة بغيت مشورتكم هل فيه مجال لو اكمل في بيكر هيوز اني اصير منصب محترم في بيكر او في شركات الننفط بحكم ان General electric لها وزنها في السوق وخبرتها قوية و كيف حياة الرقوق نبي مشورتكم يا اهل الخبرة و شكرا
ما شا الله عليك رجل ذو طموح وعندك هدف وان شا الله توصله. انا راح اعطيك علم بيكر وعاد الحكم عندك. طبعا حسب ما فهمت جاك العرض في قسم الحفر يعني شغلتك حتكون M/LWD والشغلة هاذي ممتازة في الحفر ولها قيمة. بالنسبة للمسمى الوظيفي حاليا بيكر توظف المهندسين بمسمى field specialist وهوا مسمى المفترض لخريجين الدبلوم لان المتوقع للسبيشلست العمل في الفيلد لفترة طويلة في الفيلد.
نقطة توضيحية:
Field engineer: المفترض من ٣-٥ سنين فيلد وبعدها ينتقل الى المكتب ك project engineer/ engineer in charge وبعدها يصير مدير
Field specialist: العمل في الفيلد لفترة تصل الى ١٠ سنوات ومافي خطة واضحة للوصول الى المكتب. يعني انت وشطارتك.
طبعا كلامي مو ١٠٠٪ صحيح لكن هذا البارز لي في الساحة من خلال عملي (حاليا اشتغل في شلمبر)
الشباب كمان ان شا الله ما يقصروا ويعطوك ارائهم في الموضوع لربما احد شغال في بيكر يشوف الموضوع.
والله اشوف وظيفتك كويسه بحكم الراتب والقرب من الاهل وهذي الثنتين نعمه محد يحس فيها الا اذ فقدها .
وحلو يكون عندك طموح وتبحث عن الافضل . لكن المسمى الجديد يرجعك ورى مايفيدك غير ان المكان بالرقوق وضياع اجتماعي .
نصحيتي لك ابقى وابحث عن فرص بالهيئات الحكومية او الشركات الحكومية او الخاصه الكبيره بالرياض او الشرقية واكسب الجلسه عند اهلك . لو منك اجلس الين يجيني شي افضل بمكان افضل بمسمى افضل
وبالنسبة لموضوع الراتب انت بديت فرش ب 11 الف لاتتوقع بالمستقبل راح ينزل راتبك وانت معاك خبرة حتى لو خبرة " حش وسوالف "
اوافق تركي
خلك عند اهلك وبتلقى بنفس الرياض وخبرتك تشفع لك بالمستقبل ولا راح ينزل راتبك مع مرور السنين بل بيزيد ونصيحة الكرف صعب خصوصا لو تزوجت وبعيد ان اهلك فاشوف تبقى اريح لك واحسن ووظيفتك بالاخير ع مسماك الوظيفي وشركات الصيانة الكبيرة كثيرة بتلقى رزقك
حصل لي نفس موقفك بالظبط قبل 7 شهور تقريبا , ووصلي عرض لكن برى الرياض و غربة براتب يوصل ل 17 ألف ( وانا الحالي 11500 ) , لكن استخرت و استشرت وقعدت عند أهلي في الرياض و الحمدلله يشهد الله ماتحسفت , فنصيحتي لك استخر ومن رأيي اقعد وبيرزقك ربي وأنت توك فرش ومع الخبرة صدقني بتشوف نفسك حبه حبه ترقى , ورأيي مع رأي الشباب .
موفق ياكريم .
والله ياخوان اني اعاني من نفس الشئ
انا الحمدلله الان موظف في احدى الوزارات عن طريق عقد براتب ١٢ الف صافي، دوامي نففففس دوام الرجال سواليف والحضور كله تسيب ولافيه رقيب ولاحسيب والتطوير صفر مكعب.
جاني عرض من شركة حكومية في تخصصي ولكن راتبهم يفشل صراحة تقريباً صافي ٨ مع اني الحمدلله متخرج امتياز من جامعة مرموقة
الان انا قبلت العرض وصراحة منصدم من كلامكم للرجال ولو ان المقارنة مختلفة بحكم ان العرض اللي جاني يختلف عن اللي جاه ولكن بصراحة انا ودي اقول حاجة وهي ان الاستمرار في الحكومة والتعود على التسيب ولو ان الراتب عالي انا اعتبره انتحار وظيفي والله، يعني بالنسبة لصاحب الموضوع انا ماودي اخوفك ولكن احرص على الخروج في اسرع وقت وصححو لي ياشباب اذا انا غلطان، لكن والله الشغل الحكومي مايبني خبرة مثل ما تبني الشركات الحكومية او شبة حكومية او الخاصة، صحيح الراتب قليل ولكن الواحد ماعاد عنده خيار ياراتب ممتاز وخبرة صفر او راتب يمشي الحال وخبرة ممتازة
اللي ابي اوصل له ان التضحية لابد منها واذا كنت تشوف نفسك زي ما اشوف نفسي قاعد اخذ راتب وبدون تطور انصحك تطلع، انا الان ضحيت ب٤ الاف من راتبي وراحة في الدوام ولكن عندي ايمان ان الفلوس راح تجي في وقتها المناسب والاهم الان اني اتعلم صنعة تخليني اتميز عن غيري ودامك ماشاء الله عندك لغة كويسه انا اقول حرام تقعد في الحكومة ولو كنت مرتاح، موب شرط تروح لبيكر شوف غيرهم زي ماقالو الشباب ولكن احذر من الاستمرار في نفس هالطريق.
طولت في الكلام ولكن والله قاعد اعيش اللي تعيشه وحاب اشاركك افكاري
شكراً
وظيفتك الحالية:
1- المسمى الوظيفي كويس
2- مافي تطوير ، ومافي انتاجية على كلامك ولكن انا شايف انك مرتاح مو متضايق ولا شايل هم الدوام اليومي فهذه نقطة ايجابية ، والتطوير انت بنفسك تقدره تعوضه
3- الراتب كويس
4- عند اهلك
الوظيفة الثانية:
1- مسمى لخريجي الدبلوم ، وعيب على شركة بهذا الكبر تسوي ذي الحركات استغلالاً لخريجي الجامعات العاطلين
2- مو عند اهلك ، عن نفسي تفرق معايا كثير واعتبره سلبية
3- التطوير مو واضح ويمكن تروح هناك وتكتشف انه مافي ذيك الانتاجية ولو قعدت في مكتبك اصرف لك
انا من رأيي خليك في وظيفتك الحالية وانا داري انه فيك حماس ومعرفة تبغى تطبقها وتنتج لكن طبقها بوظيفة افضل (مسمى وراتب) مو اقل (دبلوم)
مالك عذر يا حبيبي مدام إنك فاضي و مروق ابدأ بالدورات التدريبية و فكر تحصل على شهادات احترافية مثل pmp و غيرها
طور لغتك
خذ دورات اونلاين في أنظمة الحريق HVAC الخ
خذ دورة سلامة اوشا نيبوش
تعلم للبرامج الهندسية اوتوكاد أو ريفيت أو بريفيرا ((إدارة المشاريع )) أو ساب أو اوركل (( للصيانة ))
هذا وقت لا يقدر بثمن استغله تمام
رأيي ترفض العرض لانه البوزشن مو للمهندسين و في بيئة كرف و غالبا اذا طولت فيها ما راح تروح بعيد عن هالمجال حتبقى في شركات الرقوق
صعب بعدين تروح على سبيل المثال لشركة بتروكيماويات
ماشاء الله انا اشوف استغل راتبك بتطوير نفسك بدورات و توقعي بيجيك عرض افضل من هذا بكثير
و اذا انت حاب هالنوع من الشركات و طموحك عالي لها لازم تتحمل المخاطره لانه قد ما يكون فيه اهتمام كبير فيك مثل الفيلد انجنير لكن بتقول انا بثبت نفسي و بوصل للي ابغاه فبقول لك الله يوفقك
لازم تحط في بالك ياصديقي ان شركات السيرفس ومن بينها بيكر هيوز عندها اختبارات سنوية وكورسات مكثفة … وضروري جدا تنجح بنسب عالية “٨٠٪+” في هالاختبارات ولا وضعك يصير حرج. غير انك اوفر كوالفايد … و المسمى و طبيعة العمل فيهم بخس كبير في مؤهلاتك كمهندس.
كل شيء متعلق برغباتك
لو كنت مكانت كان قبلت ببيكر هيوز لاني راغب وبقوة بشركات السيرفس وافضله على الراحة وقرب للاهل على الاقل اول السنين
لكن اذا كنت محتار بينهن انصحك تبقى بوظيفك وتطور نفسك خلال الدورات او تدور شركة عند اهلك تطور نفسك وراتب اعلى
انا احترم تفكيركم بالتطور والبحث عن فرص افضل لكن مايعني مع اول فرصه اطلع او اتناسى السلبيات .
ماشاء الله انا اشوف رواتبكم جيده ولو انا منكم ب استغل ميزة الراتب وقل الشغل بالدورات واحتمال اكمل ماستر ع حسابي بما اني بالرياض .
كلمة خبرة كلمة فضفاضه كل شخص عنده تعريف لها خاص فيه بعضهم يعرفها ان الشخص يكون ملم بكل صغيره وكبيره يعني خبرة تكنكل وبعضهم يعرفها خبرة ادارية واشرافيه . انتبهو من كلمة خبرة لان التفسير الخاطي لها ممكن يكلفك قرارت مهمه بحياتك .
لكن موضوع الرجال والانتقال ل بيكرهيوز قرار يرجعه للخلف . لا مسمى زين ولا راحه وقدام خبرته تصير محصوره بالoil services وبأمكانه الحين يدور دورات تقوي السي في حقه و او يكمل دراسه او ع الاقل يكون بالرياض عشان يقدر يقدم ويشوف الفرص الاخرى
و حاليا عزوبي الله يزوجكم ان شاء الله 
المهم مالكم بالطويلة بغيت مشورتكم هل فيه مجال لو اكمل في بيكر هيوز اني اصير منصب محترم في بيكر او في شركات الننفط بحكم ان General electric لها وزنها في السوق وخبرتها قوية و كيف حياة الرقوق نبي مشورتكم يا اهل الخبرة و شكرا