بسم الله الرحمن الرحمن الرحيم
أهلا وسهلا بالجميع، من زمان عنكم، نعود بموضوع جديد لعل فيه ما يفيد للاخوة الطلاب والخريجين.
العمل في منطقة نائية ماله وما عليه.
أكملت حوالي سنة أعمل في منطقة نائية وأظني تعلمت الكثير في صحرائنا الجميلة 
ان شاء الله نقدر ننقل للاخوة شي مفيد
أول وأهم نقطة لازم نعرفها أن المناطق النائية تختلف اختلاف كبير جدا، بعض المناطق تكون فعليا مافيها ولا شي غير حفار الابار وكم بورتبل للمكاتب والسكن وبعضها على العكس تماما تكون منطقة سكنية متكاملة لكن نائية وبعيدة عن المدينة.
تشترك جميع المناطق النائية تقريبا في بعض المميزات والمشاكل، ألخصها كالتالي:
المميزات:
1- ارتفاع الدخل الشهري
الدخل الشهري بيزيد بسبب البدلات والاوفر تايم، تختلف من شركة لشركة ولكن يعني خلني أقول أن المتوسط هو زيادة بحوالي 50٪ عن الراتب الطبيعي، نقطة ثانية أنك ما بتصرف شي، في المنطقة النائية كل شي ببلاش فدخلك السنوي بيزيد أكثر
2- التفرغ التام من جميع المسؤوليات الغير عملية
بتتفرغ لشغلك تماما، بيكون عندك مجال أنك تركز وتبحث وتتعلم أكثر بكثير من وظيفة في نص البلد ومحد بيطلب منك شي خارج العمل كونك ببساطة غير موجود، في ناس تشوفها ميزة مهمة جدا خصوصا اللي ما تعود على المسؤولية العائلية أيام الجامعة أو في بدايات حياته مع أهله
بينما المشاكل في هذه المناطق هي:
1- طول ساعات العمل وطبيعته الصعبة
غالبا العمل يكون 12 ساعة عالاقل، بتبدأ العمل بدري جدا (6 صباحا غالبا) ولازم تدخل في المعمعة على طول لأنك جالس تستلم شغل ولازم تاخذ ابديت ايش صار وأنت نايم، الناس في المناطق النائية ممكن يكونوا tough أكثر من غيرهم بسبب قلة العاملين في العادة (عدد أقل بساعات عمل أكثر)
من التحديات مثلا أن بريك الغدا بيكون في نفس مكان عملك، ما يمديك تطلع مع الشباب تتغدا في مطعم لأنه ببساطة مافي مطعم! كمان صعب تسوي نشاط بعد الدوام لأنك بتكون مستهلك، هذا ممكن يؤثر على وزنك وصحتك.
تحدي آخر مثلا لو تبغى تسوي ميتنق مع واحد مو موجود ما تقدر تتواعد معاه بعد ساعتين، لازم ترتيبات وحجوزات
2- الصعوبات اللوجستية المعتادة
هذا يمكن أكثر شي يضايق، مثلا لو ما جبت معك شاحن الجوال راحت عليك يا عزيزي 
3- قلة التواصل مع الناس
وحدة من أكبر المشاكل، اللي تشوفهم في الدوام هم نفسهم اللي تشوفهم بعد الدوام، باختصار مافي غيرهم، في رأيي ضروري الواحد يحافظ على علاقات مع الناس ويبني له مجتمع هناك ويحافظ على علاقة جيدة مع الجميع
4- كثرة السفر من وإلى مكان العمل
شخصيا أسافر بشكل أسبوعي والموضوع في البداية عادي لكن بعدين تبدأ تزهق، الحلول كثير: قراءة، بودكاست، نيتفليكس، نوم الخ
5- انتشار كثير من العادات السيئة
بلا مبالغة أكثر من 80٪ في المناطق النائية مدخنين، وعاد تشوف جميع أنواع وأشكال الدخان، كثير جدا ما كانوا مدخنين وخلال أسابيع قليلة بدأو بالتدخين بسبب البيئة المحيطة.
طيب نجي لسؤال مهم، هل المناطق النائية مكان جيد للعمل؟
الجواب: في رأيي، بشكل عام العمل في مناطق نائية شي غير صحي على المدى الطويل، قابلت كثير من الشباب لهم سنين في المناطق النائية، ولا واحد منهم مرتاح في حياته والكل يدور الخروج بأي طريقة حتى لو استقالة، من ناحية أخرى العمل لفترة محددة في منطقة نائية هي فرصة ممتازة لتوسيع المدارك وكسب خبرة عملية وعلمية. أكبر غلط تروح منطقة نائية عشان الفلوس لأنه بعد فترة بسيطة بتكتشف أن الفلوس هذه مو جالسة تفيدك ولا أنت عارف تصرفها.
أتمنى يكون في الموضوع ما يفيد 