بحكم متابعتي للمنتدى من سنه تقريبا ومعرفتي بعقلية اعضاء ومشرفين المنتدى الكرام ،، قررت اني استشيركم في موضوع مهم جدا بالنسبه لي …
انا في فترة اختيار التخصص بجامعة الملك عبد العزيز وانا بين الهندسة والطب وانا اميل للهندسة بنسبه بسيطه ولا اكره الطب ( ولو ضمنت وظيفة في شركة كبيره لاخترت الهندسة بدون شك ) لكن الوضع الحالي في التوظيف مخيف جدا ولا يخفى عليكم (صحيح ان الوضع قد يختلف بعد اربع سنوات لكني خايف من المخاطره )
ولله الحمد معدلي عالي في التحضيري وبإذن الله بتخرج بمرتبة شرف اولى او ثانيه يعني بمعدل فوق ٤.٥٠ من ٥
هل لو تخرجت بالمعدل الي ذكرته بحصل وظيفه في شركه كبيره ؟ ( زي سابك وارامكو مثلا )
اهلا وسهلا بك
ماشاء الله معدلك عالي بالتحضيري
التوظيف بالشركات الكبيرة مثل ارامكو وسابك تقريبا صعب
شوف الهندسة بها عيب ممكن تتخرج وماتلقى وظيفة بالشركات الكبيرة ولازم تبدأ من صفر وممكن تضيع سنوات كثيرة من عمرك وانت بالشركات الصغيرة وممكن العكس تتوظف بسرعة بالشركات الكبيرة يعني الوضع مجازفة بينما الطب افضل بالكثير وزارة الصحة تطرح وظائف كبيرة ولهم سلم رواتب بينما المهندس لايوجد له سلم رواتب والطب رواتبهم عالية ومستقبله جميل وفرصة تتعين عند اهلك كبيرة وخاصة اذا كان معدلك عالي تتوظف بسرعة بينما الهندسة ممكن تعاني كثير وساعات العمل طويلة بالشركات
وبالنهاية انصحك بالكلية الطب
أولاً الموضوع رزق من الله ما أحد يقدر يقول لك انك بتحصل وظيفة بشركة كبيرة أو صغيرة …
الحياة فيها مخاطرات في بعض الأحيان، لكن دايماً فيه معطيات الواحد يفكر فيها عشان يقدم على مخاطرة …
هل رغبتك هي الهندسة أو الطب ؟
اذا رغبتك الهندسة توكل على الله، لا تقول ابي اضمن وظيفة في شركة كبيرة و انت للآن حتى ما درست اول ترم !! انت جالس تفكر في مشكلة للآن ما حصلت و ما تدري اذا ح تواجه هالمشكلة أساساً ! يمكن ربك ييسر لك وظيفة في افضل شركة هندسية مستقبلاً لكن ما ترتاح فيها نفسياً و ترتاح بشركة صغيرة … كل هالأشياء في علم الغيب فلا تتعب نفسك بالتفكير في مشكلة ممكن تحصل و ممكن ما تحصل …
نفس الكلام ينطبق على الطب ! ممكن انت تفكر انه و الله الوظيفة فيه مضمونة لكن ما تدري ممكن لا سمح الله ما تعجبك دراسته و ما تكمل أو تتخرج و تتفاجئ بظروف نفس الي واجهوها المهندسين في السنين الأخيرة و حالت دون توظيفهم … كل هذي الأمور ممكن تحصل …
خلاصة كلامي ان اختيار التخصص بناءً على مقارنتك خاطئ جداً … اختار التخصص الي تحس انك راغب فيه و بتبدع فيه، و الوظيفة سواءً في شركة كبيرة او شركة صغيرة هذا رزق من الله و تفكر فيه لما تتخرج ان شاء الله … اما فكرة انك تختار التخصص بين الهندسة و الطب بناءً على ضمانك للعمل في شركة كبيرة طريقة خاطئة لاختيار التخصص و المقارنة بين التخصصين …
ماعندي مشكلة ابدا مع المناطق النائية او اني اشتغل بعيد عن مدينتي ،، استخرت واستشرت واحد من اقاربي ( دكتور في نفس الجامعه ) وواحد من عياله في كلية الطب ( والثاني درس في كلية الطب سنتين وحول للهندسة وماشاء الله الان موظف في الرياض براتب ١٧ الف) ،، ونسيت اقول هالمعلومه ( واحد من اقاربي موظف في سابك من ٢٠ سنه ووظيفته لها علاقه بالتوظيف بشكل مباشر ،، وقد وظّف ناس كثير قبلي عشان كذا افكر اني اجيب معدل عالي ويوظفني في سابك
صادق والله ، لكن الواحد لازم يفكر في موضوع الوظيفه الرغبه لحالها ماتكفي والطب له كادر ووظايف حكوميه وتخصص نادر ومطلوب جدا وهذي اكبر ميزه له ( وانا ذكرت اني اميل للهندسة ولكن ما اكره الطب ) ،، وطبعا بفكر في المشكلة قبل ماتحصل لاني لو تخرجت مهندس وحصل الي كنت خايف منه لازم اني ارضى فيه لانه ماعاد بيدي شي ،، واخيرا حبيت اسألك انت متخرج ؟ او تعرف مهندسين متخرجين ؟؟ ،، وانا زي ماقلت للشباب فوق عندي واسطه قويه في سابك ( لها علاقه بالتوظيف ) فاا رايك اعتمد عليها وعلى معدلي ؟؟
اذا تبي راتب عالي طب. اذا تبي راتب عالي نسبيا هندسة.
انا انصحك في الطب دام ما عندك مشكلة تتوظف في اي مدينة. الطبيب في السعودية اعلى راتب ممكن تاخذه على حد علمي + بدل سكن ٥٠ الف سنويا غير البدلات والتطوير فيه ممتاز هذا طبعا اذا في الحكومة.
اول مربوط لك فوق ١٢ الف ( ممكن ١٤ او ١٦ ) بس متأكد انه فوق ١٢ الف والعلاوات السنوية ممتازة ( عكس القطاع الخاص ما تدري سنة كويس وسنة لا) + اذا درست وتخصصت يرتفع راتبك.
الشي الوحيد ان مدة الدراسة اطول ( سبع سنوات )
الشي الثاني، حط في بالك ان اذا دخلت هندسة، راح تفرق معاك كثير في العمل لان احتمال تعمل في غير تخصصك بينما الطب معروف، راح تعمل طبيب وفي صلب التخصص.
الشي الثالث والاهم،
طلاب الطب اقل بكثيير من طلاب الهندسة.
الحمد لله عندي المعلومات الكامله عن التخصصين كلها ولكن سوق العمل للمهندس سيء جدا وانا ما اعرف الى اي درجة سيء فاا ودي اعرف لو جبت مرتبة الشرف الاولى او الثانيه وتقدير ممتاز هل بحصل وظيفه ؟ او ان الوضع مرره تعبان ؟
ومشكور على ردك.
جيد انك تفكر من الان ومبكرا بمستقبل التخصص واهنيك على هالشي
عالعموم انا بالمجال ١٥ سنه واقولك لاتفكر بارامكو وسابك حاليا لان الوضع صاير صعب على حديثي التخرج والشركات الكبيره اصبحت تبحث عن خبره اكثر خصوصا سابك… الجدد تقريبا شبه موقف
ارامكو اشوف فيه توظيف بس اكثر شي من البترول
خلاصة الكلام الوضع بالهندسة صار مو زي اول يعني ابداء باي شركة وكون خبره وبعدها تفكر بارامكو وسابك والشركات الكبيره
وبتلاقي نفسك تطلع طلعات قويه لان عندك خبره كبيره خاصه من الشركات الصغيره والمقاولين
وبالاخير هي توفيق والزمن يحكم قد تتغير الامور للافضل
الهندسه تخصص ممتاز بس للشخص اللي بالفعل يبي يبني خبره ويتعب على نفسه مو بس يدرس ويتوظف وراتب وخلاص. في وقت ماضي كان الوضع كذا لكن الان الجدد لازم يكافحون اكثر لان اتوقع عدد المهندسين كبير
وبالاخير كلها توافيق وركز على فهم تخصصك وان كنت انصحك بالميكانيكيه لانها زي الجوكر والله اعلم.
مقارنة بسهولة التوظيف والرواتب و الامان الوظيفي اكيد الطب يتفوق بمراحل , بس اختيار التخصص شي يرجعلك انت , هل عندك استعداد تكون طبيب ؟ هل عندك استعداد يكون دوامك في مستشفى وتقابل حالات وحوادث ومرضى يوميا ؟
انا كنت محتار زيك ودخلت هندسة و عاطل ومع ذلك لو يرجع فيني الزمن ما راح ادخل الا هندسة لاني ما اتقبل المستشفيات نهائيا
مع احترامي الشديد لك وانت خريج هندسة الي من صميم التخصص استقراء المشكلة و حلها قبل وقوعها جالس تقول ( انت جالس تفكر في مشكلة للآن ما حصلت )
راح ارجع و اشرح ليش الناس كانت تحسب تخصص الهندسة رائع ويعطي رواتب و ما انتبهت للجانب المظلم للوظائف الهندسية
من فترة الثمانيات و التعسينات و بداية الالفية كان عدد المهندسين السعوديين في الشركات الكبيرة الحكومية ( ارامكو- سابك - الكهرباء ساسرف … الخ ) قليل وتوجه الدولة لسعودة الوظائف
الهندسية و القيادية في هذه الشركات كان على قدم و ساق لانها شركات حكومية ودخلها بالمليارات وفيها اسرار دولة وامن قومي فعشان كذا اكتسب تخصص الهندسة عندنا سمعة بانه مجال
رائع و سنين دراسة اقل من الطب وتوظيف سريع بعائد مجزي بسبب كثرة الطلب من الشركات الكبيرة على المهندسين السعوديين و قلة عدد خريجين الهندسة السعوديين لكن مع بداية الالفية او لنقل من عام 2003 وانت طالع الشركات الكبيرة اصبح فيها شبه اكتفاء للمهندسين السعوديين حتى بروسيس التوظيف اصبح بطئ و تدخل في اختبرات و برنامج تدريبي فما عاد بقي امام خريجين الهندسة الا الشركات المتوسطة والصغيرة التي لا تمثل خطر قومي اذا تم توظيف اجانب فيها وهي ذات عائد مادي قليل لا يوازي تعب الدراسة وربما يكون الراتب مساوي لخريج التخصصات الادارية و الادبية عشان كذا معظم خريجين الهندسة متورطين الان الشركات الكبيرة شبه اكتفت من الوظائف الهندسية وما ياخذون الا اعداد قليلة اويكون عندك خبرة من الشركات الصغيرة وياخذونك عشان واحد استقال او تقاعد عندهم و محتاجين واحد خبرة و ما عندهم وقت يوظفون مهندس فريش ويدربونه كذا سنة
نصيحتي لك مجال الطب يعتبر واعد ووظائفه كما ذكر الاخوان معظمها تكون داخل المدن مو مثل الهندسة تكون في صحراء اومدن صناعية محددة و دخلها عالي جدا مع مرور الوقت
غير المكانة الاجتماعية التي تعتبر اعلى من المهندس في نظر الناس
ايه انا خريج هندسة اغلب الشركات الكبيرة التوظيف فيها صعب انصحك ماتعمتد على الواسطة ممكن كل شيء يتغير بعد اربع سنوات
راح اختصر عليك الموضوع
اذا دخلت الهندسة حط ببالك انك راتب تبدأ من الصفر وراح تبدأ من راتب قليل وراح تضيع سنوات من عمرك وانت تشتغل بالشركات الصغيرة والمتوسطة وغير كذا ساعات العمل الطويلة
بينما الطب وظيفة حكومية وراتب عالي وماتحتاج تبدأ من راتب قليل يعني راح تكون نفسك بعد التخرج مباشره ان شاء الله
والله يا اخوي حتى لو كنت اكره الطب لازم ادخله اذا سوق العمل سيء للدرجة ذي ( عارف انه ممكن يتغير الوضع بعد ٤ سنوات ) ،، لكن في النهايه الواحد يدور على وظيفه يكسب منها رزقه ،، وشي يقهر والله ان تخصص كبير مثل الهندسه ماله قبول عند الشركات في الفتره الحاليه ،، مشكور على ردك
ايه نعم للآن ما حصلت هالمشكلة و احتمالية انه يواجهها او ما يواجهها متساوية ! استقراء المشكلة و حلها قبل وقوعها نقدر نطبق هالكلام في المواضيع الغير متعلقة بالرزق …
أنت تتحدث عن رزق و هي حاجة في علم الغيب، رزق الرجل مكتوب سواءً الرجل درس طب ولا هندسة … رغبة الرجل الأساسية هندسية و ممكن ربي يرزقه براتب ما يحصل عليه ولا دكتور، ممكن ربي يرزقه براحه ما يحلم فيها ولا دكتور …
الرجل سأل سؤال واضح و مباشر “هل لما اتخرج ح لاقي وظيفة بشركة كبيرة” و حضرتك في الرد اقترحت عليه يسلك مسار غير المسار الي يرغب فيه ك حل ! لكن في ردي وضحت له انه جالس يفكر في مشكلة ما حصلت و ممكن تحصل و ممكن لا لأنها متعلقه بالرزق و نصحته باختيار رغبته …
إنت تركت الفكرة كاملة و ركزت على نقطة وحدة …
خلاصة كلامي و الجزء الي كان المفروض تركز عليه هو ان ترك التخصص الي انا راغب فيه و اختيار تخصص ثاني بس عشان أنا مو ضامن وظيفة في شركة كبيرة هو أكبر خطأ يرتكبه الواحد …
اذا كنت وقتها ضامن للرجال مكتب طبيب في المستشفى التخصصي ساعتها معاك حق في انك تقنع الرجال باختيار تخصص آخر غير الي يرغب فيه …
انا لو مكانك بروح الى ميولي+ بحط بعين الاعتبار ان الطب افضل بكثير من حيث ايجاد الوظيفة بسرعه والراتب والمكانة الاجتماعية
لاتبني قرارك عشان عندك واسطة في سابك هذا خطأ لان بكل بساطة ممكن هالواسطة ماتنقعك بشي لاي سبب ومن الاسباب ممكن واسطتك تتقاعد قبل تخلص او مايصير فيه توظيف بالشركة نفسها بذاك الوقت ومايقدر يظبطك
الي ابي اقوله لك تفكيرك حلو انك تخطط من البداية لكن فكر عدل واحسبها صح
انا لو يرجع فيني الزمن مادخلت هندسة واتجهت الى اي تخصص في الصحة لان ماشاء الله كل الي اعرفهم في الصحة توظفو على طول ورواتب حلوة
موفق
قلة الوظائف بسبب
١- وضع الاقتصاد الحالي ( ارامكوا وقفت ٢٨ مشروع من اصل ٢٩ مشروع )
٢- دولتنا غير صناعية ( مافي صناعة غير النفط والبتروكميكال )
٣- خريجي الهندسة في ازدياد مع عدم نقص عدد الاجانب ( الاجنبي ماسك مكانه )
ولو فيه احد يبي يحل مشكلة العطالة ( على الاقل المهندسين ) كان حلوها بإحلال الاجانب بالسعوديين.
بالله ١٦٠ الف مهندس اجنبي مقابل ٥٠٠٠ سعودي عاطل !